ނިއު ދިއްލީ، އިންޑިއާ (އޭޕްރީލް 26) - މި ފަހަރުގެ އިންޑިއަން ޕްރިމިއާ ލީގު (އައިޕީއެލް)، ފްރެންޗައިސް ކްރިކެޓް ލީގަކީ ޗެންނާއީ ސުޕަ ކިންގްސް އަށް ކުޅެމުން އަންނަ ކްރިކެޓް ލެޖެންޑް، މަހިންދުރަ ސިންގް ދޯނީގެ ފަހު މުބާރާތަށް ވެދާނެ ކަމަށް މީޑިއާ ރިޕޯޓްތައް ބުނެފި އެވެ.
އުމުރުން 41 އަހަރުގެ ލެޖެންޑަރީ ތަރި، ދޯނީ މި ސީޒަނަށް ފަހު ރިޓަޔާކުރުމުގެ ފުރުސަތު އޮތް ކަމަށް ޗެންނާއީ ސުޕަ ކިންގްސްގެ އޮފިޝަލަކު ވަނީ މީޑިއާ އިން ކުރި ސުވާލަކަށް ޖަވާބު ދެމުން ބުނެފަ އެވެ.
މިދިޔަ ފެބްރުއަރީ މަހުން ފެށިގެން އިންޑިއާގެ މީޑިއާގައި ދޯނީ މި ފަހަރު އައިޕީއެލް ސީޒަނަށް ފަހު، ކުޅުން ހުއްޓާލަން އުޅޭ ވާހަކަ ދެކެވެމުން އައި ކަމުގައި ވިޔަސް، އެ ކަމާ ބެހޭގޮތުން ދޯނީ މީޑިއާގައި ރަސްމީކޮށް ވާހަކަ ދައްކައިފައިނުވެ އެވެ.
އިންޑިއާ ކްރިކެޓް ޓީމުގެ ކެޕްޓަން، އަދި އައިޕީއެލްގައި މުމްބާއީ އިންޑިއަންސް އަށް ކުޅެމުން އަންނަ ރޯހިތު ޝަރްމާ ބުނީ ކޮންމެ އައިޕީއެލް ސީޒަނެއް ފަށާއިރު ވެސް ދޯނީ ރިޓަޔާކުރަން އުޅޭ ވާހަކަ މީޑިއާގައި ދެކެވޭ ކަމަށެވެ. އެކަމަކު، އުމުރަކީ ހަމައެކަނި ނަމްބަރެއްކަން ސާބިތުކޮށްދެނީ އައިޕީއެލްގެ މެޗުތަކުގައި ދޯނީ ދައްކާ މޮޅު ކުޅުމުން ކަން ވެސް ރޯހިތުގެ ވާހަކައިގައި ވަނީ ފާހަގަކޮށްފަ އެވެ.
މީގެ ތިން އަހަރު ކުރިން، އިންޓަނޭޝަނަލް ކްރިކެޓުން ރިޓަޔާކުރި ދޯނީ ވަނީ ޗެންނާއީ ޓީމާ އެކު ހަތަރު ފަހަރެއްގެ މަތިން އައިޕީއެލް ކާމިޔާބުކޮށްފަ އެވެ. އެއީ 2010،2011، 2018 އަދި 2021 ވަނަ އަހަރު އެވެ.
އަައިޕީއެލްގެ އެންމެ ކާމިޔާބު ޓީމަކީ މުމްބާއީ އިންޑިއަންސް އެވެ. ޗެންނާއީ އަށް ވުރެ މުމްބާއީގެ ގިނައީ ފަސް ތަށި ހޯދާފައިވާތީ މުމްބާއީ އެވެ.
ބައެއް މީޑިއާ ރިޕޯޓްތައް ބުނާގޮތުން، ދޯނީ މި ސީޒަނަށް ފަހު ރިޓަޔާކުރާނީ ޗެންނާއީ ޓީމަށް އައިޕީއެލް ލިބޭނަމަ އެވެ. ޖުމްލަ 10 ޓީމު ވާދަކުރާ އައިޕީއެލްގެ މި ސީޒަނުގެ މިހާތަނަށް އެއް ވަނައިގައި އޮތީ ޗެންނާއީ ޓީމެވެ. އެއީ ޖުމްލަ ހަތް މެޗު ކުޅެގެން ފަސް މޮޅު ހޯދައިގެންނެވެ.
ރިޕޯޓްތައް ބުނާގޮތުން، މި ފަހަރުގެ އައިޕީއެލް ސީޒަން ނިމުމާ އެކު ދޯނީ ރިޓަޔާމަންޓް އިއުލާނުކުރާނެ އެވެ.
