މެޑްރިޑް (އޭޕްރީލް 23) - ލިވަޕޫލް ދޫކޮށްލަން ނިންމާފައިވާކަން އިއުލާނުކޮށްފައިވާ ބްރެޒިލްގެ ފޯވާޑް ރޮބާޓޯ ފިރްމީނޯގެ ސޮއި ހޯދަން ބާސެލޯނާ އާއި ރެއާލް މެޑްރިޑުން ޝައުގުވެރިވާ ކަމަށް ސްޕެއިނުގެ މީޑިއާ ރިޕޯޓްތައް ބުނެފި އެވެ.
ފިރްމީނޯ، 31، އާ އެކު ލިވަޕޫލުން ހަދާފައިވާ ކޮންޓްރެކްޓް މި ސީޒަނުގެ ނިޔަލަށް ހަމަވާނެ އެވެ. ހިލޭ ޓްރާންސްފާއެއްގައި އެހެން ޓީމަކާ ގުޅުމުގެ ޝައުގުވެރިކަން ހުރި ކަމަށް ބުނެ، ފިރްމީނޯ ވަނީ ލިވަޕޫލުން އަންނަ ސީޒަނުގައި ނުފެންނާނެ ކަމަށާއި އެ ޓީމު ދޫކޮށްލުން މިއީ ކެރިއަރުގައި އެންމެ އުނދަގޫ އެއް ނިންމުން ކަމަށް ހާމަކޮށްފަ އެވެ.
ސްޕެއިނުގެ މީޑިއާ ރިޕޯޓްތައް ބުނާގޮތުން ފިރްމީނޯގެ ސޮއި ހޯދަން ރެއާލާއި ބާސެލޯނާ އިން ބޭނުންވެ އެވެ. އެ ގޮތުން، ރެއާލުން ކަރިމް ބެންޒެމާގެ ބެކަޕަކަށް ސްޓްރައިކަރެއް ހޯދުމުގެ ވިސްނުމުގައި ފިރްމީނޯ ގެންނަން ބޭނުންވާއިރު، ބާސެލޯނާ އިން އަންނަނީ ރޮބަޓް ލެވަންޑޯސްކީގެ ބަދަލުގައި އެރުވޭނެ ފެންވަރު ރަނގަޅު ފޯވާޑެއް ހޯދަން މަސައްކަތް ކުރަމުންނެވެ. ބާސެލޯނާ އިން ވަނީ ފިރްމީނޯގެ އޭޖެންޓާ އެކު މަޝްވަރާތަކެއް ވެސް ބާއްވައިފަ އެވެ.
ބްރެޒިލް ގައުމީ ޓީމަށް ވެސް ކުޅޭ ފިރްމީނޯ ހޯދަން އިޓަލީ އާއި ސައުދީ އަރަބިއްޔާގެ ކްލަބްތަކުން ވެސް ޝައުގުވެރިވެ އެވެ.
ފިރްމީނޯ، ލިވަޕޫލާ ގުޅުނީ 2015 ވަނަ އަހަރު ޖަރުމަނުގެ ހޮފެންހައިމް ދޫކޮށް 33 މިިލިއަން ޑޮލަރުގެ ޑީލެއްގަ އެވެ. ލިވަޕޫލަށް ފިރްމީނޯ ގެނައީ އޭރު ލިވަޕޫލަށް ކޯޗުކޮށްދިން ބްރެންޑަން ރޮޖާސް އެވެ. ލިވަޕޫލްގެ ކޯޗުކަމާ ޔާގަން ކްލޮޕް، 2015 ވަނަ އަހަރުގެ އޮކްޓޫބަރު މަހު ހަވާލުވުމަށް ފަހު، ދިން އިންޓަވިއުއެއްގައި ވަނީ އޭނާ ޑޯޓްމަންޑަށް ކޯޗުކޮށްދިންއިރު، އެ ޓީމުގައި ހުރެ ގެންނަން މަސައްކަތް ކުރި އެއް ކުޅުންތެރިއަކީ ފިރްމީނޯ ކަމަށް ބުނެފަ އެވެ.
އަނިޔާގެ ސަބަބުން މި ސީޒަނުގައި ގިނަ މެޗުތަކެއް ފިރްމީނޯ އަށް ގެއްލުނު ނަމަވެސް އޭނާ ވަނީ ކުޅުނު 33 މެޗުގައި 11 ގޯލު ޖަހައި، ފަސް ގޯލު ޖަހަން ފުރުސަތު ތަނަވަސްކޮށްދީފަ އެވެ.
ޕްރިމިއާ ލީގުގައި މިރޭ ލިވަޕޫލުން ނޮޓިންހަމް ފޮރެސްޓާ ކުޅޭ މެޗުގައި އަނިޔާގެ ސަބަބުން ފިރްމީނޯ އަށް ނުކުޅެވޭނެ ކަމަށް އެ ކްލަބުން ވަނީ ބުނެފަ އެވެ.
