ނިއުކާސަލް (މެއި 5) - ސައުދީ އަރަބިއްޔާގެ އަލް ނަސްރަށް މި ވަގުތު ކުޅެމުން އަންނަ ޕޯޗުގީސް ތަރި ކްރިސްޓިއާނޯ ރޮނާލްޑޯ އާއި ޕީއެސްޖީން ދޫކޮށްލަން ތައްޔާރުވަމުން އަންނަ ބްރެޒިލްގެ ނޭމާ ގަންނާނެ ފެންވަރެއް އަދި ނިއުކާސަލް ޔުނައިޓެޑްގެ ނެތް ކަމަށް އެ ޓީމުގެ ކޯޗު އެޑީ ހޯވް ބުނެފި އެވެ.
ސައުދީ އަރަބިއްޔާގެ ޕަބްލިކް އިންވެސްޓްމަންޓް ފަންޑް (ޕީއައިއެފް)ގެ 80 ޕަސެންޓް ހިއްސާ އޮންނަ ނިއުކާސަލް ޔުނައިޓެޑުން އެންމެ ފަހުން ނިމުނު ތިން ޓްރާންސްފާ ބާޒާރުގައި ވަނީ އާ ކުޅުންތެރިން ގަންނަން 315 މިލިއަން ޑޮލަރު ހަރަދުކޮށްފަ އެވެ.
މި ވަގުތު، އިނގިރޭސި ޕްރިމިއާ ލީގުގެ ތިން ވަނައިގައި އޮތް ނިއުކާސަލް އިން ގަދަ ހަތަރެއްގައި ނިންމައި، އަންނަ ސީޒަނަށް ވަރުގަދަ ޓީމެއް އެކުލަވާލަން ޖެހޭނެ ކަމަށް ބުނެ، ގިނަ މީޑިއާތަކުން ވާހަކަ ދައްކާއިރު، ފުޓްބޯޅައިގެ މަޝްހޫރު ކުޅުންތެރިންނާއި ނިއުކާސަލާ ގުޅުވައިގެން މީޑިއާގައި އަޑުފެތުރެ އެވެ.
އެ ގޮތުން، ރޮނާލްޑޯ އާއި ނޭމާ އަކީ ވެސް ނިއުކާސަލްގެ ޝޮޕިން ލިސްޓުގައި ހިމެނޭ ކުޅުންތެރިން ކަމަށް މީޑިއާގައި އަޑުފެތުރިފައިވެ އެވެ. އެކަމަކު، ހޯވް ބުނީ ނިއުކާސަލް އަދި އޮތް ލެވަލަށް ބަލާއިރު، އެ ފަދަ ކުޅުންތެރިން ގެނެވޭނެ ފެންވަރު ހުރި ކަމަށް ނުދެކޭ ކަމަށެވެ.
"ތި ބުނާ ފަދަ މަޝްހޫރު ކުޅުންތެރިން (ރޮނާލްޑޯ އާއި ނޭމާ) އަދިއެއް ގެނެވެން ނެތް. އެ ކުޅުންތެރިންނަށް އެދޭ މުސާރަ އާއި އެ ލިބޭ މަޝްހޫރުކަން އެ އޮތީ ބޮޑެތި ޓީމުތަކާ ގުޅިފައި. ނިއުކާސަލް އަކީ މި ވަގުތު އެ ލެވަލަށް ދާން މަސައްކަތް ކުރާ ޓީމެއް. އަހަރެމެން ވިސްނަންވީ ޒުވާން އުމުރުގައި ތިބި އެ ލެވަލަށްދާނެ ކުޅުންތެރިން މި ޓީމުގެ ތެރެއިން އެ ހިސާބަށް ގެންގޮސްދޭން،" ހޯވް ބުންޏެވެ.
ނިއުކާސަލްގެ މެޖޯރިޓީ ހިއްސާ އޮތް ޕީއައިއެފްގެ މިލްކިއްޔާތުގައި 434 ބިލިއަން ޑޮލަރު އެބަހުއްޓެވެ. މިއީ، ފުޓްބޯޅަ ކްލަބެއް ހިންގަން ހަވާލުވެފައި އޮތް ބައެއްގެ އެންމެ ބޮޑު މިލްކިއްޔާތެވެ. މި ހުރިހާ ސަަބަބުތަކަށް ޓަކައި، މަޝްހޫރު ގިނަ ކުޅުންތެރިންނާއި ނިއުކާސަލާ ގުޅުވައިގެން މީޑިއާގައި ވާހަކަ ދެކެވޭ ކަމަށް ހޯވް ވަނީ ބުނެފަ އެވެ.
ކުރިން ބޯންމައުތަށް ކޯޗުކޮށްދިން ހޯވް ބުނީ އަންނަ ސީޒަނަށް ވެސް ނިއުކާސަލް އިން ހަރަދުކުރާނެ ކަމަށާއި އެކަމަކު، އެ ކްލަބްގެ އިންވެސްޓްމަންޓްތައް ބައްޓަންކުރާނީ ހާސިލްކުރެވޭނެ ކަންކަމަށް ބަލާފައި، ދުރު މުސްތަގުބަލަށް ކަމަށެވެ.
