ރޯމް (އޭޕްރީލް 30) - އިޓާލިއަން ލީގުގައި ރޭ މެޗުގެ އިތުރު ވަގުތުގައި ފެނުނު ގޯލުތަކާ އެކު އޭސީ މިިލާނާއި ރޯމާ ބައްދަލުކުރި މެޗު 1-1 އިން އެއްވަރުވެއްޖެ އެވެ.
މި ނަތީޖާއާ އެކު ދެ ޓީމަށް ވެސް ގަދަ ހަތަރެއްގެ ރޭހުގައި ހަމަޖެހުމެއް ނުލިބޭނެ އެވެ. ހަތަރެއް ވަނައިގައި އޮތް މިލާނާއި ފަސް ވަނައިގައި އޮތް ރޯމާ އަށް ވަނީ 32 މެޗުން 57 ޕޮއިންޓް ލިބިފަ އެވެ. ޓޮރިނޯ އަތުން ރޭ 2-1 އިން މޮޅުވި، އެޓަލަންޓާ ވަނީ 32 މެޗުން 55 ޕޮއިންޓް ހޯދައި، ލީގުގެ ހަ ވަނަ އަށް ޖެހިލައިފަ އެވެ.
ހަތް ވަަނައިގައި އޮތް އިންޓަ އަށް 31 މެޗުން 54 ޕޮއިންޓް ލިބިފައިވާއިރު، އެ ޓީމު މިއަދު ލާޒިއޯ އަތުން މޮޅުވެއްޖެނަމަ ހަތަރު ވަނަ އަށް އެރޭނެ އެވެ. ލާޒިއޯ ލީގުގެ ދެ ވަނައިގައި އޮތީ 31 މެޗުން 61 ޕޮއިންޓާ އެކު އެވެ.
ރޯމްގެ އޮލިމްޕިކް ސްޓޭޑިއަމްގައި ރޭ ކުޅުނު މެޗުގެ 30 ވަނަ މިނިޓްގައި މިލާންގެ ރަފައެލް ލެއާއޯ ޖެހި ބޯޅަ ވަނީ ހުރަސްދަނޑިމަތިން ގޮސްފަ އެވެ. އޭގެ ދެ މިނިޓް ފަހުން، ރޯމާގެ ލޮރެންޒޯ ޕެލެގްރީނީ ޖެހި ބޯޅަ މިލާންގެ ކީޕަރު މަައިކް މައިންގްނޯން ވަނީ މަތަކޮށްފަ އެެވެ. ރީބައުންސް ބޯޅަ ރޯމާގެ ކުޅުންތެރިންނަށް ލިބުނު ނަމަވެސް ރަނގަޅަށް ފޮނުވައިނުލެވުނެވެ.
މެޗުގެ އިތުރު ވަގުތުގެ ގޮތުގައި ދެއްކި ހަ މިނިޓްގެ ތެރެއިން ތިން ވަނަ މިނިޓްގައި ރޯމާ އިން ވަނީ ލީޑުނަގައިފަ އެވެ. އޭރިއާތެރެއިން ރޯމާގެ ޓަމީ އަބްރަހަމް އަށް ލިބުނު ފުރުސަތުގައި އޭނާ ތިރިތިރިން ޖެހި ބޯޅަ އަމާޒުވީ ގޯލުގެ ދުރު ކަނަށެވެ.
އިތުރު ވަގުތުގެ ހަ މިނިޓް ހަަމަވެ، އިތުރަށް ކުޅުނު ވަގުތުގެ ތެރޭގައި މިލާނަށް އެއްވަރުކޮށްދިން ގޯލު ޖެހީ އަލެކްސިސް ސަލަމޭކާ އެވެ. ލެއާއޯ ނެގި ހުރަހަކަށް ހުސްކޮށް އަރައި، ސަލަމޭކާ ޖެހި ބޯޅަ ގޯލަށް ވަނީ ރޯމާ ކީޕަރު ރުއީ ޕެޓްރީޝިއޯ އަތުގައި ޖެހިފަ އެވެ.
މެޗަށް ފަހު ރޯމާގެ ކޯޗު ހޯސޭ މޮރީނިއޯ ބުނީ މެޗު ނިމިގެންދިޔައީ އަތުގައި އޮތް ޕޮއިންޓްތަކެއް ގެއްލިގެން ކަމަށާއި އެހެން ނަމަވެސް އެ ކަމާ މާޔޫސްވުމަށް ވުރެ ބޮޑަށް މުހިންމު ކުޅުންތެރިންތަކެއް ނުލައި، މި މެޗުގައި ރޯމާ އިން ދެއްކި ކުޅުމާ މެދު ހިތްހަމަޖެހޭ ކަމަށެވެ.
