ދެކުނު ކޮރެއާގެ ޔެޗިއޮންގައި އޮންނަ 20 އަހަރުން ދަށުގެ އޭޝިއަން އެތުލެޓިކްސް ޗެމްޕިއަންޝިޕްގައި ރާއްޖޭން ވާދަކުރާ ދުވުންތެރިއަކަށް ހައްވާ މުޒްނާ ފާއިޒު ހޮވައިފި އެވެ.
އަންނަ މަހުގެ 4-7 އަށް ކޮރެއާގެ ޔެޗިއޮންގައި އޮންނަ މުބާރާތުގައި 35 ގައުމަކުން 400 އެއްހާ އެތުލީޓުން ވާދަކުރާނެ ކަމަށް ބެލެވެ އެވެ.
މުބާރާތުގައި ރާއްޖެ އިން ވާދަކުރާނީ އައްޑޫ ޓްރެއިނިން ސެންޓަރުގައި ތަމްރީން ހަދަމުން އަންނަ މުޒްނާ އެވެ. މުޒްނާ އަކީ މިދިޔަ މާޗު މަހު އޮތް މޯލްޑިވްސް ސްޕޯޓްސް އެވޯޑުގެ އެތުލެޓިކްސް އިން ހޮވި އެންމެ މޮޅު އަންހެން އެތުލީޓުގެ މަގާމަށް ވާދަކުރި ދުވުންތެރިއެކެވެ.
މިދިޔަ ދެ ތިން އަހަރަށް ބަލާއިރު ޒުވާން އުމުރުގައި މުޒްނާ ވަނީ ބޮޑު ކުރިއެރުންތަކެއް ހޯދައިފަ އެވެ. އެ ގޮތުން އެންމެ ފަހުން އޭނާ ވާދަކުރި 10 ވަނަ އެސޯސިއޭޝަން ޗެމްޕިއަންޝިޕުގައި ތިން އިވެންޓަކުން އޭނާ ރިހި މެޑަލް ހޯދި އެވެ. އެއީ 100 މީޓަރު، 200 މީޓަރު އަދި 400 މީޓަރު ދުވުމުންނެވެ.
ޝަރަފުއްދީން ސްކޫލް އެތުލެޓިކްސް ޓީމުން ވިދާލި މުޒްނާ ވަނީ މި އަހަރުގެ ކުރީކޮޅު ޏ. ފުވައްމުލަކުގައި އޮތް އިންޓަ ސްކޫލް އެތުލެޓިކްސް މީޓުގެ 100 މީޓަރު ދުވުމުގައި ދުވެ މީޓް ރެކޯޑެއް ވެސް ހަދައިފަ އެވެ.
އެންމެ ފަހުން މުޒްނާ ވާދަކުރި ގައުމީ ގްރޯން ޕްރީ އަށް ބަލާއިރު، އޭނާ ވަނީ 400 މީޓަރު ދުވުމުން ރަން މެޑަލް، 200 މީޓަރު ދުވުމުން ރިހި މެޑަލް އަދި 100 މީޓަރު ދުވުމުން ބްރޯންޒް މެޑަލް ހޯދައިފަ އެވެ.
އެންމެ ފަހުން މުޒްނާ ވާދަކުރި ގައުމީ މުބާރާތަށް ބަލާއިރު އޭނާ ވަނީ ތިން އިވެންޓަކުން ރިހި މެޑަލް އަދި ދެ ޓީމް ރިލޭއަކުން ރަން މެޑަލް ހޯދައިފަ އެވެ. ރިހި މެޑަލް މި ފަހަރު ވެސް ހޯދީ މީޓަރު، 200 މީޓަރު އަދި 400 މީޓަރު ދުވުމުންނެވެ. ހަތަރެއް ގުނަ 100 މީޓަރު ދުވުމުން ރަން މެޑަލް ހޯދައި މީޓު ރެކޯޑު ހެދި ޓީމާއި، 4 ގުނަ 400 މީޓަރު ދުވުމުން ރަން މެޑަލް ހޯދި ކުލަބު ރާވެރިޔާ ޓީމްގައި ވެސް މުޒްނާ ހިމެނުނެވެ.
ވިހި އަހަރުން ދަށުގެ އޭޝިއަން އެތުލެޓިކްސް ޗެމްޕިއަންޝިޕްގައި ރާއްޖޭގެ ޒުވާން އެތުލީޓުންނަށް މުހިންމު ތަޖުރިބާތަކެއް ލިބޭ މުބާރާތެކެވެ. ކޮންމެ ދެ އަހަރުން އެއް އަހަރު ބާއްވަމުން އަންނަ މި މުބާރާތް އެންމެ ފަހުން މި މުބާރާތް ބާއްވާފައިވަނީ 2018 ވަނަ އަހަރު އެވެ. އޭގެ ފަހުން 2020 ގައި ބެންކޮކްގައި ބާއްވަން އޮތް މުބާރާތް ކެންސަލްކުރީ ކޮވިޑުގެ ސަބަބުންނެވެ.
އެ ގޮތުން، 2018 ވަނަ އަހަރު އެންމެ ފަހުން މި މުބާރާތް ބޭއްވީ ޖަޕާންގެ ގިފޫގަ އެވެ. އެ ފަހަރު ރާއްޖެއިން މި މުބާރާތުގައި ވާދަކުރީ އައިޝަތު ހިމްނާ ހަސަން އާއި މުހައްމަދު ނާއިލް އެވެ.
