ލަންޑަން (އޭޕްރީލް 9) - މެންޗެސްޓާ ސިޓީ އަށް ކުޅެމުން އަންނަ ނޯވޭގެ ފޯވާޑް އާލިން ބްރައުޓް ހާލަންޑް ހުރީ ލިއޮނަލް މެސީ އާއި ކްރިސްޓިއާނޯ ރޮނާލްޑޯއާ އެއް ލެވަލެއްގައި ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ.
އިނގިރޭސި ޕްރިމިއާ ލީގުގައި ރޭ ސިޓީ ވަނީ 4-1 އިން ސައުތެމްޓަން ދަނޑުގައި މޮޅުވެފަ އެވެ. މި މެޗުގައި ސިޓީގެ ގޯލުތައް ޖަހައިދިނީ ހާލަންޑް ދެ ގޯލާއި ޖެކް ގްރީލިޝް އަދި ހޫލިއަން އަލްވަރޭޒް ގޯލެކެވެ. ސައުތެމްޓަންގެ ގޯލު ޖެހީ ސޭކޫ މާރާ އެވެ.
މި މެޗުގައި ހާލަންޑް، 22، ޖެހި ދެ ގޯލާ އެކު، އޭނާ ވަނީ ސީޒަނުގައި 44 ގޯލު ޖަހައި، އިނގިރޭސި ފުޓްބޯޅައިގެ އެއް ސީޒަނެއްގެ ހުރިހާ މުބާރާތެއްގައި އެންމެ ގިނަ ގޯލު ޖެހުމުގެ ރެކޯޑާ ހަމަކޮށްފަ އެވެ. ހާލަންޑް ވަނީ، ޕްރިމިއާ ލީގުގެ 27 މެޗުން 30 ލަނޑު ހަަމަކޮށް، އެންމެ އަވަހަށް އެ އަދަދަށް ލީގު ގޯލު ޖެހި ކުޅުންތެރިޔާގެ ޝަރަފް ވެސް ހޯދައިފަ އެވެ.
ރޭގެ މެޗަށް ފަހު ސިޓީގެ ކޯޗު ގާޑިއޯލާ ބުނީ އެކާވީސް ވަނަ ގަރުނުގައި ފެނުނު އާދަޔާހިލާފު ދެ ފުޓްބޯޅަ ކުޅުންތެރިން ކަމަށްވާ މެސީ އާއި ރޮނާލްޑޯ ހުރި ފަދަ ލެވަލެއްގައި މި ވަގުތު ހާލަންޑް ހުރި ކަމަށެވެ.
"އަހަރެމެންނަށް ދެ ޑެކޭޑް (20 އަހަރު) ފެނިއްޖެ ރޮނާލްޑޯ އާއި މެސީ ހުރި ލެވަލް. އަހަންނަށް މި ވަގުތު ހާލަންޑް މި ފެންނަނީ އެ ލެވަލްގައި ހުއްޓައި،" ހާލަންޑަށް ތައުރީފުކުރަމުން ގާޑިއޯލާ ބުންޏެވެ.
"އޭނަ (ހާލަންޑް) އެ ޖެހި ދެ ވަނަ ގޯލު މަތީގައި އިން ބޯޅައެއް ވިނަގަނޑުގައި ޖައްސާފައި އެ ގޮތަށް އެހާ ފަސޭހައިން ގޯލަށް ފޮނުވާލުމަކީ ފަސޭހަ ކަމެއް ނޫން، އެކަމަކު، ހާލަންޑަށް ފަސޭހަކޮށް މި ފެނުނީ،"
ސިޓީގެ މި މޮޅާ އެކު، އާސެނަލަށް ލީގުގެ އެއް ވަނައިގައި ލިބިފައި އޮތް ލީޑު ފަސް ޕޮއިންޓަށް ވަނީ ކުޑަވެފަ އެވެ. އާސެނަލް އެއް ވަނައިގައި އޮތީ 29 މެޗުން 72 ޕޮއިންޓް ހޯދައިގެންނެވެ. ދެ ވަނައިގައި އޮތް ސިޓީ އަށް ވަނީ 29 މެޗުން 67 ޕޮއިންޓް ލިބިފަ އެވެ.
