މެޑްރިޑް (މެއި 10) - ދެ ވަނަ ހާފުގައި ކެވިން ޑި ބްރޭނާ ޖެހި މޮޅު ގޯލާ އެކު، މެންޗެސްޓާ ސިޓީން ޗެމްޕިއަންސް ލީގުގެ ސެމީ ފައިނަލް ފުރަތަމަ ލެގުގައި އެންމެ ފަހުގެ ޗެމްޕިއަން ރެއާލް މެޑްރިޑާ 1-1 އިން އެއްވަރުވެއްޖެ އެވެ.
މި ނަތީޖާއާ އެކު، އަންނަ ހަފްތާގައި ސިޓީ ދަނޑުގައި ކުޅޭ ދެ ވަނަ ލެގުގެ މެޗުން ކޮންމެ ޓީމެއް މޮޅުވިޔަސް ފައިނަލުގެ ޖާގަ ލިބޭނެ އެވެ.
ރެއާލްގެ ސަންޓިއާގޯ ބާނަބައުގައި ރޭ ކުޅުނު މެޗުގައި އެ ޓީމުން ފުރަތަމަ ހާފު ނިންމާލީ ލީޑުގައި އޮވެ އެވެ. އެއީ މެޗުގެ 36 ވަނަ މިިނިޓްގައި ވިނީޝިއުސް ޖޫނިއާ ޖެހި ގޯލުންނެވެ. ރެއާލްގެ އެޑޮއާޑޯ ކަމަވިންގާ ހިފައިގެން އައި ބޯޅަ، ސިޓީގެ ހާފުގެ ތެރެއިން ވިނީޝިއުސް އަށް ދިނުމުން އޭނާ ވަނީ ބޯޅަ ކޮންޓްރޯލް ކޮށްލުމަށް ފަހު ގޯލުގެ މަތީ ކަނަށް ބޯޅަ ފޮނުވާލައިފަ އެވެ.
ފުރަތަމަ ހާފުގައި ސިޓީގެ ރޮޑްރީ އާއި އާލިން ބްރައުޓް ހާލަންޑް ފޮނުވާލި ބޯޅަތައް ރެއާލްގެ ކީޕަރު ތިބޯ ކޯޓުއާ ވަނީ މަތަކޮށްފަ އެވެ. އަދި ދެ ވަނަ ހާފުގައި ހާލަންޑަށް ލިބުނު ފުރުސަތުން ރެއާލް އޭރިއާތެރެއިން ގޯލަށް ޖެހި ޝޮޓް، ރެއާލްގެ ޑިފެންޑަރު ޑޭވިޑް އަލަބާ ވަނީ ބްލޮކްކޮށްފަ އެވެ.
ސިޓީން އެއްވަރުކުރި ގޯލު ޖެހީ މެޗުގެ 67 ވަނަ މިނިޓްގަ އެވެ. ސިޓީގެ އިލްކާއި ގުންޑޮގާން ދިން ބޯޅަ އޭރިއާބޭރުގައި ހުރެފައި ޑިބްރޭނާ އެއް ފަަހަރުން ފޮނުވާލުމުން އަމާޒުވީ ގޯލުގެ ކަނަށެވެ. އެ ބޯޅަ އައި ބާރު މިނުގެ ސަބަބުން ކީޕަރު ކޯޓުއާ އަށް އެ ހަމަލާ ހުއްޓުވަން މާބޮޑު ކަމެއް ނުކުރެވުނެވެ. ޗެމްޕިއަންސް ލީގުގައި ޑިބްރޭނާ ޖެހި 14 ގޯލުގެ ތެރެއިން 11 ގޯލު ކާމިޔާބުކުރީ ޗެމްޕިއަންސް ލީގުގެ ނޮކައުޓް ބުރުގަ އެވެ.
އިތުރު ގޯލެއް ޖަހައި، މެޗުން މޮޅުވެ، އެޑްވާންޓޭޖެއް ނަގަން ދެ ޓީމުން ކުރި މަސައްކަތް ވެސް ކާމިޔާބެއްނުވި އެވެ.
ސިޓީ މި މެޗުން ވެސް ބަލިނުވެ، ނިންމާލިއިރު، ތިން ތަށްޓާ އެކު ސީޒަން ނިންމާލަން ކުރާ މަސައްކަތަށް ވަނީ ހިތްވަރު ލިބިފަ އެވެ. އެންމެ ފަހުން ކުޅުނު 21 މެޗުން ވެސް ސިޓީ ބަލިވެފައިނުވާއިރު، އިނގިރޭސި ޕްރިމިއާ ލީގުގެ އެއް ވަނައިގައި ލީޑެއް ވެސް ވަނީ ލިބިފަ އެވެ. އަދި އެފްއޭ ކަޕް ފައިނަލުގައި ސިޓީން ނުކުންނާނީ ވާދަވެރި ކްލަބް، މެންޗެސްޓާ ޔުނައިޓެޑާ ދެކޮޅަށެވެ.
