އިންޑިއަން ގްރޯން ޕްރީގެ ދެ ވަނަ މުބާރާތުން ރާއްޖޭގެ އެންމެ ބާރު ދުވުންތެރިޔާ، ހަސަން ސާއިދު ރިހި މެޑަލަކާއި ލޯ މެޑަލް އެއް ހޯދައިފި އެވެ.
މީގެ ހަފްތާއެއްހާ ދުވަސް ކުރިން އިންޑިއަން ގްރޯޕް ޕްރީގެ މި ފަހަރުގެ ފުރަތަމަ މުބާރާތުން ސާއިދު ވަނީ 100 މީޓަރާއި 200 މީޓަރުގެ ރޭހުން ރަން މެޑަލް ހޯދައިފަ އެވެ. އެކަމަކު، މިއަދު ކުރިއަށްދިޔަ ގްރޯން ޕްރީގެ ދެ ވަނަ މުބާރާތުގައި ސާއިދަށް 100 މީޓަރު ދުވުމުން ލޯ މެޑަލް ލިބުނުއިރު، 200 މީޓަރު ދުވުމުން ލިބުނީ ރިހި މެޑަލް އެވެ.
މިއަދު ކުރިއަށް ދިޔަ އެ ދެ އިވެންޓްގައި ވެސް ވަނަ ކަނޑައަޅާފައިވަނީ ދެ ހީޓުގެ ޖުމްލަ ޓައިމިން އަށް ބަލައިގެންނެވެ. އެ ގޮތުން 100 މީޓަރު އިވެންޓްގައި ސާއިދަށް ލޯ މެޑަލް ލިބުނަސް އޭނާ ވާދަކުރި ހީޓުގެ އެއް ވަނަ ހޯދި އެވެ. އެއީ 10.76 ސިކުންތުން ދުވެގެންނެވެ. ސާއިދަށް ވުރެ ކުރިން ނިންމީ އަނެއް ހީޓުގައި ވާދަކުރި ހަރްޔާނާގެ ސަންޖީތު އާއި އޮޑިޝާގެ އަމިޔާ އެވެ. ސަންޖީތު ވަނީ 10.65 ސިކުންތުން ރޭސް ނިންމައިފަ އެވެ. އަދި އަމިޔާގެ ޓައިމިން އަކީ 10.66 ސިކުންތެވެ. ސާއިދާ އެއް ހީޓުގައި ދުވުނު ރާއްޖޭގެ އަހުމަދު ނަޖުދާންގެ ޓައިިމިން އަކީ 11.59 ސިކުންތެވެ.
ސާއިދު، 200 މީޓަރު ރޭހުން ދެ ވަނަ ހޯދިއިރު، ވާދަކުރި ހީޓުގެ ވެސް ދިޔައީ ދެ ވަނަ އެވެ. އެ ގޮތުން، ސާއިދުއާ އެއް ހީޓެއްގައި ވާދަކޮށް، ކެރަލާގެ މުހައްމަދު ރޭސް ނިންމީ 21.54 ސިކުންތުންނެވެ. ސާއިދުގެ ޓައިމިން އަކީ 21.61 ސިކުންތެވެ.
އިންޑިއަން ގްރޯން ޕްރީގައި ވާދަކުރަމުން އަންނަ ދިވެހި އެތުލީޓުންނަކީ އިންޑިއަން ހައި ކޮމިޝަނުން ދިން ފުލް ޓައިމް ޓްރެއިނިން ސްކޮލަޝިޕެއްގައި އިންޑިއާގެ ބެންގަލޫރުގައި ޓްރެއިނިން ހަދަމުން އަންނަ ގައުމީ އެތުލީޓުންނެވެ. މިއީ މި އަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަށް ތައްޔާރުވުމުގެ ގޮތުން ކުރިއަށްގެންދާ ޓްރެއިނިން އެކެވެ.
