މެޑްރިޑް (މެއި 9) - ޔުއެފާ ޗެމްޕިއަންސް ލީގުގެ ސެމީ ފައިނަލުގެ ފުރަތަމަ ލެގުގައި މުބާރާތުގެ އެންމެ ކާމިޔާބު ޓީމު ރެއާލް މެޑްރިޑާ ކުޅެން ޖެހުނު ކަމުގައި ވިޔަސް ކުރީގެ ކަންތައްތަކެއްގެ ބަދަލުހިފުމުގެ ވިސްނުމެއް މެންޗެސްޓާ ސިޓީން ނުގެންގުޅޭ ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފި އެވެ.
މިއީ ޗެމްޕިއަންސް ލީގުގެ ނޮކައުޓް ބުރުގައި ސިޓީ އާއި ރެއާލްގެ ތިން ވަނަ ކުރިމަތިލުމެވެ. މި ތިން މެޗުގެ ތެރެއިން ދެ މެޗު ކުޅެފައިވަނީ ގާޑިއޯލާ 2016 ވަނަ އަހަރު ސިޓީއާ ހަވާލުވި ފަހުންނެވެ. އެ ގޮތުން، ރެއާލުން ވަނީ ދެ ފަހަރެއްގެ މަތިން ސެމީ ފައިނަލުގައި ސިޓީ ކަޓުވާލައިފަ އެވެ. އެއީ މިދިޔަ ސީޒަނުގެ އިތުރުން، ސިޓީގެ ކޯޗަކަށް މެނުއަލް ޕެލެގްރީނީ ހުއްޓައި، 2015/2016 ވަނަ އަހަރު އެވެ. ސިޓީން ވަނީ 2019/2020 ވަނަ އަހަރުގެ ޗެމްޕިއަންސް ލީގުގެ ގަދަ 16 ބުރުގައި ރެއާލް އަތުން ދެ ލެގުގައި ވެސް މޮޅުވެ، ކާމިޔާބު ހޯދައިފަ އެވެ. އޭރު ކޯޗަކީ ގާޑިއޯލާ އެވެ.
މިދިޔަ ސީޒަނުގައި ފަހު ވަގުތު ހިތްދަތި ގޮތަކަށް ރެއާލް އަތުން ސިޓީ ކެޓުމުން އޭގެ ބަދަލުހިފަން ސިޓީން މި ފަހަރު މަސައްކަތް ކުރާނެ ކަމަށް މީޑިއާގައި ވަނީ ވާހަކަދެކެވިފަ އެވެ. އެ ކަމަށް ބާރު ލިބޭ ގޮތަށް ސިޓީގެ ޕޯޗުގީސް މިޑްފީލްޑަރު، ބެނާޑޯ ސިލްވާ ވެސް ވަނީ އިންޓަވިއުއެއް ދީފަ އެވެ.
މިރޭ ރެއާލް ދަނޑުގައި ކުޅޭ ސެމީ ފައިނަލް ފުރަތަމަ ލެގުގެ ކުރިން ނޫސްވެރިންގެ ބައްދަލުވުމުގައި ވާހަކަ ދައްކަމުން ގާޑިއޯލާ ބުނީ ބަދަލުހިފުމުގެ ވާހަކަ އާ މެދު ދައްކާނެ ވާހަކައެއް ނެތް ކަމަށެވެ.
"ބަދަލުހިފުމުގެ ވާހަކަތަކެއް ނޫން އަހަރެން ދައްކާހިތް އޮތީ. އަހަރެން ބޭނުންވަނީ މިއީ ސިޓީގެ ތާރީހުގައި ކުރިއަށް ފިޔަވަޅެއް އަޅަން ލިބޭ ބޮޑު ފުރުސަތަކަށް ހަދަން. ކުރިން ވެފައި ހުރި ކަމެއް ވިއްޔާ މިހާރު އެކަންކަން އެ ހުރީ މާޒީއާ އެކު ގޮސްނިމިފައި. އަލުން އެ ވާހަކަ ދައްކައިގެން ވާނެ ކަމެއް ނެތް،" ބާސެލޯނާއާ އެކު 2009 އާއި 2011 ވަަނަ އަހަރު ޗެމްޕިއަންސް ލީގު ހޯދި ގާޑިއޯލާ ބުންޏެވެ.
މިދިޔަ އަހަރުގެ ސެމީ ފައިނަލުގައި ފުރަތަމަ ލެގު ސިޓީ ދަނޑުގައި ކުޅެފައި، ދެ ވަނަ ލެގު ކުޅުނީ މެޑްރިޑްގަ އެވެ. މި ފަހަރު ދެ ވަނަ ލެގު ސިޓީ ދަނޑުގައި ކުޅެން އޮތުމަކީ ސިޓީ އަށް މިކަމުގައި ފައިދާއެއް ނެގިދާނެ ކަމެއްތޯ އެހުމުން ގާޑިއޯލާ ބުނީ ވިސްނުމަކީ އަމިއްލަ ދަނޑުގައި ކުޅޭ ލެގަށް ދާއިރު، އަމިއްލަ ކޮންޓްރޯލް އޮންނަ ހާލަތެއްގައި އޮތުން ކަމަށެވެ.
އަނިޔާގެ ސަބަބުން ސިޓީގެ ޑިފެންޑަރު، ނޭތަން އަކޭ އެ ކްލަބުން ބޭއްވި އެންމެ ފަހުގެ ފަރިތަކުރުންތަކުގައި ބައިވެރިނުވެ އެވެ. ރެއާލުން ސްޕެނިޝް ކަޕް ފައިނަލުގައި ކުޅެން ޖެހުނީ އަނިޔާގައި ހުރި 37 އަހަރުގެ މިޑްފީލްޑަރު ލޫކަ މޮޑްރިޗް ނެތި އެވެ. އެކަމަކު، މިރޭ ސިޓީއާ ދެކޮޅަށް ކުޅޭ މެޗަށް މޮޑްރިޗް ފިޓް ކަމަށް ރެއާލުން ވަނީ ބުނެފަ އެވެ.
ސިޓީ އާއި ރެއާލް ކުޅޭ މެޗު ފަށާނީ ރާއްޖެ ގަޑިން މިރޭ 00:00 ގަ އެވެ.
