މިރޭ ފަށަން ހަމަޖެހިފައި އޮތް ޕްރެޒިޑެންޓްސް ކަޕް ފުޓްބޯޅަ މުބާރާތް މާދަމާރޭ ފަށާގޮތަށް ފަސްކޮށްފި އެވެ.
މި އަހަރުގެ ފުޓްބޯޅަ ސީޒަންގެ ފުރަތަމަ މުބާރާތުގެ ކުޅުން މިރޭ ފަށަން ހަމަޖެހިފައި އޮތީ އީގަލްސް އާއި ވެލެންސިއާގެ މެޗުންނެވެ.
މިރޭ ފަށަން ހަމަޖެހިފައި އޮތް ޕްރެޒިޑެންޓްސް ކަޕްގެ މެޗުތައް ފަސްކުރީ އެފްއޭއެމްގެ ކޮމްޕެޓިޝަންސް ޑިޕާޓްމަންޓުގެ ހެޑް އިސްމާއީލް ރިޔާޒްގެ ތުއްތު ދަރިފުޅު ނިޔާވުމާ ގުޅިގެން އެވެ. ރިޔާޒްގެ ދަރިފުޅު ނިޔާވީ ކުއްލި ގޮތަކަށް ރޭ ފަތިހުގެ ވަގުތެއްގަ އެވެ.
ޕްރެޒިޑެންސް ކަޕްގެ މެޗުތައް ފަސްކުރިކަން ފާހަގަކުރަމުން އެފްއޭއެމްގެ އޮފިޝަލް މީޑިއާ ގްރޫޕުގައި ލިޔެފައިވަނީ ރިޔާޒްގެ ދަރިފުޅު ނިޔާވުމުގެ ހިތާމައިގައި މިރޭ ކުޅުމަށް ހަމަޖެހިފައިވާ މެޗު ފަސްކޮށްފައިވާ ކަމަށާއި މުބާރާތް ފަށާނީ މާދަމާ ކުޅޭ މެޗުން ކަމަށެވެ. އަދި މިއަދު ބާއްވަން ހަމަޖެހިފައި އޮތް ފުރަތަމަ ދެ މެޗުގެ ޕްރީ މެޗު ޕްރެސް ކޮންފަރެންސްވެސް ވަނީ މާދަމާ އަށް ފަސްކޮށްފަ އެވެ.
އަށް ޓިމާ އެކު ޕްރެޒިޑެންސް ކަޕް ބާއްވަން ކުރިން ނިންމި ނަމަވެސް މާލީ ހާލަތު އޮތްގޮތުންނާއި ކްލަބް ލައިސަންސިން ކަންކަން އަދި ފުރިހަމަނުކުރެވޭތީ ކުލަބު ގްރީން ސްޓްރީޓްސް އާއި ޔުނައިޓެޑް ވިކްޓްރީ (ޔޫވީ) އިން މިފަހަރު މުބާރާތުގައި ބައިވެރިނުވެ އެވެ.
ހަ ޓީމްގެ މެދުގައި މުބާރާތް ކުޅޭނީ ދެ ގްރޫޕަށް ޓީމްތައް ބަހާލައިގެން ކޮންމެ ގްރޫޕެއްގެ ގަދަ ދެ ޓީމަށް ސެމީގެ ޖާގަ ލިބޭ ގޮތަށެވެ.
ފުރަތަމަ ގްރޫޕްގައި ހިމެނެނީ ވެލެންސިއާ އާއި އީގަލްސް އަދި ސުޕަ ޔުނައިޓެޑް ސްޕޯޓްސް (ސަސް) އެވެ. ދެ ވަނަ ގްރޫޕްގައި ހިމެނެނީ މާޒިޔާ ސްޕޯޓްސް އެންޑް ރެކްރިއޭޝަނާއި ޓީސީ ސްޕޯޓްސް ކްލަބް އަދި ބުރު ސްޕޯޓްސް ކްލަބް އެވެ. މިއީ، މި ފަހަރު ފުރަތަމަ ޑިވިޝަންގައި އަލަށް ވާދަކުރާ ބުރުން ޕްރެޒިޑެންޓްސް ކަޕްގައި ކުޅޭ ފުރަތަމަ ފަހަރެވެ.
ޕްރެޒިޑެންޓްސް ކަޕްގައި ކުޅޭ ޓީމުތަކުގެ ތެރެއިން ސީޒަނަށް އެންމެ ފުރަތަމަ ޕްރެކްޓިސް ފެށީ މާޒިޔާ އިންނެވެ. އޭގެ ފަހުން އީގަލްސް އިން ޕްރެކްޓިސްތައް ފެށި އެވެ. އަލަށް ފުރަތަމަ ޑިވިޝަންގައި ވާދަކުރާ ބުރުން ޕްރެކްޓިސް ފެށީ މީގެ ހަފްތާއެއްހާ ދުވަސް ކުރިންނެވެ. ވެލެންސިއާ އިން ޕްރެކްޓިސް ފެށީ މީގެ ހަތަރު ދުވަސް ކުރިންނެވެ. ސަސް އިން ޕްރެކްޓިސް ފެށި މީގެ ތިން ދުވަސް ކުރިންނެވެ. މުބާރާތް ފެށެން އެއް ދުވަހަށް ވެފައި އޮއްވާ ޓީސީ އިން ވެސް ވަނީ ރޭ ޕްރެކްޓިސް ފަށައިފަ އެވެ.
