"މުލީކޮޅު ރާޅުގަނޑު" ސާފިން މުބާރާތުގެ ފައިނަލްގައި ހުސެއިން އަރީފް (އިބޫ)ގެ ބަލިކޮށް، އަހުމަދު އާގިލް (އަންމަޑޭ) ޗެމްޕިއަންކަން ދިފާއު ކޮށްފި އެވެ.
ގައުމީ ސާފިން ލީގުގެ މި އަހަރުގެ ދެ ވަނަ މުބާރާތް ކަމަށްވާ "މުލީކޮޅު ރާޅުގަނޑު" މުބާރާތުގެ އޯޕަން ބައިގެ ޗެމްޕިއަންކަން އައްމަޑޭ ހޯދީ ފޯރިގަދަ ފައިނަލް ހީޓު 0.53ގެ ކުޑަ ތަފާތަކުން ކާމިޔާބުކޮށްގެންނެވެ. ފައިނަލު ހީޓު ފަށައިގެން ގިނަ ވަގުތު ލީޑުގައި އޮތީވެސް އިބޫ އެވެ. އެ ގޮތުން، 13.50 ގެ ސްކޯއަކާ އެކު އިބޫ ކުރީގައި އައްމަޑޭ ފަހު ވަގުތު ސިޓުއޭޝަން ބަދަލުކޮށްލީ 14.03ގެ ސްކޯއެއް ހޯދައިގެންނެވެ.
މިދިޔަ އަހަރުގެ ގައުމީ ސާފް ލީގުގެ ޗެމްޕިއަންކަން ހޯދީ އައްމަޑޭ ފައިނަލުން ޖާގަ ހޯދީ ސެމީ ފައިނަލުގައި ސައްޔިދު ސަލާހުއްދީން ބަލިކޮށްގެންނެވެ. ސެމީ ފައިނަލުގައި އައްމަޑޭ 17.17 ގެ ސްކޯއެއް ހޯދިއިރު، ސައްޔިދު އަށް ލިބުނީ 7.16 ގެ ސްކޯއެކެވެ.
އިބޫ ފައިނަލުން ޖާގަ ހޯދީ ސެމީ ފައިނަލުގައި ނަޖާހު މުހައްމަދު (ކަބޯ) ބަލިކޮށްގެންނެވެ. މި ހީޓުގައި އިބޫ 15.00 ގެ ސްކޯއެއް ހޯދިއިރު، ކަބޯ އަށް ލިބުނީ 12.40ގެ ސްކޯ އެކެވެ.
މި އަހަރުގެ ސާފް ލީގުގެ ފުރަތަމަ މުބާރާތް ކަމަށްވާ ކަޅެގަލެކޮޑާ މުބާރާތް ކާމިޔާބުކޮށްފަ އެވެ. އެ މުބާރާތް އޮތީ ގދ. ގައްދޫގަ އެވެ.
"މުލީކޮޅު ރާޅުގަނޑު" މުބާރާތުގެ ޖޫނިއާ ބައިގެ ޗެމްޕިއަންކަން ހޯދީ މިދިޔަ މި ބައިގެ އެއް ވަނަ ހޯދި ޝާނިފް ޝަފީގް އެވެ. ޝާނިފްއާ ދެކޮޅަށް ފައިނަލުގައި ނުކުތީ ޔާސިން އަހުމަދު ނާޝިދު އެވެ. ޝާނިފް ފައިނަލް ހީޓުގައި 10.83 ގެ ސްކޯއެއް ހޯދިއިރު، ޔާސިން އަށް ލިބުނީ 8.00 ގެ ސްކޯ އެކެވެ.
ޝާނިފް ސެމީ ފައިނަލުން ޖާގަ ހޯދީ މުހައްމަދު އިނާން އަބްދުލް ހައްނާން ބަލިކޮށްގެންނެވެ. މި ހީޓުގައި ޝާނިފް 12.83 ގެ ސްކޯއެއް ހޯދިއިރު، އިނާން އަށް ލިބުނީ 10.76ގެ ސްކޯ އެކެވެ.
ސެމީ ފައިނަލް ދެ ވަނަ ހީޓު ޔާސިން ކާމިޔާބުކުރީ ކަޔާން އަބްދުﷲ އަރީފް ބަލިކޮށްގެންނެވެ. ސެމީގެ މި ހީޓުން ޔާސިން މޮޅުވީ 10.66 ގެ ސްކޯއެއް ހޯދައިގެންނެވެ. ކަޔާން އަށް ލިބުނީ 3.67 އެވެ.
ގައުމީ ސާފިން ލީގުގެ މި އަހަރުގެ ތިން ވަނަ މުބާރާތް އޮންނާނީ ޖުލައި 4-8 އަށް ކ. ހިންމަފުށީގައި އޮންނަ ގާމާދޫކޮޅު މުބާރާތެވެ. އޭގެ ފަހުން، ޖުލައި 31 އިން އޮގަސްޓް 5 އަށް ހުރާކޮޅު ރާޅުގަނޑު ކުރިއަށް ދާނީ ރ. ކިނޮޅަހުގަ އެވެ. މި އަހަރުގެ ވެސް އެންމެ ފަހު މުބާރާތް ކަމަށްވާ ރަންނަމާރި ޗެލެންޖް މާލޭގައި އޮންނާނީ އޮކްޓޫބަރު މަހުގެ 27 އިން ނޮވެމްބަރު މަހުގެ 25 ގެ ނިޔަލަށެވެ.
