ތޭވީސް އަހަރުން ދަށުގެ ކުޅުންތެރިންނަށް އަމާޒުކޮށް ކްރިކެޓް ބޯޑު އޮފް މޯލްޑިވްސް (ސީބީއެމް) އިން ކުރިއަށްގެންދާ ޓީ20 ކްރިކެޓް މުބާރާތުގައި ވާދަކުރަމުން އަންނަ ފުވައްމުލަކު ޓީމުން ފުރަތަމަ މެޗުގައި ތަފާތު ދައްކައިފި އެވެ.
މިދިޔަ އަންގާރަ ދުވަހު މާލޭގައި ކުރިއަށްދާ މުބާރާތުގައި ވާދަކުރަނީ ފުވައްމުލަކުގެ 23 އަހަރުން ދަށުގެ ޓީމުގެ އިތުރުން މާލޭގެ ދެ ޓީމެކެވެ.
މުބާރާތުގައި ފުވައްމުލަކު ޓީމުން ކުޅުނު ފުރަތަމަ މެޗުގައި މާލޭގެ ބީ ޓީމާ ވާދަކޮށް މެޗު ކާމިޔާބުކުރީ 152 ލަނޑުންނެވެ.
މެޗުގެ ޓޮސް ދިމާވުމުން ފުވައްމުލަކު ޓީމުން ކުޅެން އަރާ 20 އޯވަރުގައި ހަތް ކުޅުންތެރިން ނުބައިވެގެން 203 ލަނޑު ހެދި އެވެ. އެ ޓީމުން އެންމެ ރަނގަަޅަށް ކުޅުނީ ހާފް ސެންޗަރީ އެއް ހެދި މަބްސަރު އިބްރާހިމް އާއި 28 ލަނޑު ހެދި މުހައްމަދު ހައިކަލް އެވެ.
މި އިނިންގްސްގައި މާލޭ ބީ ޓީމުގެ އަހުމަދު ނައިސަމް ނިސާން ހަތަރު އޯވަރުގައި 34 ލަނޑަށް ދެ ވިކެޓު ނެގިއިރު، މުހައްމަދު ޒުހާން ރާޒީވެސް ދެ ވިކެޓު ނެގި އެވެ.
ޖަވާބުގައި މާލޭ ބީ ޓީމުން ކުޅެން އަރައި ހުރިހާ ކުޅުންތެރިން ނުބައިވެގެން ހެދުނީ 51 ލަނޑެވެ. އެ ޓީމުން އެންމެ ރަނގަޅަށް ކުޅުނީ 11 ލަނޑު ހެދި އިސްމާއިލް ނަޒްވާން އެވެ.
މި އިނިންގްސްގައި ފުވައްމުލަކު ޓީމުގެ ހައިކަލް ވަނީ ތިން ވިކެޓު ނަގާފަ އެވެ. މެޗުގެ މޮޅު ކުޅުންތެރިޔާގެ މަގާމް ހޯދީ މަބްސަރު ވެސް ވަނީ ދެ ވިކެޓު ނަގާފަ އެވެ.
ގައުމީ ޓީމަށް އަރާ ޒުވާން ކުޅުންތެރިންނަށް ގިނަ މެޗުތަކެއް ކުޅުމުގެ ފުރުސަތު ހޯދައިދީ، ވާދަވެރި މެޗުތަކުގެ ތަޖުރިބާ ހޯދައިދިނުމުގެ މަގުސަދުގައި ކުރިއަށްގެންދާ މުބާރާތުގައި ކުޅުނު ފުރަތަމަ މެޗުގައި ވާދަކުރީ މާލޭގެ ދެ ޓީމެވެ. މި މެޗު 137 ލަނޑުގެ ތަފާތުން ކާމިޔާބުކުރީ މާލޭ އޭ ޓީމެވެ.
މާލޭ އޭ ޓީމުން ކުޅެން އަރާ 20 އޯވަރުގައި ހަތަރު ކުޅުންތެރިން ނުބައިވެގެންވަނީ 227 ލަނޑު ހެދި އެވެ. އެޓީމުން އެންމެ ރަނގަަޅަށް ކުޅުނީ 68 ލަނޑު ހެދި ރަޔާން ތޮލާލް އާއި 63 ލަނޑު ހެދި އަލީ އިމްއާން އެވެ.
ޖަވާބުގައި މާލޭ ބީ ޓީމުން ކުޅެން އަރާ 20 އޯވަރުގައި ހުރިހާ ކުޅުންތެރިން ނުބައިވެގެން ހެދުނީ 90 ލަނޑެވެ.
މުބާރާތުގައި މިއަދު ކުޅޭ މެޗުގައި ފުރަތަމަ މެޗުގައި ފުވައްމުލަކު ޓީމުން ނިކުންނާނީ މާލޭ އޭ ޓީމާ ދެކޮޅަށެވެ.
މި މުބާރާތުގެ ފައިނަލުން ފުރުސަތު ލިބޭނީ ލީގު އުސޫލުން ދެ ބުރު ކުޅެ އެންމެ ގިނަ ޕޮއިންޓް ހޯދާ ދެ ޓީމަށެވެ. ފައިނަލް މެޗު ކުޅޭނީ މިމަހުގެ ނުވަވަނަ ދުވަހު އެވެ.
