މިދިޔަ އަހަރު ކްލަބް މޯލްޑިވްސް ކަޕްގެ ފައިނަލްގައި އެމްޕީއެލް އާއި ޓީމު ފެނަކަ ބައްދަލުކުރި މެޗަށް ފަހު ހިނގައިދިޔަ ހަމަނުޖެހުމުގެ މައްސަލަ ބަލައި، ކްލަބް މޯލްޑިވްސް އިން ޓީމު ފެނަކަ އަށް ކުޅުނު އިބްރާހިމް މުބީން (މުއްކި) ތިން އަހަރަށް ސަސްޕެންޑްކޮށްފި އެެވެ.
ފައިނަލުގައި އެމްޕީއެލް އަތުން 2-1 އިން ފެނަކަ މޮޅުވި މި މެޗު ނިމުމާ އެކު ދަނޑުމަތީގައި މުއްކި އާއި އެމްޕީއެލްގެ އަލީ ހައިޝަމް (ޗުމްޕު)އާ ދެމެދު ހަމަަނުޖެހުމެއް ހިނގައިދިޔަ އެވެ. މި ހަމަނުޖެހުމުގައި ޗުމްޕުގެ އަތަށް ލިބުނު އަނިޔާ އަކަށް ފަރުވާ ވެސް ހޯދި އެވެ.
ރައީސް އިބްރާހިމް މުހައްމަދު ސޯލިހު ޝަރަފްވެރިކޮށްދެއްވި މި ފައިނަލް މެޗަށް ފަހު ހިނގައިދިޔަ މި ހަމަނުޖެހުމާއި މިދިޔަ އަހަރުގެ ކްލަބް މޯލްޑިވްސް ކަޕްގައި ހިނގައިދިޔަ އެހެން ކަންތައްތަކުގެ މައްސަަލަ ބަލައި ކްލަބް މޯލްޑިވްސް އިން މި ވަނީ ފިޔަވަޅު އަޅަައިފަ އެވެ.
އެ ގޮތުން، ކްލަބް މޯލްޑިވްސް އިން މައުލޫމާތު ދޭ ގޮތުގައި، ޑިސިޕްލިނަރީ މި މައްސަލަތައް ބެލުމަށް ފހު ނިންމާފައިވަނީ މުއްކި ތިން އަހަރަށް ސަސްޕެންޑް ކުރުމަށެވެ. އަދި މި ގޮތަށް ނިންމިއިރު، ޓީމު ފެނަކަ ވަނީ ހަމަނުޖެހުމުގެ ސަބަބުން 10،000 ރުފިޔާ އިން ޖޫރިމަނާކޮށްފަ އެވެ.
ހަމަނުޖެހުމުގެ ސަބަބުން، ޗުމްޕު ވެސް 3000 ރުފިޔާ އިން ޖޫރިމަނާ ކުރުމުގެ އިތުރުން އެމްޕީއެލް ޓީމު ވެސް ވަނީ 5000 ރުފިޔާ އިން ޖޫރިމަނާކޮށްފަ އެވެ.
މުބާރާތުގެ ސެމީ ފައިނަލުގައި ކްލަބް އެޗްޑީސީން ޕެނަލްޓީ ޖަހައިގެން އެމްޕީއެލް އަތުން ކެޓި މެޗަށް ފަހު، އެޗްޑީސީ ކުޅުންތެރިންނާއި އޮފިޝަލުން ކުޅިވަރުގެ ރޫހާ ހިލާފު އަމަލުތަކެއް ހިންގާފައިވާތީ އެޗްޑީސީ 10،000 ރުފިޔާ އިން ޖޫރިމަނާ ކުރުމުގެ އިތުރުން، އެޗްޑީސީގެ އެސިސްޓަންޓް ކޯޗު، އަހުމަދު ސިނާން މުހައްމަދު ވަނީ ދެ އަހަރަށް ސަސްޕެންޑްކޮށްފަ އެވެ. އަދި އެޗްޑީސީގެ ކުޅުންތެރިޔާ، އަބްދުﷲ ޝާފިއު (ޝާއްޕެ) އެއް މެޗަށް ސަސްޕެންޑް ކުރުމުގެ އިތުރުން 5000 ރުފިޔާ އިން ވަނީ ޖޫރިމަނާކޮށްފަ އެވެ.
ކްލަބް މޯލްޑިވްސް އިން ވަނީ މި އަހަރުގެ މުބާރާތް މެއި މަހުގެ 27 ވަނަ ދުވަހު ފަށަން ނިންމައިފަ އެވެ.
