މިލާން (މާޗް 14) - އިޓާލިއަން ލީގުގެ އެންމެ ފަހުގެ ޗެމްޕިއަން، އޭސީ މިލާން ރޭ ކުޅުނު މެޗުން ސެލަނިޓާނާއާ 1-1 އިން އެއްވަރުވެ، ގަދަ ހަތަރެއްގެ ރޭހުގައި މުހިންމު ފުރުސަތެއް ނަގާލައިފި އެވެ.
ރޭގެ މެޗުން މިލާން މޮޅުވިނަމަ، ދެ ވަނައިގައި އޮތް އިންޓަ މިލާނާ ޕޮއިންޓުގެ ގޮތުން އެއްވަރުވެ، ތިން ވަނަ އަށް ޖެހިލެވޭނެ އެވެ. އެކަމަކު، އެއްވަރުވުމުން މިލާން އޮތީ ހަތަރެއްގަ އެވެ.
އިޓާލިއަން ލީގުގެ އެއް ވަނައިގައި އޮތް ނަޕޯލީ އަށް 26 މެޗުން 68 ޕޮއިންްޓް ލިބިފައިވާއިރު، ދެ ވަނައިގައި އޮތް އިންޓަ އަށް 26 މެޗުން ވަނީ 50 ޕޮއިންޓް ލިބިފަ އެވެ. ތިން ވަނައިގައި ލާޒިއޯ އޮތީ 26 މެޗުން 49 ޕޮއިންޓާ އެކު އެވެ. ހަތަރު ވަަނައިގައި އޮތް މިލާނަށް ލިބިފައިވަނީ 26 މެޗުން 48 ޕޮއިންޓެވެ.
ޗެމްޕިއަންސް ލީގުގެ ކުއާޓާ ފައިނަލުން 11 އަހަރަށް ފަހު ފުރުސަތު ހޯދި މިލާން ރޭގެ މެޗު ފަށައިގެން ސެލަނިޓާނާ ކައިރީގައި ރަނގަޅަށް ކުޅުނެވެ. އެކަމަކު، ސެލަނިޓާނާ އަށް ވެސް ވަނީ ލަނޑު ޖަހާނެ ރަނގަޅު ދެ ފުރުސަތެއް ލިބިފަ އެވެ.
މިލާނުން މި މެޗުގައި ލީޑުނެގީ ފުރަތަމަ ހާފުގެ އިތުރު ވަގުތުގައި އިސްމާއިލް ބެނަސިއާ ނެގި ކޯނަރަކުން އޮލިވިއޭ ޖިރޫ ބޮލުން ޖެހި ގޯލުންނެވެ. ދެ ވަނަ ހާފުގެ ކުޅުން ފެށިގެން ހަ މިނިޓް ތެރޭގައި މިލާނަށް ލީޑުފުޅާކޮށްދޭން ރަފައެލް ލެއާއޯ އަށް ލިބުނު ފުރުސަތުގައި އޭނާ ޖެހި ބޯޅަ ދިޔައީ ގޯލާ ސީދާނުވެ އެވެ.
ސެލަނިޓާނާ އިން އެއްވަރުކުރީ މެޗުގެ 60 ވަނަ މިނިޓްގަ އެވެ. މިއީ ޑޮމަގޯއި ބްރަދަރިޗް އޭރިއާ އެތެރެއަށް ހުރަސްކޮށްލި ބޯޅައަކަށް ހުސްކޮށް އަރައި ބުލާއޭ ޑިއާ ޖެހި ގޯލެކެވެ.
އަލުން ލީޑުނަގަން މިލާނުން ކުރި މަސައްކަތުގައި މެޗުގެ 70 ވަނަ މިނިޓްގައި އެ ޓީމުގެ ބެނަސިއާ އަށް ފައުލެއް ކުރި ކަމަށް ޕެނަލްޓީއެއް ދޭން ފުރަތަމަ ނިންމި ނަމަވެސް ފަހުން ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ނިންމީ ޕެނަލްޓީ ދޭން ނުޖެހޭ ކަމަށެވެ.
ބަދަލަކަށް ކުޅެން އެރި، މިލާނުގެ ތަޖުރިބާކާރު ފޯވާޑް، ޒަލަޓާން އިބްރަހިމޮވިޗްގެ ބައިވެރިވުން އޮވެގެން، ލެއާއޯ ފޮނުވާލި ހަމަލާއެއް ސެލަނިޓާނާ ކީޕަރު، ގިލެރްމޯ އޮޗޯއާ ވަނީ ހުއްޓުވައިފަ އެވެ. އަދި ފަހުން މިލާނުގެ އަލެސަންދްރޯ ފްލޮރެންޒީ ޖެހި ބޯޅައެއް ގޯލު ރޮނގުމަތިން ސަލާމަތްކުރިއިރު، ސެލަނިޓާނާ އަށް ލީޑުނަގައިދޭން ކުރިން މިލާނަށް ކުުޅުނު ޕޮލެންޑްގެ ފޯވާޑް ކްރިސްޓޮފް ޕިއޮންޓެކް ޖެހި ޝޮޓް ކީޕަރު މައިކް މައިންގްނޯން ވަނީ މަތަކޮށްފަ އެވެ.
މިލާނުގެ ކޯޗު ސްޓެފާނޯ ޕިއޯލީ ބުނީ ލިބުނު ފުރުސަތުތަކަށް ބަލާއިރު، މިއީ މޮޅުވެވެން ޖެހޭނެ މެޗެއް ކަމަށެވެ. އަދި މިލާނުން ގޯލު ޖަހަން ލިބޭ ފުރުސަތުތަކުގައި ފަރުވާ ބަހައްޓައިގެން ކުޅެން ޖެހޭ ކަމަށް ޕިއޯލީ ވަނީ ބުނެފަ އެވެ.
