މެޑްރިޑް (މާޗް 15) - ޔުއެފާ ޗެމްޕިއަންސް ލީގުގެ ދެ ވަނަ ބުރުގެ ދެ ވަނަ ލެގުގައި ރެއާލް މެޑްރިޑްގެ ދަނޑުގައި އެ ޓީމާ ދެކޮޅަށް މިރޭ ނުކުންނައިރު ލިވަޕޫލަށް މުބާރާތުގައި ކުރިއަށް ދިއުމަށް އޮތީ "އެއް ޕަސެންޓް"ގެ ފުރުސަތެއް ކަމުގައި ވިޔަސް އެ އަށް ވެސް މަސައްކަތް ކުރާނެ ކަމަށް ލިވަޕޫލް ކޯޗު ކްލޮޕް ބުނެފި އެވެ.
މި ދިޔަ މަހު ލިވަޕޫލް ދަނޑުގައި ކުޅުނު ފުރަތަމަ ލެގުގައި އެ ޓީމުން ދެ ގޯލުގެ ލީޑެއް ނެގި ނަމަވެސް ރެއާލް ވަނީ ފަހަތުން އަރައި 5-2 އިން މޮޅުވެފަ އެވެ. އެހެންކަމުން، މިރޭ ރެއާލް ދަނޑުގައި މަދުވެގެން ތިން ގޯލުގެ ތަފާތުން މޮޅުވެގެން ނޫން ގޮތަކަށް މުބާރާތުގައި ކުރިއަށް ދިއުމުގެ ފުރުސަތު ލިވަޕޫލަށް ނެތެވެ.
މިރޭގެ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ކްލޮޕް ބުނީ މީގެ ތިން ހަފްތާ ކުރިން ލިވަޕޫލް ދަނޑުގައި އެ ނުކުތް ނަތީޖާއާ އެކު ރެއާލަަށް ވަނީ ގާތްގަނޑަކަށް ކުއާޓާ ފައިނަލުގެ ޖާގަ ލިބިފައި ކަމަށެވެ.
"އެ މެޗަށް ތިން ހަފްތާ ފަހުން އަހަރެމެން މި ތިބީ ދެ ވަނަ ލެގު ކުޅެން އައިސް. އެންމެ ޕަސެންޓެއްގެ ޗާންސެއް (ފުރުސަތެއް) އޮތަސް. އަހަރެން ބޭނުން އެ އަށް ވެސް މަސައްކަތް ކުރަން. ޔަގީންކަމާ އެކު ބުނަން ކެރޭ ވާހަކަ އަކީ އަހަރެމެން މި ތިބީ ވަރަށް އުނދަގޫ ޓީމަކާ ދެކޮޅަށް ކުޅެން އައިސް، މި މެޗުގެ އެއްވެސް ކަމެއް ފަސޭހައެއް ނުވާނެ،" ކްލޮޕް ބުންޏެވެ.
އަނިޔާގެ ސަބަބުން ލިވަޕޫލުން މި މެޗުގައި ކުޅޭނީ ސްޕެއިނުގެ ޒުވާން މިޑްފީލްޑަރު، ސްޓެފަން ބަޖެޓިޗް އާއި ކެޕްޓަން ޖޯޑަން ހެންޑަސަން ނުލަ އެވެ.
ޕްރިމިއާ ލީގުގައި މެންޗެސްޓާ ޔުނައިޓެޑް އަތުން ލިވަޕޫލް 7-0 އިން މޮޅުވި ނަމަވެސް އެންމެ ފަހުން ކުޅުނު މެޗުގައި ރެލިގޭޝަން ޒޯނުގައި އޮތް ބޯންމައުތު އަތުން ވަނީ 1-0 އިން ބަލިވެފަ އެވެ. ލިވަޕޫލް މި ފަހަރު ރަށުންބޭރުގައި ކުޅޭ މެޗުތަކުގައި އޮތީ ދަށް ރެކޯޑެކެވެ.
ކްލޮޕް ބުނީ ރެއާލް ފަދަ ވަރުގަދަ ޓީމަކާ ދެކޮޅަށް ކުޅޭއިރު، ނެގެޓިވް ވިސްނުމެއް އަންނަ ފަދަ ވާހަކަތަކެއް ދައްކަން ބޭނުންނުވާ ކަމަށެވެ.
ލިވަޕޫލާ ދެކޮޅަށް ކުޅޭ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ރެއާލްގެ ކޯޗު ކާލޯ އަންޗެލޮޓީ ބުނީ އޭނާގެ ޓީމުން މެޗަށް ނުކުންނާނީ ފުރަތަމަ ލެގުގައި އެ ހިނގާދިޔަ ކަންތައްތަކަށް މާ ބޮޑަށް ނުވިސްނައި އުނދަގޫ މެޗެއް ކުޅެންޖެހޭނެ ކަމަށް އެ އަށް ތައްޔާރުވެގެން ކަަމަށެވެ.
ލީގުގައި ރެއާލުން މި ހަފްތާގައި ކުޅުނު މެޗުގައި ރެއާލްގެ ކެޕްޓަން، ކަރީމް ބެންޒެމާ އަނިޔާގެ ސަބަބުން ނުކުޅުނު ނަމަވެސް މިރޭ ލިވަޕޫލާ ދެކޮޅަށް ފިޓް ކަމަށް އަންޗެލޮޓީ ވަނީ ބުނެފަ އެވެ.
ރެއާލް ދަނޑުގައި ލިވަޕޫލާ ދެކޮޅަށް ކުޅޭ މެޗު ފަށާނީ މިރޭ ރާއްޖެ ގަޑިން 1 ޖަހާއިރު އެވެ.
