ބީނޯޒް އެރީޒް، އާޖެންޓީނާ (މާޗް 24) - ބައިނަލްއަގުވާމީ އެކުވެރިކަމުގެ މެޗެއްގައި ޕެނަމާ އަތުން 2-0 އިން އާޖެންޓީނާ މޮޅުވި މެޗުގައި ލިއޮނަލް މެސީ ޕްރޮފެޝަނަލް ފުޓްބޯޅަ ކެރިއަރުގައި ޖެހި 800 ވަނަ ގޯލު ކާމިޔާބުކުރިއިރު، މެޗަށް ފަހު އާޖެންޓީނާ އިން ފީފާ ވޯލްޑް ކަޕް ކާމިޔާބު ކުރުމުގެ އުފާފާޅުކުރުންތައް ބާއްވައިފި އެވެ.
މިއީ ގަތަރުގައި މިދިޔަ އަހަރު ބޭއްވި ފީފާ ވޯލްޑް ކަޕް ކާމިޔާބުކުރި އާޖެންޓީނާ އިން އެ މުބާރާތަށް ފަހު އަމިއްލަ ފަސްގަނޑުގައި ކުޅުނު ފުރަތަމަ މެޗެވެ.
އާޖެންޓީނާގެ މޮނިއުމެންޝިއަލް ސްޓޭޑިއަމްގައި ރޭ ކުޅުނު މެޗުގައި އެ ޓީމުން ދެ ގޯލު ވެސް ޖެހީ މެޗުގެ ދެ ވަނަ ހާފުގަ އެވެ. އެ ގޮތުން މެޗުގެ 78 ވަނަ މިނިޓްގައި އާޖެންޓީނާ އިން ލީޑުނެގީ ބަދަލަކަށް ކުޅެން އެރި ތިއާގޯ އަލްމާޑާ ޖެހި ގޯލުންނެވެ. މިއީ، މެސީ ޖެހި ހިލޭ ޖެހުމަކުން ހުރަސްދަނޑީގައި ޖެހިފައި ކުޅުމުގެ ތެރެއަށް ބޯޅަ އައި ވަގުތު އަލްމާޑާ އަށް ލިބުމުން އޭނާ ކާމިޔާބުކުރި ގޯލެކެވެ.
މެޗުގައި އާޖެންޓީނާގެ ދެ ވަނަ ލަނޑު ޖެހީ 89 ވަނަ މިނިޓްގައި މެސީ އެވެ. މިއީ ހިލޭ ޖެހުމަކުން މެސީ ޖެހި މޮޅު ގޯލެކެވެ. މި ލަނޑާ އެކު މެސީ ވަނީ ކެރިއަރުގައި 800 ގޯލު ހަމަކޮށްފަ އެވެ. އޭގެ ތެރެއިން ގައުމީ ޓީމަށް ވަނީ 99 ގޯލު ޖަހައިދީފަ އެވެ. ބާކީ ގޯލުތަކަކީ ކްލަބް ކެރިއަރުގައި ކާމިޔާބުކުރި ގޯލެވެ.
މެސީ ރޭގެ މެޗަށް ފަހު ސަޕޯޓަރުންނަށް ވޯލްޑް ކަޕްގެ ރެޕްލިކާ ޓްރޮފީއެއް ދައްކާލަނީ.
މެޗަށް ފަހު އާޖެންޓީނާ ކުޅުންތެރިން ވަނީ ދަނޑުމަތީގައި އެ ޓީމުގެ އާއިލާއާ އެކު ސަޕޯޓަރުންގެ ވެސް ހާޒިރުގައި ވަގުތުތަކެއް ހޭދަކޮށްފަ އެވެ. ސަޕޯޓަރުންނާ މުހާތަބުކޮށް ވާހަކަ ދައްކަމުން މެސީ ބުނީ ފުޓްބޯޅަ ކެރިއަރުގެ އެންމެ ފަހު އަހަރުތައް ހޭދަކުރަމުން އަންނައިރު، އާޖެންޓީނާއާ އެކު ބޮޑެތި ކާމިޔާބީތަކެއް ހާސިލްކުރެވުމަކީ ބޮޑު ހިތްހަމަޖެހުމެއް ކަމަށެވެ.
"އަހަރެން އަބަދުވެސް ދެކުނު ހުވަފެނެއް އެއީ ތި ސަޕޯޓަރުންނާ އެކު އުފާފާޅުކުރުންތަކެއް ބޭއްވޭނެ ދުވަހަކަށް. މިހާރު އަހަންނަށް މި ހިތްހަަމަޖެހުން މި ލިބެނީ ދެ ވަަނަ ފަހަރު. އެއް ފަހަރު ކޮޕަ އެމެރިކާ ތަށި ހިފައިގެން، މި ފަހަރު ވޯލްޑް ކަޕް ތަށްޓާ އެކު، މިއީ ހަނދާނުން ފޮހެލަން އުނދަގޫވާނެ ވަގުތުތަކެއް،" މެސީ ބުންޏެވެ.
ދާދި ފަހުން އާޖެންޓީނާއާ އެކު ހަދާފައިވާ ކޮންޓްރެކްޓް އާ ކުރި ސްކަލޯނީ ބުނީ އާޖެންޓީނާ ގައުމީ ޓީމުގައި މުސްތަގުބަލުގައި ބޭނުން ކުރެވޭނެ ފެންވަރު ރަނގަޅު ކުޅުންތެރިން ވެސް އެބަތިބި ކަމަށާއި ކުރިއަށް ހުރި މެޗުތަކުގައި އެ ކުޅުންތެރިންނަށް ކުޅުމުގެ ފުރުސަތު ލިބޭ މިންވަރު އިތުރުކުރެވޭނެ ގޮތްތަކެއް ހޯދާނެ ކަމަށެވެ.
