މިހާރު ކުރިއަށްދާ ސްޓެލްކޯ ވެޓެރަންސް ލީގުގައި ހުޅުމާލެ ވެޓަރަންސް އިން ކުޅުނު ދެ ވަނަ މެޗުގައި އިއްޔެ ހަވީރު ކްލަބް ސްޓެލްކޯ އަތުން 4-0 އިން މޮޅުވެއްޖެ އެވެ.
މި ނަތީޖާއާ އެކު، ހުޅުމާލެ ވެޓެރަންސް އިން ވަނީ ކުއާޓާ ފައިނަލްގެ ޖާގައެއް ގާތްގަނޑަކަށް ކަށަވަރުކޮށްފަ އެވެ. އެންމެ ފަހުގެ ޗެމްޕިއަން، ހުޅުމާލެ ވެޓަރަންސް ދެ ވަނަ ގްރޫޕްގައި އޮތްއިރު، ކުޅުނު ފުރަތަމަ މެޗުން ވަނީ 1-1 އިން ދިވެހި ސިފައިންގެ ކްލަބާ އެއްވަރުވެފަ އެވެ. މި ގްރޫޕުން ތިން ޓީމު އަނެއް ބުރަށް ދާއިރު، ހުޅުމާލެ ވެޓަރަންސް ވަނީ ހަތަރު ޕޮއިންޓް ހަމަކޮށްފަ އެވެ. ދެން މި ގްރޫޕްގައި އޮތް ސްޓެލްކޯ، ސިފައިން އަދި ނިއު ރޭޑިއަންޓަށް ވެސް ވަނީ ޕޮއިންޓެއް ލިބިފަ އެވެ.
ޓާފް އެއް ނަމްބަރު ދަނޑުގައި އިއްޔެ ހަވީރު ކުޅުނު މެޗުގެ ފުރަތަމަ ހާފު ނިމުނީ ލަނޑެއް ނުޖެހި އެއްވަރުވެގެންނެވެ. ދެ ވަނަ ހާފުގައި ކުޅެން ނުކުމެ، ހުޅުމާލެ ވެޓެރަންސް ކޮޅަށް ނަތީޖާ އަނބުރާލުމުގައި އެންމެ ބޮޑު ދައުރެއް އަދާކުރީ މުހައްމަދު ޖަމީލް (ޖަމްބެ) އެވެ. އެ ގޮތުން، ހުޅުމާލެ ވެޓަރަންސް އިން ޖެހި ތިން ގޯލެއްގައި މެޗުގެ މޮޅު ކުޅުންތެރިޔާ ޖަމްބެ އިސް ރޯލެއް ކުޅުނެވެ.
ހުޅުމާލެ ވެޓަރަންސް އިން ލީޑުނެގީ އޭރިއާތެރެއިން ލިބުނު ފުރުސަތެއްގައި ހުސެއިން ޝިމާޒް (ކޮކީ) ޖެހި ގޯލަކުންނެވެ. މި ގޯލު ޖެހީ ފައުލެއް ކޮށްފައި ކަމަށް ސްޓެލްކޯ އިން އެޕީލްކުރި އެވެ. ހުޅުމާލެ ވެޓަރަންސްގެ ދެ ވަނަ ގޯލު ޖަމްބެ ވަނީ ހަަމަޖެހިލައިފައި ލިބުނު ފުރުސަތުން ގޯލަށް ބޯޅަ ވައްދާލައިފަ އެވެ. އޭގެ ފަހުން، ޖަމްބެ ބޮލުން ހުސްކޮށްލާފައި ދިން ބޯޅަ އެ ޓީމުގެ ކެޕްޓަން، އިސްމާއިލް މުހައްމަދު (އިއްސެ) ވަނީ ގޯލަށް ފޮނުވާލައިފަ އެވެ.
ހުޅުމާލެ ވެޓަރަންސްގެ ފަހު ގޯލު ވެސް ޖެހީ ޖަމްބެ އެވެ. އޭނާ މި ލަނޑު ޖެހީ ސްޓެލްކޯ ކީޕަރު ހުސެއިން ހަބީބް (ހަބީ) އަށް އެއްވެސް ފުރުސަތެއް ނުދީ އެވެ.
ވެޓަރަންސް ލީގުގައި މިއަދު ހަވީރު ކުޅޭ މެޗުގައި މޯލްޑިވްސް ސޮކަ މޭޓްސް (އެމްއެސްއެމް) ކުޅޭނީ ކްލަބް ގްރީން ސްޓްރީޓްސްއާ އެވެ. މެޗު ފަށާނީ 16:30 ގަ އެވެ. ސޮކަ މޭޓްސް ފުރަތަމަ މެޗު ހުއްރިއްޔާއާ އެއްވަރުވިއިރު، ގްރީން ސްޓްރީޓްސް ފުރަތަމަ މެޗުން ވަނީ ޕޮލިސް ކްލަބް އަތުން ބަލިވެފަ އެވެ.
