ޒިއުރިކް (މާޗް 17) - ޔުއެފާ ޗެމްޕިއަންސް ލީގުގެ ކުއާޓާ ފައިނަލުގައި މިދިޔަ ދެ އަހަރުގެ ޗެމްޕިއަނުން ކަމަށްވާ ރެއާލް މެޑްރިޑާއި ޗެލްސީ ބައްދަލުކުރަން ޖެހުނުއިރު، މި ފަހަރުގެ މުބާރާތުގެ އެންމެ ފޯމުގައި އޮތް މެންޗެސްޓާ ސިޓީ އާއި ބަޔާން މިއުނިކް ބައްދަލުކުރަން ޖެހިއްޖެ އެވެ.
ކުއާޓާގެ އަނެއް ދެ މެޗުގައި، އިންޓަ މިލާނާއި ބެންފީކާ ބައްދަލުކުރާއިރު، އޭސީ މިލާނުން ނުކުންނާނީ ނަޕޯލީއާ ދެކޮޅަށެވެ.
ފުރަތަމަ ސެމީ ފައިނަލުގައި ބައްދަލުކުރަން ޖެހޭނީ ރެއާލާއި ޗެލްސީ ބައްދަލުކުރާ މެޗުން މޮޅުވާ ޓީމަކާއި ސިޓީ އާއި ބަޔާން ކުޅެގެން މޮޅުވާ ޓީމެކެވެ. އަދި ދެ ވަނަ ސެމީ ފައިނަލުގައި ކުޅޭނީ މިލާނާއި ނަޕޯލީ ކުޅެގެން މޮޅުވާ ޓީމަކާއި އިންޓަ އާއި ބެންފީކާގެ ކުރިމަތިލުމުން ކާމިޔާބު ހޯދާ ޓީމެކެވެ. މިހާރު އޮތްގޮތުން 2017 ވަނަ އަހަރުގެ ފަހުން ފުރަތަމަ ފަހަރަށް އިޓަލީގެ ޓީމަކަށް ޗެމްޕިއަންސް ލީގުގެ ފައިނަލުން ފުރުސަތު ލިބުން ހުއްޓުވުމުގެ ފުރުސަތު އޮތީ ބެންފީކާ އަށް އެކަންޏެވެ. މިއީ ފާއިތުވި 17 އަހަރު ތެރޭ އިޓަލީގެ ތިން ޓީމެއް ޗެމްޕިއަންސް ލީގުގެ ކުއާޓާގައި އޮތް ފުރަތަމަ ފަހަރެވެ.
ރެއާލުން މިދިޔަ އަހަރު ޗެމްޕިއަންސް ލީގުގެ ތަށި 14 ވަނަ ފަހަރަށް ހޯދިއިރު، ކުއާޓާ ފައިނަލުގައި ވަނީ ޗެލްސީ ކަޓުވާލައިފަ އެވެ. އަދި ސެމީ ފައިނަލުގައި ރެއާލުން ވަނީ ސިޓީގެ މައްޗަށް ކުރިހޯދައިފަ އެވެ. މި ފަހަރު ވެސް ރެއާލުން ފައިނަލަށް ދެވެން އޮތީ އެކަން ހާސިލްކޮޮށްގެންނެވެ. ޗެލްސީން މީގެ ދެ އަހަރު ކުރިން ޗެމްޕިއަންސް ލީގުގެ ތަށި ހޯދިއިރު، ސެމީ ފައިނަލުގައި ވަނީ ރެއާލްގެ މައްޗަށް ކާމިޔާބު ހޯދައިފަ އެވެ.
ކުއާޓާގައި ބަޔާން މިއުނިކާއި ސިޓީގެ މެޗު ހާއްސަަވަނީ ކޯޗު ޕެޕް ގާޑިއޯލާ އަށެވެ. ބާސެލޯނާއާ އެކު 2009 އާއި 2011 ގައި ޗެމްޕިއަންސް ލީގު ކާމިޔާބުކުރި ގާޑިއޯލާ އަށް އޭނާ ދެން ހަވާލުވި ދެ ކްލަބް، ބަޔާން އާއި ސިޓީގައި އަދި ޗެމްޕިއަންސް ލީގު ކާމިޔާބު ކުރެވިފައިނުވެ އެވެ. ސިޓީ ގޮވައިގެން 2021 ވަނަ އަހަރުގެ ފައިނަލުގައި ގާޑިއޯލާ ވަނީ ޗެލްސީ އަތުން ބަލިވެފަ އެވެ.
ނަޕޯލީން އިޓާލިއަން ލީގުގެ ޗެމްޕިއަންކަން، 1990 ވަނަ އަހަރުގެ ފަހުން ފުރަތަމަ ފަހަރަށް ހޯދުމާ ގާތުގައި އޮތްއިރު، މި ވަނީ އެ ކްލަބްގެ ތާރީހުގައި ފުރަތަމަ ފަހަރަށް ޗެމްޕިއަންސް ލީގުގެ ކުއާޓާ ފައިނަލަށް ދަތުރުކޮށްފަ އެވެ. ނަޕޯލީން ކުއާޓާގައި ކުޅޭ މިލާނަކީ ޗެމްޕިއަންސް ލީގުގެ ތަށި ހަތް ފަހަރު ހޯދާފައިވާ ޓީމެކެވެ. މިދިޔަ އަހަރު އިޓާލިއަން ލީގު ކާމިޔާބުކުރި މިލާން ޗެމްޕިއަންސް ލީގުގެ ގަދަ އަށް ޓީމު ތެރޭގައި ހިމެނިގެން ކުއާޓާ ފައިނަލުގައި މި ކުޅެނީ 11 އަހަރު ތެރޭ ފުރަތަމަ ފަހަރަށެވެ.
ޗެމްޕިއަންސް ލީގުގެ ކުއާޓާ ފައިނަލް މެޗުތައް އޮތީ 11، 12 އާއި 18، 19 ގަ އެވެ. މި އަހަރުގެ ފައިނަލް މެޗު ކުޅޭނީ ތުރުކީގެ އިސްތަންބޫލްގައި ޖޫން 10 ވަނަ ދުވަހުގަ އެވެ. ފައިނަލަށް ހޮވޭ ޓީމުތައް ކަނޑައަޅާ ސެމީ ފައިނަލް އޮތީ އަންނަ މެއި މަހު 9، 10 އާއި 16، 17 ގަ އެވެ.
