ވީގޯ، ސްޕެއިން (މާޗް 30) - ސްޕެނިޝް ލީގުގެ ސެލްޓަ ވީގޯ އަށް ކުޅެމުން އަންނަ ހުނަރުވެރި މިޑްފީލްޑަރު، ގަބްރީ ވެއިގާ އަށް ގިނަ ކްލަބްތަކެއްގެ ހުށަހެޅުން ލިބިފައިވާއިރު، ކުރިއަށް އޮތް ސީޒަނަށް ތައްޔާރުވާއިރު، ޓީމުތަކުގެ މެދުގައި އެންމެ ޑިމާންޑް ބޮޑު ކުޅުންތެރިންގެ ލިސްޓުގެ ކުރީގައި އޭނާގެ ނަން އޮންނާނެ ކަމަށް ރިޕޯޓްތައް ބުނެފި އެވެ.
ގަބްރީ ވެއިގާ، 20، މި ވަގުތު ސެލްޓަ ވީގޯގެ ކޮންޓްރެކްޓްގައި ހުރީ 2026 ވަނަ އަހަރުގެ ޖޫން މަހުގެ ނިޔަލަށެވެ. އޭނާގެ އެ ކޮންޓްރެކްޓް ގަންނަން ބޭނުންވާ ކްލަބަކުން ދައްކަން ޖެހޭ އަގު އުޅެނީ 40-50 މިލިއަން ޑޮލަރުގައި ކަމަށް ސްޕެއިނުގެ މީޑިއާތަކުން ވަނީ ރިޕޯޓްކޮށްފަ އެވެ.
ސްޕެއިނުގެ ފުޓްބޯޅަ ތަޖުރިބާކާރުންނާއި ޔޫރަޕްގެ ވަރުގަދަ މީޑިއާތަކުން ރިޕޯޓްކުރާ ގޮތުގައި ގަބްރީ ވެއިގާގެ ސޮއި ހޯދަން މި ވަގުތަށް ބަލާއިރު، ޝައުގުވެރިކަން ފާޅުކޮށްފައިވާ ކްލަބްތަކުގެ ތެރޭގައި، އާސެނަލް، މެންޗެސްޓާ ސިޓީ، ރެއާލް މެޑްރިޑް، ބަޔާން މިއުނިކް، ލިވަޕޫލް އަދި އޭސީ މިލާން ހިމެނެ އެވެ.
ރެއާލްގެ މެދުތެރެއަށް ސްޕެއިންގެ މިޑްފީލްޑަރަކު ގެންނަން ކުރާ މަސައްކަތުގައި އެ ޓީމުގެ އެއް ވަނަ ޓާގެޓަކީ ގަބްރީ ވެއިގާ އެވެ. ސިޓީން އިލްކާއި ގުންޑޮގާން މި ސީޒަނަށް ފަހު ޓީމު ދޫކޮށްލާނެ ކަމަށް ބެލެވޭއިރު، އެ މަގާމަށް ގެންނަން ސިޓީގެ ކޯޗު ޕެޕް ގާޑިއޯލާ ބޭނުންވާ އެއް ކުޅުންތެރިއަކީ ގަބްރީ ވެއިގާ އެވެ. ސެލްޓަ ވީގޯ އިން އެންމެ ފަހުން ލިވަޕޫލަށް ގެނައި މިޑްފީލްޑަރު، ސްޓެފަން ބަޖެޓިޗް ރަނގަޅުވުމުން، އެ ޓީމުން އަނެއްކާ ވެސް ސެލްޓަ ވީގޯ އިން އިތުރު ކުޅުންތެރިއަކު ގެންނަން ބޭނުންވެ، ގަބްރީ ވެއިގާ އަށް ފާރަލާ ކަމަށް ރިޕޯޓްތައް ބުނެ އެވެ.
މި ސީޒަނުގައި ސެލްޓަ ވީގޯ އަށް 29 މެޗުން ނުވަ ލަނޑު ޖަހައި، ތިން ގޯލު ޖަހަން ފުރުސަތު ހޯދައިދިން، ގަބްރީ ވެއިގާ އަކީ ސްޕެއިންގެ ފުޓްބޯޅައިގައި މި ސީޒަނުގައި އެންމެ ބޮޑު ކުރިއެރުމެއް ހޯދި މިޑްފީލްޑަރެވެ.
