އުޒްބެކިސްތާންގެ ޓަޝްކެންޓްގައި އިއްޔެ ފެށި އޭޝިއާގެ ޔޫތު މުބާރާތުގައި ވާދަކުރާ ރާއްޖޭގެ ގައުމީ އެތުލީޓު، އަހްނާ ނިޒާރު، 100 މީޓަރު ދުވުމުން ސެމީ ފައިނަލަށް ދަތުރުކޮށްފި އެވެ.
މި މަހު 27-30 އަށް ކުރިއަށްދާ މި މުބާރާތުގެ 100 މީޓަރު ދުވުމުގައި އިއްޔެ އަހްނާ ވާދަކުރީ ހީޓު އެކެއްގަ އެވެ. ޖުމްލަ ހަތް އެތުލީޓުން ވާދަކުރި އެ ހީޓުގެ ހަތަރު ވަނައިގައި އަހްނާ ނިންމިއިރު، އޭނާގެ ޓައިމިން އަކީ 12.93 ސިކުންތެވެ. ހީޓުގެ އެއް ވަނަ ހޯދި ހޮންކޮން ޗައިނާގެ އެތުލީޓު، ލިޒް ޓީސްޒް ސޯގެ ޓައިމިން އަކީ 12.35 ސިކުންތެވެ.
އަހްނާ އަށް ސެމީ ފައިނަލުން ފުރުސަތު ލިބުނީ މި އިވެންޓްގައި ދުވި ހަތަރު ހީޓުގެ ޖުމްލަ ޓައިމިން އަށް ބަލައިގެންނެވެ.
މިއީ ކުރިއެރުން ހޯދަމުން އަންނަ ޒުވާން ދުވުންތެރިޔާ، އަހްނާ މި އަހަރު ވާދަކުރާ ބައިނަލްއަގުވާމީ ދެ ވަނަ މުބާރާތެވެ. އަހްނާ، 15، ވަނީ މިދިޔަ ފެބްރުއަރީ މަހު ކަޒަކިސްތާންގެ އަސްތާނާގައި ކުރިއަށްދިޔަ 10 ވަނަ އޭޝިއަން އިންޑޯ އެތުލެޓިކްސް ޗެމްޕިއަންޝިޕްގައި ވެސް ވާދަކޮށް ރަނގަޅު ކުރިއެރުމެއް ހޯދައިފަ އެވެ.
އޭޝިއާ ޔޫތު މުބާރާތުގެ 400 މީޓަރު ދުވުުމުގެ އިވެންޓްގައި ރާއްޖޭގެ އެތުލީޓު ޒިވާ މޫސާ ޝަފީއު ވާދަކުރި އެވެ. ހަތް އެތުލީޓުން ވާދަކުރި ހީޓު ދޭކުން ޒިވާ ދިޔައީ ފަސް ވަނަ އެވެ. ޒިވާގެ ޓައިމިން އަކީ 1 މިނިޓް 00.49 ސިކުންތެވެ. ފައިނަލް ބުރަށް ދިޔައީ ދެ ހީޓް އޮތްއިރު، ކޮންމެ ހީޓެއްގެ ގަދަ ހަތަރެކެވެ.
ފިރިހެނުންގެ 400 މީޓަރު ދުވުމުގެ ބައިގައި ރާއްޖޭގެ ޒުއިޒް މުހައްމަދު ސުއާދު ވާދަކުރި އެވެ. އަށް ދުވުންތެރިން ވާދަކުރި ހީޓު ދޭކުން ޒުއިޒް ދިޔައީ ފަސް ވަނަ އެވެ. ޒުއިޒްގެ ޓައިމިން އަކީ 51.99 ސިކުންތެވެ. މި ހީޓުގެ އެއް ވަނަ އަށް ދިޔަ އިންޑިއާގެ ޝަރަން މެގްވަރްނަންގެ ޓައިމިން އަކީ 48.36 ސިކުންތެވެ.
