ކުރީގެ ފުޓްބޯޅަ ކުޅުންތެރިންނަށް ހާއްސަކޮށްގެން ކޮންމެ ރަމަޟާން މަހެއްގައި ކުރިއަށްދާ ވެޓެރަންސް ލީގުގެ މި ފަހަރުގެ މުބާރާތުގައި، ކްލަބް އީގަލްސް އިން ދަ ގްރާންޑޭ ސްޕޯޓްސް ކްލަބް އަތުން 3-1 އިން މޮޅުވެ، މުބާރާތުގެ ފުރަތަމަ މޮޅު ހޯދައިފި އެވެ.
ޓާފް އެއް ނަމްބަރު ދަނޑުގައި އިއްޔެ ހަވީރު ކުޅުނު މި ފަަހަރުގެ ވެޓެރަންސް މުބާރާތުގެ ފުރަތަމަ މެޗުގެ ފުރަތަމަ ހާފު އީގަލްސް އިން ނިންމާލީ ދެ ގޯލުގެ ލީޑެއްގައި އޮވެ އެވެ. ދެ ވަނަ ހާފުގައި ކ. މާފުށްޓަށް ނިސްބަތްވާ ދަ ގްރާންޑޭ އިން ކޮންމެ ވެސް ވަރަކަށް ކުޅުން ރަނގަޅު ކުރި ނަމަވެސް އީގަލްސް އިން ވަނީ ރަނގަޅު ރޫހެއްގައި ކުޅެލައި މެޗުން މޮޅުވެފަ އެވެ.
މި މެޗުގެ 21 ވަނަ މިނިޓްގައި އީގަލްސް އިން ލީޑުނެގީ އަހުމަދު ހުސެއިން ޖެހި ގޯލުންނެވެ. އޭގެ ތިން މިނިޓް ފަހުން، އަހުމަދު ތަހުލީމް ގޯލެއް ޖަހައި، އީގަލްސްގެ ލީޑުފުޅާކޮށްދިނެވެ. ދެ ގޯލުގެ ލީޑެއްގައި އޮވެ، ދެ ވަނަ ހާފް ފަށައިގެން ވެސް ފުރަތަމަ ލަނޑު ޖެހީ އީގަލްސް އިންނެވެ. މި ލަނޑު އީގަލްސް ޓީމަށް ޖަހައިދިނީ ފުރަތަމަ ގޯލު ޖެހި އަހުމަދު ހުސެއިން އެވެ.
ދަ ގްރާންޑޭ އަށް މެޗުގައި ޖަހައިދިން ހަމައެކަނި ގޯލު ކާމިޔާބުކޮށްދިނީ މެޗުގެ ފަހު ކޮޅުގައި ހުސެއިން ޝަރީފް އެވެ.
ޖުމްލަ އެކު، 11 ޓީމު ވާދަކުރާ މި ފަހަރުގެ ވެޓެރަންސް ލީގު ވެސް އިންތިޒާމްކުރަނީ މިދިޔަ އަހަރެކޭ އެއްގޮތަށް ކްލަބް އިވެންޓްސް އިންނެވެ. މި ފަހަރުގެ މުބާރާތުގެ ސްޕޮންސަރުންނަކީ ސްޓެލްކޯ އެވެ.
މި ފަހަރުގެ ވެޓެރަންސް ލީގުގައި ކުޅޭ 11 ޓީމު ބަހާލެވިފައިވަނީ ތިން ގްރޫޕް އަކަށެވެ. އެ ގޮތުން، ފުރަތަމަ ގްރޫޕްގައި ތިން ޓީމު އޮތްއިރު، އަނެއް ދެ ގްރޫޕް ވެސް އެކުލެވިފައި އޮތީ ހަތަރު ޓީމު ކުޅޭ ގޮތަށެވެ. ގްރޫޕް އޭގައި އީގަލްސް އާއި ދަ ގްރާންޑޭގެ އިތުރުން ދެން އޮތީ މުޅިން އަލަށް ވެޓެރަންސް މުބާރާތެއްގައި ކުޅޭ ބުރު ސްޕޯޓްސް ކްލަބް އެވެ. ދެ ވަނަ ގްރޫޕްގައި އޮތީ އެންމެ ފަހުގެ ޗެމްޕިއަން، ހުޅުމާލެ ވެޓެރަންސް ކްލަބާއި ދިވެހި ސިފައިންގެ ކްލަބް، ސްޓެލްކޯ އަދި ނިއު ރޭޑިއަންޓް ސްޕޯޓްސް ކްލަބް އެވެ. އަދި ތިން ވަނަ ގްރޫޕްގައި އޮތީ ސޮކަ މޭޓްސް އާއި ހުރިއްޔާ، ގްރީން ސްޓްރީޓްސް އަދި ޕޮލިސް ކްލަބް އެވެ.
މުބާރާތުގައި މިއަދު ހަވީރު 16:30 ގައި ފަށާ މެޗުގައި އެންމެ ފަހުގެ ޗެމްޕިއަން، ހުޅުމާލެ ވެޓްރަންސް ކްލަބުން ބައްދަލުކުރާނީ ދިވެހި ސިފައިންގެ ކްލަބާ އެވެ.
