މެޑްރިޑް (އޭޕްރީލް 23) - މި ވަގުތު ރަނގަޅު ފޯމެއްގައި ހުރި ރެއާލް މެޑްރިޑްގެ ވިންގް، މާކޯ އަސެންސިއޯ ޖެހި ގޯލާ އެކު، އެ ޓީމުން 2-0 އިން ސެލްޓަ ވީގޯ އަތުން ރޭ މޮޅުވެއްޖެ އެވެ.
މި މޮޅާ އެކު، ލީގުގެ ދެ ވަނައިގައި އޮތް ރެއާލުން ވަނީ އިތުރަށް އެއް މެޗު ކުޅެގެން، ލީގުގެ އެއް ވަނައިގައި އޮތް ބާސެލޯނާއާ އަށް ޕޮއިންޓަށް ގާތަށް ޖެހިލައިފަ އެވެ. ބާސެލޯނާ އެއް ވަނައިގައި އޮތީ 29 މެޗުން 73 ޕޮއިންޓާ އެކު އެވެ. ދެ ވަނައިގައި އޮތް ރެއާލަށް ވަނީ 30 މެޗުން 65 ޕޮއިންޓް ލިބިފަ އެވެ.
ރެއާލް ދަނޑުގައި ރޭ ކުޅުނު މެޗުގެ 42 ވަނަ މިނިޓްގައި އެ ޓީމަށް ލީޑުނަގައިދިނީ މާކޯ އަސެންސިއޯ އެވެ. ފަހަކަށް އައިސް ރަނގަޅު ފޯމެއްގައި ކުޅެމުން އަންނަ އަސެންސިއޯ މި ލަނޑު ޖެހީ ވިނީޝިއުސް ޖޫނިއާ ދިން ބޯޅައަކުންނެވެ. އެ ގޮތުން، ވިނީޝިއުސް ނެގި ބޯޅަ އަސެންސިއޯ ވަނީ ގޯލުގެ މަތީ ކަނަށް ފޮނުވާލައިފަ އެވެ.
އަސެންސިއޯ ވަނީ 2023 ވަނަ އަހަރު ފެށި ފަހުން، ރެއާލަށް ހުރިހާ މުބާރާތެއްގައި އަށް ގޯލު ޖަހައިފަ އެވެ. އެ މުއްދަތުގެ ތެރޭގައި ސްޕެއިންގެ ކުޅުންތެރިންގެ ތެރެއިން ޔޫރަޕްގައި އެންމެ ރަނގަޅު ފޯމެއްގައި ހުރި ވިންގް އަކީ އަސެންސިއޯ އެވެ.
މެޗުގައި ރެއާލުން ޖެހި ދެ ވަނަ ލަނޑު ކާމިޔާބުކުރީ ދެ ވަނަ ހާފުގެ ކުޅުން ފެށިގެން ދެ މިނިޓް ތެރޭގަ އެވެ. މިއީ ކޯނަރަކުން އަސެންސިއޯ ނަގައިދިން ހުރަހުން، އެޑާ މިލިޓާއޯ ފުންމައިގެން އަރައި، ގޯލުގެ ތިރީ ކަނަށް ބޮލުން ބޯޅަ ފޮނުވާލައިގެން ޖެހި ގޯލެކެވެ.
ރެެއާލަށް މި މެޗުގައި ގޯލެއް ޖަހައިދޭން ކަރިމް ބެންޒެމާ އާއި އައުރެލިން ޗުއަމެނީ ޖެހި ބޯޅަތައް ގޯލާ ނުރައްކާ ނުވެ ދިޔައިރު، ސެލްޓަ ވީގޯގެ އިޔާގޯ އަސްޕާސް ޖެހި ބޯޅަ ރެއާލްގެ ކީޕަރު ތިބައު ކޯޓުއާ ވަނީ މަތަކޮށްފަ އެވެ.
