ޑޯޓްމަންޑް (މެއި 8) - ޖަރުމަނު ލީގުގައި ރޭ ޖޫޑް ބެލިންހަމްގެ ދެ ގޯލާ އެކު ބޮރޫޝިއާ ޑޯޓްމަންޑް އިން 6-0 އިން ވުލްފްސްބާގް ބަލިކޮށް ލީގު އެއް ވަނައިގައި އޮތް ބަޔާން މިއުނިކާ ދެމެދު ފަރަގު ކުޑަކޮށްފި އެވެ.
ރޭ ޑޯޓްމަންޑް މޮޅުވުމާ އެކު، ލީގުގެ އެއް ވަނައިގައި އޮތް ބަޔާންގެ ލީޑު ވަނީ އެއް ޕޮއިންޓަށް ކުޑަވެފަ އެވެ. ބަޔާނަށް 31 މެޗުން 65 ޕޮއިންޓް ލިބިފައިވާއިރު، 31 މެޗުން ޑޯޓްމަންޑުން ވަނީ 64 ޕޮއިންޓް ހޯދައިފަ އެވެ.
ޑޯޓްމަންޑްގެ ސިގްނަލް އިޑޫނާ ޕާކްގައި ރޭ ކުޅުނު މެޗުގައި ބެލިންހަމްގެ އިތުރުން ޑޯޓްމަންޑަށް ކުޅޭ ޖަރުމަނުގެ ޒުވާން ފޯވާޑް، ކަރީމް އަޑިޔޭމީ ވަނީ ދެ ގޯލު ޖަހައިފަ އެވެ. އެ ޓީމުގެ އަނެއް ދެ ގޯލު ކާމިޔާބުކުރީ ޑޮންޔެލް މާލެން އާއި ސަބެސްޓިއަން އަލެއާ އެވެ.
ރޭގެ މެޗުގައި އަޑިޔޭމީ ހެޓްރިކް ހަދަން ލިބުނުއިރު، ފޮނުވާލި ޕެނަލްޓީ ވީ ނާކާމިޔާބެވެ.
މި ސީޒަން ނިންމާފައި، ސްޕެއިނުގެ ގަދަބާރު ރެއާލް މެޑްރިޑަށް ބަދަލުވާން އުމުރުން 19 އަހަރުގެ ބެލިންހަމް ނިންމާފައިވާ ކަމަށް މީޑިއާ ރިޕޯޓްތައް ބުނާއިރު، އޭނާ ވަނީ މި ސީޒަނުގެ ހުރިހާ މުބާރާތެއްގައި ޖުމްލަ އެކު، 13 ގޯލު ޖަހައިފަ އެވެ.
ޑޯޓްމަންޑުން މަސައްކަތް ކުރަމުން އަންނަނީ 11 އަހަރު ތެރޭ ފުރަތަމަ ފަހަރަށް ޖަރުމަނު ލީގުގެ ޗެމްޕިއަންކަން ހޯދުމަށެވެ.
