ކުޅިވަރު ގާނޫނުގެ ތެރެއިން، ވުޖޫދުވި ސްޕޯޓްސް ކޯޕަރޭޝަން އުވާލުމުގެ ބައި ހިމެނޭ ގޮތަށް ސަރުކާރުގެ ފަރާތުން މަސައްކަތް ކުރައްވާ ހުޅުމާލެ ދާއިރާގެ އެމްޑީޕީ މެމްބަރު އަލީ ނިޔާޒު، ކުޅިވަރު ގާނޫނަށް މިއަދު އިސްލާހު ހުށަހަޅުއްވައިފި އެވެ.
ރައްޔިތުންގެ މަޖިލީހުގެ އެކި ޖަލްސާތަކުގައި މީގެ ކުރިން ޔޫތު މިނިސްޓަރު އަހުމަދު މަހުލޫފް ވަނީ މެމްބަރުންގެ ސުވާލުތަކަށް ޖަވާބުދެއްވަމުން ސްޕޯޓްސް ކޯޕަރޭޝަނަކީ ވަގުތުން ވަގުތަށް އުވާލަން ޖެހޭ ތަނެއް ކަމަށް ވިދާޅުވެފަ އެވެ. އެކަމަކު، މިހާތަނަށް އެ މޭރުމުން އެއްވެސް ކަމެއް ކުރެވިފައިނުވެ އެވެ.
ސްޕޯޓްސް ކޯޕަރޭޝަނަކީ 2015 ވަނަ އަހަރު ރައީސް އަބްދުﷲ ޔާމީން ތަސްދީގުކުރެއްވި ދިވެހިރާއްޖޭގެ ކުޅިވަރުގެ ގާނޫނުގެ ދަށުން އުފައްދާފައިވާ ކުންފުންޏެކެވެ. އެ ކުންފުނީގެ މަގުސަދުތަކުގެ ތެރޭގައި ރާއްޖޭގެ ކުޅިވަރުގެ އިންފްރާސްޓްރަކްޗާ ކުރިއެރުވުމާއި ސްޕޯޓްސް ޗެނަލެއް އުފެއްދުމާއި ކުޅިވަރު ކްލަބްތަކާއި އެސޯސިއޭޝަންތަކަށް މުދަލުގެ ބޭނުން ހިފުމުގެ މަގުފަހިކޮށްދީ އެނޫން ފަރާތްތަކަށް އެ މުދަލުން ވިޔަފާރި އުސޫލުން މަންފާ ހޯދައިދިނުން ހިމެނެ އެވެ. މީގެ އިތުރުން ކުޅިވަރު ދާއިރާ ތަރައްގީކުރުމާއި ޒުވާނުންނަށް ހިތްވަރުދީ ފުރުސަތު ފަހިކޮށް ކުޅުންތެރިންގެ ގާބިލްކަން ކުރިއެރުވޭނެ ޕްރޮގްރާމްތައް ރާވައި ހިންގުމާއި ކުޅިވަރު ދާއިރާގައި ހަރަކާތްތެރިވާ ފަރާތްތައް އިތުރަށް ކުރިއަރުވާ ތަމްރީން ހޯދާނެ މަގުފަހިކޮށްދިނުން ވެސް މަގުސަދުތަކުގެ ތެރޭގައި ހިމެނެ އެވެ.
ކުޅިވަރުގެ އެކި ކަންކަމުގައި މި ފަހުން އިސްކޮށް ހަރަކާތްތެރިވަމުން އަންނަ މެމްބަރު، އަލީ ނިޔާޒް ހުށަހެޅުއްވި ކުޅިވަރު ގާނޫނުގެ އިސްލާހަކީ މިނިސްޓަރު މަހުލޫފު މީގެ ކުރިން ދައްކަވަމުން އައި ސްޕޯޓްސް ކޯޕަރޭޝަން އުވާލުމުގެ ކަންކަމަށް ބާރު ލިބޭގޮތަށް ސަރުކާރުގެ ބައިވެރިވުން އޮވެގެން އައި ފުރަތަމަ މަސައްކަތެވެ.
ހުށަހެޅިފައިވާ އިސްލާހުގައިވާ ގޮތުން، ސްޕޯޓްސް ކޯޕަރޭޝަން އުވިގެންދާއިރު، ކުޅިވަރު ޕްރޮމޯޓްކުރަން އުފައްދައި، ދައުލަތުގެ މީޑިއާއާ އިންވެފައި އޮތް ޗެނަލް "ޔެސް ޓީވީ" ވެސް އުވިގެންދާ ގޮތަށް އިސްލާހުގައި ވަނީ ހިމަނައިފަ އެެވެ.
ސްޕޯޓްސް ކޯޕަރޭޝަން އުވާލުމުގެ ބައިގެ އިތުރުން ކުޅިވަރު ގާނޫނަށް ދެން ހުށަހެޅި މި އިސްލާހުގައި ވަނީ ކުޅިވަރު ގާނޫނުގައި ހުރި ފުށުއެރުންތައް ނައްތާލައި، ޔޫތު މިނިސްޓަރީ އާއި ޔޫތު މިނިސްޓަރު އަދި ސްޕޯޓްސް ކޮމިޝަނަރު އަދާކުރަން ޖެހޭ ޒިންމާތައް ކުރިއަށް ވުރެ ރަނގަޅު އުސޫލެއްގެ ތެރެއިން ފެއްތުމަށް ބައިތަކެއް ހިމަނައިފަ އެެވެ.
އަލީ ނިޔާޒް ވިދާޅުވީ މި އިސްލާހުގެ ސަބަބުން ކުޅިވަރުގައި މިހާރު ހުރި މުހިންމު ކަންތައްތަކަށް ހައްލެއް ލިބި، މިހާރު ހުރި މައްސަލަތަކާއި ގޮންޖެހުންތަކަށް ހަރުދަނާ އުސޫލުތަކެއްގެ ތެރެއިން ކަންކަން ގެންދަން ފަސޭހަވެގެންދާނެ ކަމަށެވެ.
ކުޅިވަރު ގާނޫނުގެ މި އިސްލާހަށް ރައްޔިތުންގެ މަޖިލީހުގެ މިއަދުގެ ޖަލްސާގައި ކުރެއްވި ބަހުސްގައި ސަރުކާރަށް ތާއީދުކުރައްވާ އެމްޑީޕީ މެމްބަރުން ވަނީ މި އިސްލާހާ އެއްކޮޅަށް ވާހަކަ ދައްކައިފަ އެވެ.
އިސްލާހުގައި ހުރި ކަންކަމާ ދެކޮޅަށް ވާހަކަދެއްކެވި މެމްބަރުންގެ ތެރޭގައި ރައީސް މުހައްމަދު ނަޝީދު އަށް ތާއީދުކުރައްވާ އެމްޑީޕީ މެމްބަރުން ހިމެނިވަޑައިގަންނަވަ އެވެ.
އެ ގޮތުން މިއަދުގެ ޖަލްސާގައި ކުރީގެ ސްޕޯޓްސް މިނިސްޓަރު އަދި ހެންވޭރު ހުޅަނގު ދާއިރާގެ މަޖިލިސް މެންބަރު ހަސަން ލަތީފް ވަނީ ހުށަހެޅުނު މި އިސްލާހުގައި މުހިންމު ބައެއް އުނިވެފައިވާކަން ފާހަގަކުރައްވައިފަ އެވެ.
ހަސަން ވިދާޅުވީ ދުނިޔޭގެ ހުރިހާ ކުޅިވަރު ޖަމިއްޔާތަކުން ވެސް ފާހަގަކުރާ އެއް ކަމެއް އަދި ލާޒިމްކުރާ އެއް ކަމަކީ ކުޅިވަރުގެ މައިދާނުގައި ޖެހޭ މައްސަލަތައް ހައްލުކުރެވޭނެ ކުޅިވަރުގެ "ޑިސްޕިއުޓް ރިޒޮލިއުޝަން މެކޭނިޒަމް" އޮންނަން ޖެހޭނެ ކަން ކަމަށެވެ.
އެ ގޮތުން، ކުޅިވަރާ ބެހޭ ގާނޫނުގެ ހުރިހާ ވާހަކައެއް މިހާތަނަށް އައިއިރު، ސްޕޯޓްސް އާބިޓްރޭޝަން ބައި އޮތް ކަމަށާއި އަދި ރައީސް އިބްރާހިމް މުހައްމަދު ސޯލިހުގެ ސަރުކާރު ވެރިކަމަށް އައިއިރުގައި އޮތް ސްޓްރެޓީޖިކް އެކްޝަން ޕްލޭނުގައި ފުރަތަމަ ތިން އަހަރު ތެރޭ ކުރެވޭނެ ކަންތައްތަކުގެ ތެރޭގައި ވެސް ސްޕޯޓްސް އާބިޓްރޭޝަން އޮންނާނެ ގޮތުގެ ތަސައްވުރެއް އޮތް ކަމަށާއި އެހެން ނަމަވެސް ހުށަހެޅުނު އާ ކުޅިވަރު ގާނޫނުގެ އިސްލާހުގައި އެ ބައި މި އޮތީ އުވާލާފައި ކަމަށް ހަސަން ވިދާޅުވި އެވެ.
ހަސަން ވިދާޅުވީ މި އިސްލާހުގެ މައިގަނޑު މަގުސަދަކީ ސްޕޯޓްސް ކޯޕަރޭޝަން އުވާލުން ކަމަށާއި ދެން ހިމަނާފައި އެ ހުރި ބައިތަކަކީ މާ ބޮޑަށް ވިސްނައިގެން ކަންކަން ކުރުމުގެ ބަދަލުގައި ހިމަނާފައިވާ "ކޮސްމެޓިކް" ބައިތަކެއް ކަމަށެވެ.
ހަަސަން ވިދާޅުވީ ކުޅިވަރުގެ ގާނޫނުގެ އާ އިސްލާހު އޮތީ ރައްޔިތުންނަށް އޮޅޭ ގޮތަށް ކޮރަޕްޝަނަށް މަގުފަހިވާ ގޮތަށް ކަމަށެވެ.
ހަސަން ވެސް ވަނީ މީގެ ކުރިން ކުޅިވަރު ގާނޫނަށް އިސްލާހެއް ހުށަހަޅުއްވައިފަ އެވެ. އެ ގޮތުން، 2020 ވަނަ އަހަރުގެ އޮކްޓޫބަރު މަހު ހުށަހެޅި އިސްލާހު، ރައްޔިތުންގެ މަޖިލީހުގެ އިޖުތިމާއީ ކޮމިޓީގައި ދިރާސާ ކުރުމަށް ފަހު މަޖިލީހުގެ ރިޔާސަތަށް އަލުން ގެނައިއިރު، ބިލް ކުރިއަށް ނުގެންގޮސް ބޭރުކޮށްލަން ނިންމީ މިދިޔަ އަހަރުގެ ޖޫން މަހުގަ އެވެ.
