މިހާރު ކުރިއަށްދާ ސްޓެލްކޯ ވެޓެރަންސް ލީގު 2023 ގައި އިއްޔެ ހަވީރު ކުޅުނު މެޗުން ބުރު ސްޕޯޓްސް ކްލަބް 3-0 އިން ބަލިކޮށް ދަ ގްރާންޑޭ ސްޕޯޓްސް ކްލަބުން މުބާރާތުގެ ކުއާޓާ ފައިނަލުން ފުރުސަތު ހޯދައިފި އެވެ.
ތިން ޓީމު ހިމެނޭ ގްރޫޕް އޭގައި މިހާތަނަށް ވަނީ ދެ މެޗެއް ކުޅެފަ އެވެ. އެ ގޮތުން، މި ގްރޫޕްގެ ފުރަތަމަ މެޗުގައި ކްލަބް އީގަލްސް އިން ވަނީ 3-1 އިން ދަ ގްރާންޑޭ ބަލިކޮށްފަ އެވެ. ދެ ވަނަ މެޗުގައި ގްރާންޑޭ އިން ވަނީ 3-0 އިން ބުރުގެ މައްޗަށް ކުރިހޯދައިފަ އެވެ. ދަ ގްރާންޑޭ އެއް ވަނައިގައި އޮތީ ދެ ވަނައިގައި އޮތް އީގަލްސްއާ އެއްވަރަށް ތިން ޕޮއިންޓް ހޯދައިގެންނެވެ. ދަ ގްރާންޑޭ އަށް ކުރި ލިބެނީ ފައިދާ ގޯލު އެއްވަރުއިރު، ޖެހި ގޯލުންނެވެ.
މި ގްރޫޕުން ދެން އަނެއް ބުރަށް ދާ ޓީމެއް އެނގޭނީ މި މަހު 10 ވަނަ ދުވަހު ބުރާއި އީގަލްސް ކުޅޭ މެޗުންނެވެ. އެ މެޗު އެއްވަރުކޮށްލައިގެން ވެސް އީގަލްސް އަށް އަނެއް ބުރަށް ދެވޭއިރު، ބުރަށް އަނެއް ބުރުގެ ފުރުސަތު އޮތީ ހަތަރު ގޯލުގެ ފަރަގަކުން މޮޅުވެގެންނެވެ.
ޓާފް އެއް ނަމްބަރު ދަނޑުގައި އިއްޔެ ކުޅުނު މެޗުގެ ފުރަތަމަ ހާފުގައި ދަ ގްރާންޑޭ އަށް ބުރުގެ އޭރިއާތެރެއިން ލިބުނު ފުރުސަތެއްގައި ލީޑުނަގައިދިނީ އަލީ ނާޝިދު ގޯލު ޖަހައިގެންނެވެ. ބުރުން ވެސް ގޯލު ޖަހާނެ ފުރުސަތު ހޯދި މި މެޗުގައި، ދަ ގްރާންޑޭ އިން ވަނީ ދެ ވަނަ ހާފުގައި އިތުރު ދެ ގޯލު ޖަހައިފަ އެވެ. އެ ޓީމުގެ ދެ ގޯލު ވެސް ޖެހީ ކެޕްޓަން، އަހުމަދު ޝަކީބް އެވެ. މެޗުގެ މޮޅު ކުޅުންތެރިއަކަށް ވެސް ހޮވުނީ ޝަކީބް އެވެ.
މުބާރާތުގައި މިއަދު ހަވީރު، 16:30 ގައި ކުޅޭ މެޗުގައި ހުޅުމާލެ ވެޓެރަންސް ކްލަބް ބައްދަލުކުރާނީ ސްޓެލްކޯއާ އެވެ. ހުޅުމާލެ ވެޓެރަންސް ފުރަތަމަ މެޗު ސިފައިންނާ އެއްވަރުވިއިރު، ސްޓެލްކޯ އިން ވަނީ ނިއު ރޭޑިއަންޓާ އެއްވަރުކޮށްފަ އެވެ.
