ޕެރިސް (އޭޕްރީލް 30) - ފްރެންޗް ލީގުގައި މިރޭ އަޝްރަފް ހަކީމީ އަށް ދެއްކި ރަތް ކާޑާ އެކު މެޗުގެ ބޮޑުބައި އެއް ކުޅުންތެރިއަކު މަދުކޮށް ކުޅުނު ޕީއެސްޖީ އަމިއްލަ ދަނޑުގައި 3-1 އިން ލޮރިއެންޓް އަތުން ބަލިވެއްޖެ އެވެ.
މި ނަތީޖާއާ އެކު ވެސް ޕީއެސްޖީ ލީގުގެ އެއް ވަނައިގައި އޮތީ އަށް ޕޮއިންޓުގެ ލީޑަކާ އެކު އެވެ. ޕީއެސްޖީ އަށް 33 މެޗުން 75 ޕޮއިންޓް ލިބިފައިވާއިރު، ދެ ވަނައިގައި އޮތް މާސޭ އަށް ވަނީ 32 މެޗުން 67 ޕޮއިންޓް ލިބިފަ އެވެ. މާސޭ އިން މެޗު ހަމަކުރާއިރު، ޕީއެސްޖީގެ ލީޑު ފަސް ޕޮއިންޓަށް ކުޑަކުރުމުގެ ފުރުސަތު އެބައޮތެވެ.
ޕީއެސްޖީ ދަނޑުގައި މިރޭ ކުޅުނު މެޗުގެ 15 ވަނަ މިނިޓްގައި ލޮރިއެންޓްގެ އެންޒޯ ލީ ފޭ ވަނީ ޕީއެސްޖީ އޭރިއާތެރެއިން ލިބުނު ފުރުސަތުން ގޯލަށް ބޯޅަ ފޮނުވާލައިފަ އެވެ. މެޗުގެ ފަސް ވަނަ މިނިޓާއި 20 ވަނަ މިނިޓްގައި އަޝްރަފް ހަކީމީ އަށް ދެ ރީނދޫ ކާޑު ދައްކައި، ރަތް ކާޑެއް ދެއްކިއިރު، މެޗުގެ ބޮޑުބައި ޕީއެސްޖީން ކުޅެން ޖެހުނީ އެއް ކުޅުންތެރިއަކު މަދުކޮށެވެ.
އެހެން ނަމަވެސް އެއް ކުުޅުންތެރިއަކު މަދުވިތާ ނުވަ ވަރަކަށް މިނިޓް ފަހުން، ކީލިއަން އެމްބާޕޭ ވަނީ ގޯލެއް ޖަހައި ޕީއެސްޖީ އަށް އެއްވަރުކޮށްދީފަ އެވެ. މިއީ ލޮރިއެންޓްގެ ކީޕަރު، ޔްވޯން މްވޯގޯ ހެދި ބޮޑު ގޯހެއްގެ ފައިދާނަގައި އެމްބާޕޭ ޖެހި ގޯލެކެވެ.
އެކަމަކު، ފުރަތަމަ ހާފު ނިމުމުގެ ކުރިން ލޮރިއެންޓުން އަނެއްކާ ވެސް ލީޑު ނެގި އެވެ. މި ލަނޑު ޖެހީ 39 ވަނަ މިނިޓްގައި ޑާލިން ނޮންގްވާ އެވެ. ދެ ވަނަ ހާފުގައި ލޮރިއެންޓުން ވަރަށް ރަނގަޅަށް ޑިފެންސްކޮށް، މެޗު ނިމުމުގެ ކުރިން އިތުރު ގޯލެއް ވެސް ޖެހި އެވެ. މެޗުގެ 88 ވަނަ މިނިޓްގައި މި ލަނޑު ޖެހީ ބަމްބާ ޑިއެންގް އެވެ.
މިއީ 2023 ވަނަ އަހަރު ފެށި ފަހުން، ލީގުގައި ބަލިވި ހަ ވަނަ މެޗެވެ. ފަހަކަށް އައިސް ޕީއެސްޖީގެ ނަތީޖާތަށް ނުކުންނަ ގޮތުން، މި ސީޒަނަށް ފަހު އެ ޓީމުގެ ކޯޗުގެ މަގާމަށް ބަދަލު އައުން އެކަށީގެންވާ ކަމަށް ރިޕޯޓްތައް ބުނެ އެވެ. ޕީއެސްޖީގެ ކޯޗުގެ މަގާމުގައި ހުރި ކްރިސްޓޮފް ގަލްޓިއޭ އެ ޓީމުން ވަކިކޮށްފިނަމަ، އެ މަގާމު ރޯމާގައި ހުރި ހޯސޭ މޮރީނިއޯ ނޫނީ މި ވަގުތު ޓީމަކާ ހަވާލުނުވެ ހުރި ކޯޗު ޒިނެދިން ޒިދާނަށް ހުށަހެޅުމުގެ ފުރުސަތު އެބައޮތް ކަމަށް ފްރާންސް ނޫސްތަކުން އަންނަނީ ރިޕޯޓްކުރަމުންނެވެ.
