ރާއްޖޭގެ ފުޓްބޯޅަ ސީޒަނުގެ ފުރަތަމަ މުބާރާތް ކަމަށްވާ ޕްރެޒިޑެންޓްސް ކަޕްގައި މާލީ ހާލަތުގެ ސަބަބުން ކްލަބް ގްރީން ސްްޓްރީޓްސް އާއި ޔުނައިޓެޑް ވިކްޓަރީ (ޔޫވީ) ބައިވެރިނުވަން ނިންމައިފި އެވެ.
ޔުނައިޓެޑް ވިކްޓަރީ އާއި ކްލަބް ގްރީން ސްޓްރީޓްސް މި ފަހަރުގެ ޕްރެޒިޑެންޓްސް ކަޕްގައި ބައިވެރިނުވާތީ، މި ފަހަރުގެ މުބާރާތުގެ ގުރުއަތުލުން މިރޭ ބޭއްވިއިރު، ނިންމާފައިވަނީ ބައިވެރިވި ހަ ޓީމުގެ މެދުގައި މުބާރާތް ބޭއްވުމަށެވެ.
އެ ގޮތުން މުބާރާތުގައި ބައިވެރިވި ހަ ޓީމު ވަނީ ދެ ގްރޫޕަށް ބަހާލައިފަ އެވެ.
ފުރަތަމަ ގްރޫޕްގައި ހިމެނެނީ ވެލެންސިއާ އާއި އީގަލްސް އަދި ސުޕަ ޔުނައިޓެޑް ސްޕޯޓްސް (ސަސް) އެވެ. ސަސް އިން ޕްރެކްޓިސް ފެށީ މިރެ އެވެ. ދެ ވަނަ ގްރޫޕްގައި ހިމެނެނީ މާޒިޔާ ސްޕޯޓްސް އެންޑް ރެކްރިއޭޝަނާއި ޓީސީ ސްޕޯޓްސް ކްލަބް އަދި ބުރު ސްޕޯޓްސް ކްލަބް އެވެ. މިއީ، މި ފަހަރު ފުރަތަމަ ޑިވިޝަންގައި އަލަށް ވާދަކުރާ ބުރުން ޕްރެޒިޑެންޓްސް ކަޕްގައި ކުޅޭ ފުރަތަމަ ފަހަރެވެ.
ޕްރެޒިޑެންޓްސް ކަޕްގައި ކުޅޭ ޓީމުތަކުގެ ތެރެއިން ޕްރެކްޓިސް ނުފަށައި އޮތީ ޓީސީ އެެެވެ. ޓީސީން ދެ ދުވަހެއްގެ ތެރޭ ޕްރެކްޓިސް ފަށާނެ ކަމަށް ވަނީ މައުލޫމާތު ދީފަ އެވެ.
އެނގިފައިވާ ގޮތުގައި ޕްރެޒިޑެންޓްސް ކަޕްގައި ބައިވެރިނުވާން ޔުނައިޓެޑް ވިކްޓަރީ އާއި ގްރީން ސްޓްރީޓްސް އިން ނިންމާފައިވަނީ އެ ކްލަބްތަކުގެ މާލީ ހާލަތު އޮތްގޮތުންނާއި ކްލަބް ލައިސަންސިން ކަންކަން އަދި ފުރިހަމަނުކުރެވޭތީ އެވެ.
އެ ގޮތުން، ގްރީން ސްޓްރީޓްސް އާއި ޔުނައިޓެޑް ވިކްޓަރީން އަންނަނީ މިދިޔަ ސީޒަނުގައި ނުނިމި ހުރި މުސާރައިގެ ކަންކަން ނިންމައި، އާ ސީޒަނަށް ޓީމެއް އެކުލަވާލުމުގެ މަސައްކަތް ކުރަމުންނެވެ.
ފުރަތަމަ ޑިވިޝަނުގެ އަށް ކްލަބްގެ ތެރެއިން މި ވަގުތު، ޕްރީ ސީޒަން ޕްރެކްޓިސް ނުފަށައި އޮތީ ގްރީން ސްޓްރީޓްސް އާއި ޔުނައިޓެޑް ވިކްޓްރީގެ އިތުރުން ޓީސީ އެވެ. ޓީސީ ވަނީ އާ ސީޒަނަށް ޕްރެކްޓިސް ފަށަން ކުރަން ޖެހޭ އެންމެ ފަހުގެ ކަންކަން ނިންމައިފަ އެވެ.
ޔުނައިޓެޑް ވިކްޓަރީ އަށް މިދިޔަ ސީޒަނުގައި އިރުޝާދުދިން ކޯޗު، އިހުސާން އަބްދުލް ގަނީ (ސާންތީ) މި ވަގުތު ހުރީ އީގަލްސްއާ ހަވާލުވެ އެވެ. ގްރީން ސްޓްރީޓްސްގެ ކޯޗު އަލީ ނިސްތާރު މުހައްމަދު އަންނަނީ ރާއްޖޭގެ ފުޓްބޯޅަ ހާލަތާ ބެހޭގޮތުން ކަންބޮޑުވުންް ފާޅުކޮށް ސޯޝަލް މީޑިއާގައި ޝުއޫރުފާޅުކުރަމުންނެވެ. އެ ގޮތުން، ނިސްތާރު ވަނީ ފުރަތަމަ ޑިވިޝަންގެ މެޖޯރިޓީ ކްލަބްތަކަށް ގަވާއިދުން ކުޅުންތެރިންނަށް މުސާރަ ނުދެވޭތީ ގިނަ ކުޅުންތެރިންތަކެއް ފުޓްބޯޅަ ދޫކޮށް ދާކަން ފާހަގަކޮށްފަ އެވެ.
ޕްރެޒިޑެންޓްސް ކަޕްގައި ވާދަނުކުރިޔަސް، ގްރީން ސްޓްރީޓްސް އާއި ޔުނައިޓެޑް ވިކްޓަރީން ވެސް މަސައްކަތް ކުރަމުން އަންނަނީ ވީ އެންމެ އަވަހަށް ޕްރީ ސީޒަން ޕްރެކްޓިސް ފެށުމަށެވެ.
