ބާސެލޯނާ (އޭޕްރީލް 29) - ލިއޮނަލް މެސީ އަލުން ބާސެލޯނާ ގެނެވޭތޯ އެ ކުލަބުން މަސައްކަތް ކުރަމުން އަންނަ ކަމަށް ބާސެލޯނާގެ ކޯޗު ޒަވީ ހެނާންޑޭޒް ޔަގީންކޮށްދީފި އެވެ.
މީގެ ދެ އަހަރު ކުރިން، މެސީ، 35، ބާސެލޯނާ ދޫކޮށްލަން ޖެހުނީ އެ ކްލަބްގެ މާލީ ހާލަތު އަޑިއަޅާލާފައި އޮތް ދަނޑިވަޅެއްގައި ކޮންޓްރެކްޓް އާ ކުރެވޭނެ އެއް ގޮތެއް ވެސް ނުހޯދުމުންނެވެ. އެ ފަހަރު، މެސީ ޕީއެސްޖީ އަށް ބަދަލުވީ ދެ އަހަރުގެ ކޮންޓްރެކްޓެއްގަ އެވެ. އެ އެއްބަސްވުން މި ސީޒަނުގެ ނިޔަލަށް ހަމަވާނެ އެވެ.
މެސީ ބާސެލޯނާ އަށް ބަދަލުވާން އުޅޭކަމުގެ އަޑުތައް ގަދަވެފައި މި ވަނީ އޭނާ ގެނައުމަށް މަސައްކަތްކުރަމުން އަންނަ ކަމަށް އެކުލަބުގެ ނައިބު ރައީސް ރަފައެލް ޔޫސްޓޭ ވިދާޅުވެފައި ވަނިކޮށެވެ. ދާދި ފަހުން، ބާސެލޯނާގައި މެސީ، އޭނާގެ އާއިލާ އެކު އުޅޭ މަންޒަރުތަކެއް ވެސް ވަނީ ސޯޝަލް މީޑިއާގައި އާންމުވެފަ އެވެ.
ބާސެލޯނާގެ ތާރީހުގައި އެންމެ ގިނަ ގޯލު އެ ޓީމަށް ޖަހައިދިން ފޯވާޑް އަލުން އެ ކުލަބަށް ގެނައުމަށް ކުރާ މަސައްކަތުގެ ވާހަކަ އެންމެ ފަހުން ދައްކާފައިވަނީ ކޯޗު ޒަވީ އެވެ.
ޒަވީ ބުނީ ބާސެލޯނާގެ ބޯޑުން މެސީ ގެނައުމުގެ މަސައްކަތް ކުރަމުން އަންނަ ކަމަށެވެ.
ޒަވީ ބުނީ މި ވަގުތު ކުލަބަށް މުހިންމީ މި ސީޒަންގެ ލީގު ކާމިޔާބުކުރުން ކަމަށާއި، އޭނާގެ ފޯކަސް ހުރީ އެކަމަށް ކަމަށެވެ. އަންނަ ސީޒަނަށް ކުލަބު ވަރުގަދަކުރުމާ ގުޅޭގޮތުން ކުލަބުގެ ވެރިން މަޝްވަރާތައް ކުރަމުން އަންނަ ކަމަށާއި، އެކަންކުރުމަށް ފުރަތަމަ ބޭނުންވަނީ ކުލަބުގެ މާލީ ހާލަތު ރަނގަޅު ކުރުން ކަމަށް ވެސް ޒަވީ ބުނެފައިވެ އެވެ. އެހެންކަމުން އިންވެސްޓަރުން ހޯދަައި ކުޑަ އަގުގައި ކުލަބަށް ގެނެވޭނެ ކުޅުންތެރިން ހޯދައި ދިރާސާ ކުރަމުން އަންނަކަމަށް އޭނާ ބުންޏެވެ.
އޭނާ ބުނީ ކުލަބުގެ މާލީ ހާލަތު ރަނގަޅުވެ މުސާރައިގެ ކަންކަން ހަމަޖެހުމުގައި އެންމެ މުހިންމު އެއް ކަމަކަށް ކުރިއަށް އޮތީ ލީގު ކާމިޔާބުކުރުން ކަމަށާއި، އެކަން ކާމިޔާބުކޮށްގެން ނޫނީ މެސީ ކަހަލަ ކުޅުންތެރިއެއް ގެނައުމާ ގުޅޭގޮތުން ތަފްސީލީ މަޝްވަރާއެއް ކުރުން އަވަސް ކަމަށެވެ.
މެސީ އަލުން ބާސެލޯނާ އަށް ދާން އުޅޭ ވާހަކަތައް މީޑިއާގައި ދެކެވުމާ އެކު، ޕީއެސްޖީގެ ވެރިން ވެސް އަންނަނީ މެސީއަށް އާ ކޮންޓްރެކްޓެއް ދިނުމުގެ މަޝްވަރާތައް ކުރިއަށްގެންދިޔުމަށް ތައްޔާރު ވަމުންނެވެ. ނަމަވެސް ދުނިޔޭގެ އެންމެ މޮޅު ކުޅުންތެރިޔާގެ މަގާމް އެންމެ ފަހުން ހޯދި މެސީ ހުރީ ޕީއެސްޖީގެ ކޮންޓްރެކްޓް އާ ކުރުމުގެ ވިސްނުމެއްގައެއް ނޫނެވެ. އެންމެ ބޮޑު ސަބަބަކީ އެކުލަބުގައި އޭނާއަށް އޮތް ރޯލު ނުވަތަ ނުފުޒޫ ކުޑަވުމެވެ.
ޕީއެސްޖީން އެންމެ ބޮޑު އިސްކަމެއްދެނީ ފްރާންސްގެ ފޯވާޑް ކީލިއަން އެމްބާޕޭ ބޭނުންވާ ކަންކަން ފުރިހަމަ ކުރުމަށެވެ.
