ތައިލެންޑް ގައުމީ ޔޫތު އަންހެން ޓީމުގެ ހެޑް ކޯޗުކަމާއި ވިއެޓްނާމްގެ ގައުމީ އަންހެން ވޮލީ ޓީމުގެ ހެޑް ކޯޗުކަން ކޮށްފައިވާ ތަޖުރިބާކާރު ކޯޗު، ވިޗީޕޮން ފޯންޗާޓްޔިންޗީޕް، ގައުމީ އަންހެން ވޮލީ ޓީމުގެ ކޯޗުކަމާ ހަވާލުވެ ޕްރެކްޓިސްތައް ފަށައިފި އެވެ.
އާ ކޯޗު، ވިޗީޕޮންގެ އިރުޝާދުގެ ދަށުން ގާތްގަނޑަކަށް ހަފްތާއެއްހާ ދުވަަހު ގައުމީ އަންހެން ޓީމުން މިހާރު ވަނީ ޕްރެކްޓިސް ކޮށްފަ އެވެ.
މީގެ 15 ވަރަަކަށް އަހަރު ކުރިން ޕްރޮފެޝަނަލް ކޯޗިން އަށް ނުކުތް ވިޗީޕޮންގެ ބެލުމުގެ ދަށުން ގައުމީ އަންހެން ވޮލީ ޓީމުން ތައްޔާރުވަމުން އަންނަ ފުރަތަމަ މުބާރާތަކީ އަންނަ މަހުގެ ފަހުކޮޅުގައި ނޭޕާލްގައި ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ)ގެ ވޮލީބޯލް ޗެލެންޖް ކަޕަށެވެ.
ޖުމްލަ އަށް ގައުމު ވާދަކުރާ ކާވާ ޗެލެންޖް ކަޕްގައި ރާއްޖެ ހިމެނެނީ އުޒްބެކިސްތާނާއި ސްރީ ލަންކާ އަދި ކަޒަކްސްތާނާ އެކު ގްރޫޕް ބީގަ އެވެ. ފުރަތަމަ ގްރޫޕްގައި އޮތީ ނޭޕާލާއި ކިރްގިސްތާން، ބަންގްލަދޭޝް އަދި އިންޑިއާ އެވެ.
ކާވާ ޗެލެންޖް ކަޕަށް މި ވަގުތު ގައުމީ އަންހެން ޓީމުން ޓްރެއިނިން ހަދަމުން އަންނަނީ މާފަންނު ސްޓޭޑިއަމް އައުޓްޑޯ ވޮލީ ކޯޓުގަޔާއި ޖިމް ޓްރެއިނިން އެވެ.
ގައުމީ އަންހެން ވޮލީ ޓީމުން ރޭ ބޭއްވި ޓްރެއިނިންގެ ތެރެއިން ކޯޗު ވިޗީޕޮން (ވ) ޓީމުގެ ކުޅުންތެރިންނާ ވާހަކަދައްކަނީ.--- ފޮޓޯ: މުހައްމަދު ޝާބިން/ އަދަދު
ގައުމީ އަންހެން ވޮލީބޯޅަ ޓީމުން ވަނީ އެންމެ ފަހުން މީގެ މަހެއްހާ ދުވަސް ކުރިން ރާއްޖޭގައި ކުރިއަށްދިޔަ ފޯ ނޭޝަންސް ކަޕް، ވޮލީބޯޅަ މުބާރާތުގައި ސިންގަޕޫރާއި މެލޭޝިއާއާ ވާދަކޮށް، ރިހި މެޑަލް ހޯދައިފަ އެވެ. އެ މުބާރާތުގައި ގައުމީ އަންހެން ވޮލީބޯޅަ ޓީމަށް އިރުޝާދުދިނީ ކޯޗު، އިބްރާހިމް ނިޒާރު (ބޮޑޭ) އެވެ.
ތައިލެންޑާއި ވިއެޓްނާމްގައި ވޮލީބޯޅައިން ގިނަ ކާމިޔާބީތަކެއް ހޯދާފައިވާ ވިޗީޕޮން ވަނީ މަސައްކަތް ކުރި ކޮންމެ ޓީމެއްގައި ކަހަލަ ގޮތަކަށް ރަނގަޅު ކުރިއެރުންތަކެއް ހޯދައިފަ އެވެ.
އެ ގޮތުން، ތައިލެންޑްގެ ޔޫތު ލެވަލުން ފަށައިގެން ޕްރޮފެޝަނަލް ލެވަލަށް ހުނަރުވެރި މޮޅެތި ކުޅުންތެރިން ގެންގޮސް ވިޗީޕޮންގެ އިރުޝާދާ އެކު އެ ކުޅުންތެރިން ކާމިޔާބު ހޯދާފައިވެ އެވެ. ޓީމެއް ރަނގަޅު ލެވަލަށް ބައްޓަން ކުރުމަށް، ފިޒިކަލް ޓްރެއިނިން ކުރިއަށް ގެންދިއުމުގެ ސެޓްފިކެޓް ހާސިލްކޮށް އޭގެއިން ނަތީޖާ ނެރެފައިވާ ކޯޗެއްގެ ގޮތުގައި ފާހަގަވާ ވިޗީޕޮން، ވަނީ އާސިއާން ސަރަހައްދުގައި ވޮލީގެ ރަނގަޅު މަސައްކަތްތަކެއް ކޮށް، ފާހަގަކޮށްލެވޭ ކާމިޔާބީތަކެއް ވެސް ހޯދައިފަ އެވެ.
ގައުމީ އަންހެން ވޮލީ ޓީމަށް އިރުޝާދު ދީފައިވާ ކޯޗުންނަށް ބަލާއިރު، ނިޒާރުގެ ކުރިން ޓީމަށް އިރުޝާދުދިން ބައެއް ދިވެހި ކޯޗުންނަށް ބަލާއިރު، މުމްތާޒް އަލީ (މުންތޭ)، އަހުމަދު އަދީލް (ބޭބެ)، ފަތުހުﷲ ވަހީދު (ފައްްލޯ)، މުހައްމަދު ނަދީމް (ނަދީމްބެ) އަދި އިބްރާހިމް ޖަލީލް (ޖައްލަ) ހިމެނެ އެވެ.
ގައުމީ އަންހެން ވޮލީ ޓީމަށް އިރުޝާދުދިނުމުގައި ހަރަކާތްތެރިވި ބިދޭސީ ކޯޗުންނަށް ބަލާއިރު، ސާބިއާގެ ކޯޗު ކިޔަޗް ރަޑޯވަން ފާހަގަކޮށްލެވެ އެވެ. ކިޔަޗް އަކީ ގައުމީ ފިރިހެން ޓީމަށް އިރުޝާދުދިން ސާބިއާގެ މަތީ ފެންވަރުގެ ކޯޗު މިލޮރަޑް ކިޔާޗާ އެކު ގެނައި ޓްރެއިނަރެވެ.
