މެޑްރިޑް (މެއި 3) - ސްޕެނިޝް ލީގުގައި ރޭ ރެއާލް މެޑްރިޑް ކުޅުނު މެޗުން ރެއާލް ސޮސިއެޑާޑް އަތުން 2-0 އިން ބަލިވިއިރު، އޮސަސޫނާ އަތުން 1-0 އިން މޮޅުވި، ބާސެލޯނާ އަށް ދެން ކުޅޭ މެޗުގައި ލީގު ޗެމްޕިއަންކަން ހޯދުމުގެ ފުރުސަތު ފަހިވެއްޖެ އެވެ.
ބާސެލޯނާ އެއް ވަނައިގައި އޮތީ 33 މެޗުން 82 ޕޮއިންޓާ އެކު އެވެ. ދެ ވަނައިގައި އޮތް ރެއާލަށް ވަނީ 33 މެޗުން 68 ޕޮއިންޓް ލިބިފަ އެވެ. މި މަހު 14 ވަނަ ދުވަހު ބާސެލޯނާ އިން އެސްޕަންޔޯލާ ދެކޮޅަށް ކުޅޭ މެޗުން މޮޅުވެއްޖެނަމަ ލީގު ޗެމްޕިއަން ކަށަވަރުކުރެވޭނެ އެވެ. ބާސެލޯނާ އިން އެންމެ ފަހުން ލީގު ކާމިޔާބުކުރީ 2018-2019 ވަނަ އަހަރުގެ ސީޒަނުގަ އެވެ.
ރޭ ބާސެލޯނާ ދަނޑުގައި އޮސަސޫނާ އިން މެޗުގެ ބޮޑުބައި ކުޅުނީ ކުޅުންތެރިއަކު މަދުކޮށެވެ. އެއީ މެޗުގެ 25 ވަނަ މިނިޓްގައި ބާސެލޯނާގެ ޕެޑްރީ އަށް ކުރި ފައުލަކަށް އޮސަސޫނާގެ ޖޯޖް ހެރާންޑޯ އަށް ސީދާ ރަތް ކާޑެއް ދެއްކުމުންނެވެ. މެޗުން ބާސެލޯނާ މޮޅުކޮށްދިން ގޯލު ޖެހީ 85 ވަނަ މިނިޓްގައި ޖޯޑީ އަލްބާ އެވެ. މިއީ ފްރެންކީ ޑި ޔޯން ދިން ބޯޅައަކުން އަލްބާ ޖެހި މޮޅު ގޯލެކެވެ.
މި މެޗުގައި ވެސް ބާސެލޯނާ ކޮޅަށް ގޯލެއް ނުވަދެ، ނިމުނުއިރު، މިއީ އެ ގޮތަށް މި ފަހަރުގެ ލީގުގައި ބާސެލޯނާ އިން ނިންމާލި 25 ވަނަ މެޗެވެ. މިއީ ސްޕެނިޝް ލީގުގެ އެއް ސީޒަނަށް ބަލާނަމަ ރެކޯޑެކެވެ.
ސޮސިއެޑާޑް ދަނޑުގައި އެ ޓީމުން ވަނީ ދެ ވަނަ ހާފް ފެށުނުތަނުން ގޯލެއް ޖަހައި، ލީޑުނަގައިފަ އެވެ. މިއީ ރެއާލްގެ އެޑާ މިލިޓާއޯ ފަހަތަށް ދިން ބޯޅައެއް ހޯދައި، ސޮސިއެޑާޑްގެ ޖަޕާން މިޑްފީލްޑަރު، ޓަކެފޫސާ ކޫބޯ ޖެހި ގޯލެކެވެ. މި މެޗުގައި ރެއާލަށް ކުރިއަށްދާން މައްސަލަ ދިމާވީ 61 ވަނަ މިނިޓްގައި ޑެނީ ކާވަހާލް އަށް ދެ ވަނަ ރީނދޫ ކާޑާ އެކު ރަތް ކާޑު ދެއްކުމުންނެވެ.
ރެއާލްގެ ކުޅުންތެރިއަކު މަދުވުމުގެ ފައިދާނަގައި، މެޗުގެ 85 ވަނަ މިނިޓްގައި ސޮސިއެޑާޑް އިން ދެ ވަނަ ގޯލެއް ޖެހި އެވެ. މިއީ ޑޭވިޑް ސިލްވާ ދިން ބޯޅައަކުން އެންޑަ ބަރަނެޓްސޭއާ ޖެހި ގޯލެކެވެ.
ރޭގެ މެޗުގައި ރެއާލުން ކުޅެފައިވަނީ ކެޕްޓަން ކަރީމް ބެންޒެމާގެ އިތުރުން، ވިނީޝިއުސް ޖޫނިއާ އާއި ލޫކަ މޮޑްރިޗް އަދި ޑޭވިޑް އަލަބާ ނުލަ އެެވެ. އަންނަ ހަފްތާގައި ރެއާލަށް ސްޕެނިޝް ކަޕް ފައިނަލާއި ޗެމްޕިއަންސް ލީގުގެ ފައިނަލް މެޗު އޮންނާނެ އެވެ.
