ޕްރެޒިޑެންޓްސް ކަޕް ފުޓްބޯޅަ މުބާރާތުގައި ޓީސީ ކުޅޭ ދެ ވަނަ މެޗަށް ޓީމް ތައްޔާރުވާން މި ޖެހެނީ "ގަދަކަމުން" ކަމަށް ޓީސީ ސްޕޯޓްސް ކުލަބުގެ ކޯޗު އަހުސަން ރަޝީދު (ޗޭ) ބުނެފި އެވެ.
މި ފަހަރުގެ ސީޒަނުގެ ފުރަތަމަ މުބާރާތް ކަމަށްވާ ޕްރެޒިޑެންޓްސް ކަޕް ފުޓްބޯޅަ މުބާރާތުގެ ކުޅުން މިދިޔަ ހޯމަ ދުވަހު ފެށީ މާޒިޔާ ސްޕޯޓްސް އެންޑް ރެކްރިއޭޝަނާއި ޓީސީ ވާދަކުރި މެޗުންނެވެ. މި މެޗުން ޓީސީ 2-0 އިން ބަލިވިއިރު އެ ޓީމް ގްރޫޕް ސްޓޭޖުގައި ކުޅޭ ދެ ވަނަ މެޗުގައި މާދަމާރޭ ނުކުންނާނީ ބުރު ސްޕޯޓްސް ކުލަބާ ދެކޮޅަށެވެ.
ކުރިއަށް އޮތް މެޗުގެ ތައްޔާރީތަކާ ގުޅޭގޮތުން ސުވާލުކުރުމުން ޓީސީގެ ކޯޗު އަހުސަން ބުނީ ފުރަތަމަ މެޗަ ށްފަހު ޓީމް އަދިވެސް ރަނގަޅަށް ރިކަވާ ނުކުރެވޭ ކަމަށާއި، ދެ ވަނަ މެޗާ މެދު އަދި ރަނގަޅަށް ވިސްނަން ފުރުސަތު ވެސް ނުލިބޭ ކަމަށެވެ.
"މެޗަކަށް ތައްޔާރުވާން ދެ ދުވަސް މި ލިބުނީ އެހެންވީމަ ހަމަ ގަދަކަމުން ތައްޔާރުވާން މި ޖެހުނީ." އަހުސަން ބުންޏެވެ.
އޭނާ ބުނީ ފުރަތަމަ މެޗާ ހިލާފަށް ދެ ވަނަ މެޗުގައި ޓީސީ އަށް ގޭމް ޕްލޭން ބަދަލުކުރަން މަޖުބޫރު ކަމަށާއި ސަބަބަކީ މުބާރާތުގައި ކުރިއަށްދިޔުމުގެ ފުރުސަތެއް އޮތީ މި މެޗުން ރަނގަޅު ނަތީޖާއެއް ހޯދައިގެން ކަމަށްވާތީ އެވެ.
އަހުސަން ބުނީ ބުރު ސްޕޯޓްސް އާ ދެކޮޅަށް ޓީސީ އިން އެޓޭކްތަކެއް ކުރަން މަސައްކަތްކުރާނެ ކަމަށާއި، އެ ޓީމުގެ އަމާޒަކީ މި މެޗުން މޮޅުވުން ކަމަށެވެ.
"މި މެޗު ކޮންމެގޮތެއް ވިޔަސް ކުރިން ކުޅުނު މެޗާ ހިލާފަށް އެޓޭކް ކުރަން ޖެހޭނެ. ކުރިއަށްދާން ބޭނުމިއްޔާ. އެގޮތަށް މި ވިސްނަނީ، މޮޅުވާން ހަމަ" އަހުސަން ބުންޏެވެ.
ބުރު ސްޕޯޓްސް ކުލަބާ ގުޅޭގޮތުން އަހުސަން ބުނީ އެޓީމްގެ ކޯޗު މުހައްމަދު ނިޒާމް (ނިޒާމްބެ) އަކީ ޓީސީގެ ހުރިހާ ކަމެއް ވަރަށް ގާތުން ބަލައި އެކަންކަން އެނގޭނެ ކޯޗެއް ކަމަށާއި، އެހެންކަމުން މި މެޗުގައި ޓީސީ ކުރާނެ ކަންކަން ނިޒާމްބެ އަށް އެނގޭނެ ކަމަށެވެ.
އަހުސަން ބުނީ ނިޒާމްބެއާ އެކު މަސައްކަތްކުރި ކުޅުންތެރިން މި ޓީމުގައި ތިބުމަކީ އޭގެ ފައިދާ ދެކޮޅަށް ވެސް އޮންނާނެ ކަމެއްގެ ގޮތުގައި ގަބޫލުކުރާ ކަމަށެވެ. އަދި ޓީސީ ތައްޔާރުވާނީ މި ކަންކަމަށް ފަރުވާ ބަހައްޓައިގެން ފުރަތަމަ ޑިވިޝަނުގައި ޓީސީ އަށް ގިނަ ކާމިޔާބީތައް ހޯދައިދިން ކޯޗު ނިޒާމްބެ އަށް އިހުތިރާމް ދީގެން ކަމަށެވެ.
ދެ ފަހަރެއްގެ މަތިން ޓީސީ އަށް ނިޒާމްބެ ކޯޗުކޮށްދިންއިރު، އެންމެ ކައިރިން މަސައްކަތް ކުރި އެއް އެސިސްޓަންޓް ކޯޗަކީ އަހުސަން އެވެ. އެހެންވެ، ނިޒާމްބެ މެޗު ހާލަތްތަކުގައި ގެންނާނެ ބަދަލުތަކާ ބެހޭ މައުލޫމާތު އަހުސަންގެ ވެސް ހުންނާނެ އެވެ.
ޓީސީ އާއި ބުރު ސްޕޯޓްސް ކްލަބް ކުޅޭ މެޗު ފަށާނީ މާދަމާރޭ 22:00 ގަ އެވެ. މިރޭ ކުޅޭ މެޗުގައި ކްލަބް ވެލެންސިއާ ނުކުންނާނީ ސުޕަ ޔުނައިޓެޑް ސްޕޯޓްސް (ސަސް)އާ ދެކޮޅަށެވެ.
