މެންޗެސްޓާ (މާޗް 17) - މެންޗެސްޓާ ސިޓީ ޓީމުގައި ތިބި ކުޅުންތެރިންނާ ބެހޭގޮތުންނާއި ސިޓީއާ ދެކޮޅަށް މެޗުތަކުގައި ކުޅޭ ޓީމުތަކާ ބެހޭ މައުލޫމާތު "ޓްވިޓާގައި އުޅޭ މީހުންނަށް" ވުރެ ބޮޑަށް އޭނާ އަށް އެނގޭ ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ.
އަންގާރަ ދުވަހުގެރޭ ޗެމްޕިއަންސް ލީގުގެ ގަދަ 16 ބުރުގެ ދެ ވަނަ ލެގުގައި ޖަރުމަނުގެ އާރްބީ ލައިޕްޒިގާ ދެކޮޅަށް ސިޓީން ކުޅުނު މެޗުގެ ކުރިން މީޑިއާ އިން ކުރި ސުވާލެއްގެ ޖަވާބުގައި ވާހަކަ ދައްކަމުން ސިޓީގެ ކޯޗު ގާޑިއޯލާ ބުނީ ސިޓީން ފުރަތަމަ ލެގުގައި 1-1 އިން ލައިޕްޒިގު ދަނޑުގައި އެއްވަރުވި މެޗުގައި ހިނގައިދިޔަ ކަންތައްތައް ވަރަށް ރަނގަޅަށް ދިރާސާ ކުރި ކަމަށެެވެ.
"އަހަންނަށް އެ ކަންކަން ދިޔަ ގޮތް ވަރަށް ރަނގަޅަށް އެނގޭ، ޓްވިޓާގައި އުޅޭ މީހުންނާ ދެން ވެސް ތިބި މީހުންނަށް ވުރެ ރަނގަޅަށް އަހަރެން އަމިއްލަ ޓީމާއި އިދިކޮޅު ޓީމުގެ ކަންކަން ހޯދަން،" ގާޑިއޯލާ ބުންޏެވެ.
ސިޓީން ވަނީ ދެ ވަނަ ލެގުގައި ލައިޕްޒިގު އަތުން 7-0 އިން މޮޅުވެފަ އެެވެ. އެ މެޗަށް ފަހު ގާޑިއޯލާއާ ނޫސްވެރިއަކު ކުރި ސުވާލެއްގެ ޖަވާބުގައި ބުނީ، ކުރިން ބުނި ގޮތަށް ޓީމުތަކުގެ މައުލޫމާތު އެއްކުރުމަކީ ކޯޗުންގެ ވަޒީފާގެ ބައެއް ކަމަށާއި ލައިޕްޒިގު އެހާ ތަފާތުކޮށް ބަލިކުރެވުނީ ސިޓީގެ ތައްޔާރީތައް ރަނގަޅުވުމުން ކަމަށެވެ.
ޗެމްޕިއަންސް ލީގުގެ ކުއާޓާ ފައިނަލުގައި ސިޓީ ކުޅެން ޖެހޭ ޓީމެއް އެނގޭނީ މިއަދު އޮންނަ ގުރުއަތުލުމަށް ފަހު އެވެ.
ސިޓީގެ އިތުރުން ކުއާޓާ ފައިނަލުގައި އޮތީ، އިޓަލީގެ އިންޓަ މިލާން، އޭސީ މިލާން، ނަޕޯލީ، ސްޕެއިނުގެ ރެއާލް މެޑްރިޑާއި ޖަރުމަނުގެ ބަޔާން މިއުނިކް, އިންގްލެންޑްގެ ޗެލްސީ އާއި ޕޯޗުގަލްގެ ބެންފީކާ އެެވެ.
