އުޒްބެކިސްތާންގެ ޓަޝްކެންޓްގައި ކުރިއަށްދާ އޭޝިއާގެ ޔޫތު މުބާރާތުގައި ވާދަކުރާ ރާއްޖޭގެ ގައުމީ އެތުލީޓު، އަހްނާ ނިޒާރު، އަންހެނުންގެ 100 މީޓަރު ދުވުމުގެ ޔޫތު ރެކޯޑް މުގުރާލައިފި އެވެ.
އެ ގޮތުން، 100 މީޓަރު ދުވުމުގެ ސެމީ ފައިނަލުގައި ދުވެ، އަހްނާ ރޭސް ނިންމީ 12.50 ސިކުންތުންނެވެ. މި އިވެންޓްގެ ގައުމީ ރެކޯޑް އިއްޔެއާ ހަމައަށް އޮތީ, މަރިޔަމް ރޫޔާ އަލީ އަތުގަ އެވެ. މީގެ ހަތް މަހެއްހާ ދުވަސް ކުރިން ރޫޔާ މި ރެކޯޑް ހެދީ, ކުވޭތުގައި ކުރިއަށްދިޔަ އޭޝިއާގެ 18 އަހަރުން ދަށަށް ހާއްސަ ޔޫތު އެތުލެޓިކްސް މުބާރާތުގަ އެވެ. އެއީ 12.52 ސިކުންތުން ރޭސް ނިންމައިގެންނެވެ.
ހދ. ކުޅުދުއްފުށްޓަށް ނިސްބަތްވާ 15 އަހަރުގެ އަހްނާ އަންނަނީ އެތުލެޓިކްސްގައި ގިނަ ކާމިޔާބީތަކެއް ހޯދަމުންނެވެ. އެ ގޮތުން ޒުވާން އުމުރެއްގައި ބައިނަލްއަގުވާމީ މުބާރާތްތަކުގައި ވާދަކޮށް ފާހަގަކޮށްލެވޭ ކުރިއެރުންތަކެއް އަންނަނީ ހޯދަމުންނެވެ.
އެ ގޮތުން, އަހްނާ ވަނީ މިދިޔަ ފެބްރުއަރީ މަހު ކަޒަކިސްތާންގެ އަސްތާނާގައި ކުރިއަށްދިޔަ 10 ވަނަ އޭޝިއަން އިންޑޯ އެތުލެޓިކްސް ޗެމްޕިއަންޝިޕްގައި ވެސް ވާދަކޮށް ރަނގަޅު ކުރިއެރުމެއް ހޯދައިފަ އެވެ. އޭޝިއަން އިންޑޯ ޗެމްޕިއަންޝިޕްގެ 60 މީޓަރު ދުވުމުގެ ހީޓު ދޭއްގައި ވާދަކޮށް, 7.89 ސިކުންތުން ރޭސް ނިންމައިގެން އަހުނާ ގައުމީ ރެކޯޑު ހެދި އެވެ. އޭގެ ކުރިން މި ރެކޯޑު އޮތީ 2008 ވަނަ އަހަރު ގަތަރުގެ ވެރިރަށް ދޯހާގައި ކުރިއަށްދިޔަ އޭޝިއަން އިންޑޯ ޗެމްޕިއަންޝިޕްގައި ދުވި ޖައުނާ އަބްދުﷲ ނާފިޒު އަތުގަ އެވެ. އެ ފަހަރު ޖައުނާ ރެކޯޑު ހެދީ 8.30 އިން ދުވެގެންނެވެ.
އެކަމަކު, އަހްނާ, އެ ރެކޯޑް ހެދިތާ ހަތް މިނިޓް ފަހުން ރޫޔާ ވަނީ އެ ރެކޯޑް މުގުރާލައިފަ އެވެ. ހީޓު ތިނެއްގައި ވާދަކޮށް ރޫޔާ ވަނީ 7.66 ސިކުންތުން ދުވެ، އަހުނާގެ ރެކޯޑު މުގުރާލައިފަ އެވެ. މިއީ ބައިނަލް އަގުވާމީ މުބާރާތެއްގައި މި ފަދަ ގޮތަކަށް, މިހާ ގާތްގާތުގައި އެއް އިވެންޓެއްގެ ރެކޯޑެއް މުގުރާލި ފުރަތަމަ ފަހަރެވެ.
