މިލާން (އޭޕްރީލް 16) - އިޓާލިއަން ލީގުގައި މި ހަފްތާގެ މެޗުތަކުން ނަޕޯލީ އާއި އޭސީ މިލާން އެއްވަރުވެ، ޕޮއިންޓަކުން ފުއްދާލަން ޖެހުނުއިރު، މޮންޒާ އަތުން އިންޓަ މިލާން 1-0 އިން ބަލިވެއްޖެ އެވެ.
ލީގުގެ ކުރީގައި އޮތް ނަޕޯލީ ވަނީ އަމިއްލަ ދަނޑުގައި ހެލަސް ވެރޯނާއާ 0-0 އިން އެއްވަރުވެފަ އެވެ. ބޮލޯނިއާ ދަނޑުގައި ކުޅުނު މެޗުން އޭސީ މިލާން ވަނީ 1-1 އިން އެއްވަރުވެފަ އެވެ.
ތިރީސް ތިން އަހަރު ތެރޭ ފުރަތަމަ ފަހަރަށް އިޓާލިއަން ލީގުގެ ޗެމްޕިއަންކަން ހޯދަން މަސައްކަތް ކުރަމުން އަންނަ ނަޕޯލީ، ރޭގެ ނަތީޖާ އަށް ފަހު ވެސް ލީގުގެ އެއް ވަނައިގައި އޮތީ 14 ޕޮއިންޓުގެ ލީޑަކާ އެކު އެވެ. އެއީ 30 މެޗުން 75 ޕޮއިންޓް ހޯދައިގެންނެވެ. ދެ ވަނައިގައި އޮތް ލާޒިއޯ 30 މެޗުން ވަނީ 61 ޕޮއިންޓް ލިބިފަ އެވެ. މިލާން އެއްވަރުވުމުން ތިން ވަނަ އަށް އަރަން ލިބުނު ފުރުސަތު ގެއްލުނީ އެވެ. ތިން ވަނައިގައި އޮތް ރޯމާ އާއި ހަތަރެއްގައި އޮތް މިލާނަށް ވަނީ 53 ޕޮއިންޓް ލިބިފަ އެވެ. މިރޭ އުދިނޭޒީ އަތުން ރޯމާ މޮޅުވެއްޖެނަމަ ތިން ވަނައިގައި ހަމަޖެހިލަން ފުރުސަތު ލިބޭނެ އެވެ.
ނަޕޯލީން ރޭގެ މެޗަށް ނެރުނު ފުރަތަމަ އެގާރައިގައި ވަނީ އާންމުކޮށް ކުޅޭ ގިނަ ކުޅުންތެރިންނަށް ފުރުސަތު ނުދޭން ނިންމައިފަ އެވެ. އެއީ މި ހަފްތާގައި މިލާނާ ދެކޮޅަށް ކުޅެން އޮތް ޗެމްޕިއަންސް ލީގުގެ ކުއާޓާ ފައިނަލްގެ ދެ ވަނަ ލެގަށް ވިސްނުމަށް ފަހު އެވެ.
އެކަމަކު، ރޭގެ މެޗުގައި ބެންޗުން އަރައި، ނަޕޯލީގެ ވިކްޓާ އޮސީމެން ޖެހި ބޯޅައެއް ދަނޑިއަށް އަމާޒުވިއިރު، އެ ޓީމުގެ ކްވިޗާ ކްރަވަޝްކޭލިއާ އަށް ލިބުނު ފުރުސަތުތަކުގައި ރަނގަޅަށް ބޭނުމެއް ނުކުރެވުނެވެ.
ބޮލޯނިއާ އިން ވަނީ ރޭ މިލާން ކައިރިން 32 ވަނަ ސިކުންތުގައި ލީޑުނަގައިފަ އެވެ. އާދައިގެ ގޮތަކަށް މެޗު ފެށި މިލާން ކޮޅަށް ބޮލޯނިއާގެ ގޯލު ޖެހީ ނިކޯލާ ސަންސޯނޭ އެވެ. މިލާނަށް ފުރަތަމަ ހާފުގައި އެއްވަރުކޮށްދިނީ ތޮމާސޯ ޕޮބޭގާ އެވެ. ދެ ވަނަ ހާފުގައި ދެ ޓީމަށް ވެސް އިތުރު ގޯލެއް ޖެހޭގޮތެއްނުވި އެވެ.
އިންޓަ ދަނޑުގައި މޮންޒާ މޮޅުކޮށްދިން ގޯލު ޖެހީ އިންޓަ އެކެޑަމީގައި ތަމްރީންވި ކުޅުންތެރިއެއް ކަމަށްވާ ލޫކަ ކަލްޑިރޯލާ އެވެ. އޭނާ މި ގޯލު ޖެހީ މެޗުގެ ފުރިހަމަ ވަގުތު ހަމަވާން 12 މިނިޓަށް ވެފައި ވަނިކޮށެވެ.
އިންޓަ އިން ގޯލެއް ޖަހައި ނަތީޖާ ހަަމަހަަމަ ކުރެވޭތޯ ގިނަ މަސައްކަތްތަކެއް ކުރި އެވެ. އެ ގޮތުން މެޗުގެ ފަހު ކޮޅުގައި އިންޓަގެ އެޑިން ޖެކޯ އަށް ލިބުނު ރަނގަޅު ފުރުސަތުން ގޯލެއް ނުޖެހުނެވެ. އިންޓަ އިން ލީގުގައި މޮޅެއް ނުލިބި ހޭދަކުރާ މުއްދަތުގައި މި ވަނީ މަހަކަށް ވުރެ ގިނަ ދުވަސް ވެފަ އެވެ.
