ނޭޕްލްސް، އިޓަލީ (އޭޕްރީލް 19) - ނަޕޯލީ ދަނޑުގައި ރޭ ކުއާޓާ ފައިނަލުގެ ދެ ވަނަ ލެގުގައި 1-1 އިން އެއްވަރުވި ނަމަވެސް އެގްރިގޭޓަށް ބަލާއިރު، މިލާނުން 2-1 އިން ކުރިހޯދައި، ޗެމްޕިއަންސް ލީގުގެ ސެމީ ފައިނަލަށް ދަތުރުކޮށްފި އެވެ.
ހަތް ފަހަރު ޗެމްޕިއަންސް ލީގު ކާމިޔާބު ކޮށްފައިވާ މިލާނުން އެންމެ ފަހުން މި މުބާރާތުގެ ސެމީގައި ކުޅެފައިވަނީ މީގެ 16 އަހަރު ކުރިންނެވެ. އެއީ، މިލާނުން 2007 ވަނަ އަހަރު އެތަންސްގައި ކުޅުނު ފައިނަލުގައި ލިވަޕޫލް ބަލިކުރި ފަހަރު އެވެ.
މިދިޔަ ހަފްތާގައި މިލާނުން އަމިއްލަ ދަނޑުގައި ނަޕޯލީ އަތުން ފުރަތަމަ ލެގުގައި މޮޅުވިއިރު، ދާދި ފަހުން ވަނީ ނަޕޯލީ ދަނޑުގައި އިޓާލިއަން ލީގުގައި ބޮޑު ތަފާތަކުން މިލާން މޮޅުވެފަ އެވެ. އެއީ ރޭގެ މެޗަށް ނުކުތްއިރު، މިލާނަށް ލިބިފައި އޮތް ވަރަށް ބޮޑު ހިތްވަރެކެވެ.
ނޭޕްލްސްގެ ޑިއާގޯ އަރްމާންޑޯ މަރަޑޯނާ ސްޓޭޑިއަމްގައި ކުޅުނު މެޗު ފަށައިގެން 20 މިނިޓް ފަހުން، ލީޑުފުޅާކުރަން މިލާނަށް ވަނީ ޕެނަލްޓީއެއް ލިބިފަ އެވެ. އެކަމަކު، މިލާންގެ ފްރާންސް ފޯވާޑް، އޮލިވިއޭ ޖިރޫ ފޮނުވާލި ޕެނަލްޓީ ނަޕޯލީގެ ކީޕަރު، އަލެކްސް މެރެޓް ވަނީ މަތަކޮށްފަ އެވެ.
އެކަމަކު، މިލާނުން ފުރަތަމަ ހާފު ނިންމާލީ ލީޑުގައި އޮވެ އެވެ. އެއީ 42 ވަނަ މިނިޓްގައި މިލާންގެ ޕޯޗުގީސް ވިންގް، ރަފައެލް ލެއާއޯ އަމިއްލަ މަސައްކަތުން އުފެއްދި އެޓޭކެއްގައި ޖިރޫ ޖެހި ގޯލުންނެވެ.
ނަޕޯލީގެ ފޯވާޑް ވިކްޓަ އޮސީމެން އަނިޔާއިން ރަނގަޅުވެ، މި މެޗުގައި ކުޅުނު ނަމަވެސް އޭނާ ހުއްޓުވަން މިލާންގެ ޑިފެންޑަރުން ޖުމްލަ ގޮތެއްގައި ރަނގަޅު މަސައްކަތްތަކެއް ކުރި އެވެ. ނަޕޯލީ އަށް އެއްވަރުކުރަން މެޗުގެ 82 ވަނަ މިނިޓްގައި ރަނގަޅު ފުރުސަތެއް ލިބުނެވެ. އެ ގޮތުން، މި ސީޒަނުގައި ނަޕޯލީ އަށް މޮޅު ކުޅުމެއް ދައްކަމުން އަންނަ، ޖޯޖިއާގެ ތަރި، ކްވިޗާ ކްވަރަޝްކޭލިއާ އަށް ލިބުނު ޕެނަލްޓީން ފޮނުވާލި ބޯޅަ މިލާންގެ ކީޕަރު، މައިކް މައިންގްނޯން ވަނީ މަތަކޮށްފަ އެވެ.
މި މެޗުގައި ނަޕޯލީން އެއްވަރުކުރި ގޯލު ޖެހީ އިތުރު ވަގުތުގެ ތިން ވަނަ މިނިޓްގައި އޮސީމެން އެވެ. މިއީ ޖިއަކޯމޯ ރަސްޕަޑޯރީ ދިން ބޯޅައަކުން އޮސީމެން ބޮލުން ޖެހި ގޯލެކެވެ. ނަޕޯލީ އަކީ އިޓާލިއަން ލީގުގެ ތާވަލު ކުރީގައި ބޮޑު ލީޑަކާ އެކު އޮތް ޓީމެވެ. އެ ޓީމުން، 33 އަހަރަށް ފަހު އިޓަލީގެ ޗެމްޕިއަންކަން ހޯދަން ބާކީ މެޗުތަކުން ބޭނުންވަނީ ނިސްބަތުން ބަލާއިރު މަދު ޕޮއިންޓް ތަކެކެވެ.
ނަޕޯލީގެ ކޯޗު ލޫޝިއާނޯ ސްޕަލެއްޓީ ބުނީ އެ ޓީމު ކެޓުމުގެ އެންމެ ބޮޑު އަސްލަކީ ޖުމްލަކޮށް ދެ ލެގަށް ބަލާއިރު ގޯލު ޖަހަން ލިބުނު ރަނގަޅު ފުރުސަތުތައް ނިންމައިނުލެވުން ކަމަށެވެ.
މިލާނުގެ ކޯޗު ސްޓެފާނޯ ޕިއޯލީ ބުނީ މިލާން ކުުޅުންތެރިން ދެ ލެގުގައި ވެސް ކުޅުނީ ނަތީޖާ އެއް ނެރެވޭނެ ކަމުގެ އިތުބާރާ އެކު ޓީމެއްގެ ގޮތުގައި ކަމަށެވެ. އަދި އޭގެ ނަތީޖާ ފެނުނީ ވެސް ވަރަށް ހިތްހަމަޖެހޭ ގޮތަކަށް ކަމަށް ޕިއޯލީ ވަނީ ބުނެފަ އެވެ.
