ލަންޑަން، (މާޗް 25) - މިދިޔަ ޖެނުއަރީ ޓްރާންސްފާގައި ޗެލްސީއާ ގުޅުނު ޒުވާން ކުޅުންތެރިޔާ މިކައިލޯ މުޑްރިކާ މެދު އެކުލަބުން ކެތްތެރިވުމަށް ޔޫކްރެއިނާއި ޗެލްސީގެ ކުރީގެ ފޯވާޑް އަންދްރޭ ޝެވްޗެންކޯ ބުނެފި އެވެ.
އާސެނަލުން ފާރަލައިގެން ތިއްބައި ފަހު ވަގުތު މުޑްރިކް ޗެލްސީ އަށް ބަދަލުވީ 89 މިލިއަން ޕައުންޑް (100 މިިލިއަން ޑޮލަރު)ގެ ޓްރާންސްފާ ފީއެއްގަ އެވެ. މިހާތަނަށް ޗެލްސީ އަށް އޭނާ ވަނީ ހަތް މެޗު ކުޅެދީފަ އެވެ. މި ހަ މެޗުގައި އޭނާ އަށް ގޯލެއް ނުޖެހުނުއިރު ކުރެވުނީ އެންމެ އެސިސްޓެކެވެ.
މުޑްރިކް އާ ގުޅޭގޮތުން ޗެލްސީގެ ކުރީގެ ފޯވާޑް ޝެވްޗެންކޯ ބުނީ މުޑްރިކަކީ ވަރަށް ހުނަރުވެރި ޒުވާން ކުޅުންތެރިއެއް ކަމަށާއި، ޗެލްސީއާއިއެކު އުއްމީދީ ކުރިމަގެއް މުޑްރިކަށް އޮތް ކަމަށް ގަބޫލުކުރާކަމަށެވެ.
އޭނާ ބުނީ ޗެލްސީއާ އެކު މުޑްރިކަށް މިއީ ބޮޑު ކެރިއަރެއްގެ ފެށުން ކަމަށާއި، މި ދަނޑިވަޅުގައި ސަޕޯޓަރުންނާއި ކުލަބުން ވެސް އޭނާއާ މެދު ކެތްތެރިވާން ޖެހޭ ކަމަށެވެ.
"މުޑްރިކްގެ ފުރަތަމަ ފިޔަވަޅު ވަރަށް ރަނގަޅު. ޗެލްސީި އަށް އައުމަކީ ރަނގަޅު ނިންމުމެއް. މުސްތަގްބަލަށް ޗެލްސީން ޓީމެއް އެ ބިނާ ކުރަނީ. މި ދަނޑިވަޅުގައި މުޑްރިކް ހިތްވަރާ އެކު މަސައްކަތްކޮށްފި ނަމަ އޭނާ އަށް ރަނގަޅު ފުރުސަތެއް ލިބޭނެ" 2006 އިން 2007 އަށް ޗެލްސީ އަށް ކުޅުނު ޝެވްޗެންކޯ ބުންޏެވެ.
ޗެލްސީ އިން މުޑްރިކާ އެކު ހަދާފައިވާ ކޮންޓްރެކްޓާ ގުޅޭގޮތުން ޝެވްޗެންކޯ ބުނީ އަށް އަހަރުގެ ކޮންޓްރެކްޓެއްގައި މުޑްރިކް ސޮއިކުރުމުން ފުރަތަމަ ހައިރާންވި ކަމަށާއި، އެއީ ކުލަބުތަކުން ވަރަށް ނުކުރާ ކަމެއް ކަމަށެވެ. ނަމަވެސް އޭގެއިން އަންގައިދެނީ ކުރިމަގަށް ޗެލްސީން އިސްކަންދޭ މިންވަރު ކަމަށާއި، އެ ކުލަބުން އިންވެސްޓް އެ ކުރަނީ ކުރިމަގަށް ކަމަށެވެ.
އިޓަލީގެ އޭސީ މިލާނުން ޝެވްޗެންކޯ ޗެލްސީ އަށް 2006 ވަނަ އަހަރު ބަދަލުވީ އޭރު ކުލަބުގެ ރެކޯޑު ފީ އަކަށެވެ. ދެ ސީޒަންގައި އޭނާ 22 ގޯލު ޖެހި ނަމަވެސް އެ ކުލަބުގައި އެންމެ އެދެވޭ ކުޅުމެއް ޝެވްޗެންކޯ އަށް ނުދެއްކުނެވެ.
ޝެވްޗެންކޯ ބުނީ މުޑްރިކްގެ އުމުރުގައި ޗެލްސީ އަށް އޭނާ އަށް ބަދަލުވެވުނު ނަމަ ޕްރިމިއާ ލީގުގައި މާ ރަނގަޅު ކުޅުމެއް ދެއްކުނީސް ކަމަށެވެ.
ކުޅުން ހުއްޓާލުމަށް ފަހު ޝެވްޗެންކޯ ފުރަތަމަ ނުކުންނަން ބޭނުންވީ ސިޔާސީ މައިދާނަށެވެ. އެކަމަކު، ފަހުން ފުޓްބޯޅަ ކޯޗިން އަށް އިސްކަންދިނުމަށް ފަހު ވަނީ ޔޫކްރެއިންގެ ގައުމީ ޓީމަށް ކޯޗުކޮށްދީފަ އެވެ. އެ ގޮތުން، 2016 އިން ފެށިގެން 2021 އަށް އޭނާ ޔޫކްރެއިންގެ ކޯޗަކަށް ހުރިއިރު، އޭނާ ވަނީ 2020ގެ ޔޫރޯ ކުއާޓާ ފައިނަލަށް ޔޫކްރެއިނ ގެންގޮސްދީފަ އެވެ.
