މި މަހުގެ ފަހުކޮޅު ފަށާ ގައުމީ ނެޓްބޯޅަ މުބާރާތާ އެކު މި އަހަރުގެ ނެޓްބޯޅަ ހަރަކާތްތައް ފަށަން ނެޓްބޯޅަ އެސޯސިއޭޝަނުން ނިންމައިފި އެވެ.
ނެޓްބޯޅަ އެސޯސިއޭޝަނުން ދާދި ފަހުން އަހަރުގެ ކުޅިވަރު ކަލަންޑަރު ނެރެފައިވާއިރު ފުރަތަމަ ކުރިއަށް ގެންދިޔުމަށް ތާވަލްކޮށްފައިވަނީ ސީނިއާ މުބާރާތްތަކެވެ. އެ އެސޯސިއޭޝަނުން މައުލޫމާތު ދިން ގޮތުގައީ ސީނިއާ މުބާރާތްތައް ކުރިއަށް ޖައްސާލާފައިވަނީ މި އަހަރުގެ ފަހުކޮޅު ތައިލެންޑުގައި އޮންނަ އޭޝިއަން އިންޑޯ އެންޑް މާޝަލް އާޓްސް ގޭމްސް އަށް ތައްޔާރުވުމަށް ވަގުތު ދިނުމުގެ ގޮތުންނެވެ.
ގައުމީ މުބާރާތް ބާއްވަން ނިންމާފައިވަނީ މި މަހުގެ 26 އިން ފެށިގެން އަންނަ މަހުގެ 24 އާ ހަމަ އަށެވެ. ގައުމީ މުބާރާތަށް ފަހު އޮންނާނީ އޮގަސްޓް މަހު އޮންނަ އެސޯސިއޭޝަން ޗެމްޕިއަންޝިޕް އެވެ. މި މުބާރާތް ކުރިއަށްދާނީ އޮގަސްޓް 8-22 އަށެވެ.
ސީނިއާ ދެ މުބާރާތަށް ފަހު ދެން އޮންނާނީ ޖޫނިއާ ދެ މުބާރާތެވެ. މި ގޮތުން އޮގަސްޓް މަހުގެ 25 އިން ސެޕްޓެމްބަރު 2 އަށް އޮންނާނީ ޖޫނިއާ ޗެމްޕިއަންޝިޕް އެވެ. އެ ގޮތުން، 21 އަހަރުން ދަށުގެ ކުޅުންތެރިންނަށް އަމާޒުކޮށް ބާއްވާ ޖޫނިއާ ޗެމްޕިއަންޝިޕް ފުރަތަމަ ފަހަރަށް ބާއްވާފައިވަނީ މިދިޔަ އަހަރު އެވެ.
ޖޫނިއާ ޗެމްޕިއަންޝިޕަށް ފަހު އޮންނަނީ އެންމެ ގިނަ ކުޅުންތެރިން ވާދަކުރާ އިންޓަ ސްކޫލް ނެޓްބޯޅަ މުބާރާތެވެ. މި މުބާރާތް އޮންނާނީ 16 ސެޕްޓެމްބަރުން ފެށިގެން 7 އޮކްޓޯބަރު އަށެވެ.
މި އަހަރުގެ ފަހުކޮޅު ބޭއްވުމަށް ހަމަޖެހިފައިވަނީ ރެކްރިއޭޝަނަލް ދެ މުބާރާތް ކަމަށްވާ އިންޓަ އޮފީސް/ކޮމްޕެނީ ނެޓްބޯޅަ މުބާރާތާއި، އިންޓަ ސްކޫލް ބެލެނިވެރިންނާއި ޓީޗަރުންގެ މުބާރާތެވެ. އޮފީސްތަކުގެ މުބާރާތް އޮކްޓޯބަރު 10-31 އަށް އޮންނައިރު، ސްކޫލް ބެލެނިވެރިންނާއި ޓީޗަރުންގެ މުބާރާތް އޮންނާނީ ޑިސެމްބަރު 1 -20 އަށެވެ.
ރާއްޖޭގެ ގައުމީ ޓީމު މި އަހަރު ވާދަކުރަން ހަމަޖެހިފައިވަނީ ބައިނަލްއަގްވާމީ އެންމެ މުބާރާތެއްގަ އެވެ. އެއީ ނޮވެމްބަރު 17-26 އަށް ތައިލެންޑުގައި އޮންނަ އޭޝިއަން އިންޑޯ އެންޑް މާޝަލް އާޓްސް ގޭމްސް އެވެ.
މުބާރާތްތަކުގެ އިތުރުން ފަންނީ މީހުން ތަމްރީންކުރުމުގެ ހަތަރު ކޯހެއް މި އަހަރު ހިންގާނެ އެވެ. މީގެ ތެރެއިން ބޭސިކް ކޯޗިން އަދި ބޭސިން އަމްޕަޔަރިން ކޯހެއް މި އަހަރުގެ ކުރީކޮޅު ވަނީ ބާއްވައިފަ އެވެ. މި ކޯހުގެ އެޑްވާންސް ބައި މި އަހަރުގެ ނޮވެމްބަރު މަހު އޮންނާނެ އެވެ.
މި އަހަރު ފެށުނީއްސުރެ ނެޓްބޯޅަ ގައުމީ ޓީމުން ހުއްޓުމެއް ނެތި ޕްރެކްޓިސް ކުރަމުން އަންނައިރު، ގައުމީ ޖޫނިއާ ސްކޮޑަށް ކުޅުންތެރިން ނެގުމަށް ޓްރަޔަލް ސެޝަންތަކެއް ވެސް ނެޓްބޯޅަ އެސޯސިއޭޝަނުން ވަނީ ދާދި ފަހުން ކުރިއަށް ގެންގޮސްފަ އެވެ.
