މެންޗެސްޓާ (މާޗް 11) - މެންޗެސްޓާ ޔުނައިޓެޑްގެ ކީޕަރު، ޑޭވިޑް ޑެހެއާގެ ކުޅުމުގެ ސްޓައިލުގައި ކަންބޮޑުވާ އެއް ކަމެއް އެބައޮތް ކަމަށް ޔުނައިޓެޑްގެ ކޯޗު އެރިިކް ޓެން ހާގް ބުނެފި އެވެ.
ބުރާސްފަތި ދުވަހުގެރޭ ޔުނައިޓެޑުން ޔޫރޮޕާ ލީގުގެ ގަދަ 16 ބުރުގެ ފުރަތަމަ ލެގުގައި އަމިއްލަ ދަނޑުގައި ރެއާލް ބެޓިސް އަތުން 4-1 އިން މޮޅުވި މެޗުގައި، ސްކޯ 1-1 ގައި އޮއްވައި، ޑެހެއާ، 32، އަތުން ހެދުނު ގޯހެއްގައި ބެޓިސް ލީޑުނެގުމާ ގާތަށް ޖެހިލި އެވެ. އެ ގޮތުން، ފުރަތަމަ ހާފުގެ ފަހުކޮޅުގައި ޑެހެއާ ކުރިއަށް ޖެހި ބޯޅައެއް ބެޓިސް ކުޅުންތެރިއަކަށް ލިބި އެ ޓީމުން ކުރި އެޓޭކުގައި ބޯޅަ އަމާޒުވީ ގޯލުގެ ދަނޑިއަށެވެ.
މެޗަށް ފަހު، އެކަމަށް އިޝާރާތްކޮށް ނޫސްވެރިއަކު ކުރި ސުވާލަކަށް ޖަވާބު ދެމުން ޓެން ހާގް ބުނީ، ޑެހެއާ، ޑިފެންސިވް އޭރިއާއިން އެ ޖަހާ ބޯޅަތަކުގައި ކަންބޮޑުވާ ކަންތައްތަކެއް، ޔުނައިޓެޑާ ހަވާލުވި އެންމެ ފުރަތަމަ ދުވަހުން ފެށިގެން ވެސް ފާހަގަކުރެވުނު ކަމަށެވެ.
"އެކަން އަހަންނަށް އެންމެ ފުރަތަމަ ދުވަހު ވެސް ފާހަގަވި، މިއަދު (ބުރާސްފަތި ދުވަހުގެރޭ) ވެސް އެކަން ފެނިއްޖެ، އެހެންވީމަ އެކަން އެބަޖެހޭ ރަނގަޅުވާން. މިހެން ބުނާއިރު ވެސް އަހަރެމެން ވިސްނާލަން ޖެހޭ މި ސީޒަނުގައި ޑެހެއާގެ ވަރަށް ރަނގަޅު މެޗުތަކެއް ފެނިގެން ގޮސްފިކަން،" ޓެން ހާގް ބުންޏެވެ.
"މި މެޗުގައި (ބެޓިސް މެޗުގައި) ޑެހެއާ އަތުން އެ ގޯސް ހެދުނު ސަބަބެއް ކަމަށް ވެދާނެ، މެޗު ކުޅުނީ ވަރަށް ވައިގަދަ ވަގުތެއްގައި. އެކަމަކު، މި ކަމަށް އަހަރެމެން އެބަޖެހޭ ހައްލުތަކެއް ގެންނަން، ޓްރެއިނިންގައި އެކަމަށް ސަމާލުވާނަން،"
ދާދި ފަހުން، ޑެހެއާ ވަނީ ޔުނައިޓެޑްގެ ލެޖެންޑަރީ ކީޕަރު، ޕީޓަ ޝްމައިކަލްގެ ކްލީންޝީޓް ރެކޯޑާ ހަމަކޮށްފަ އެވެ. ޑެހެއާ ވަނީ ކޮޅަށް ގޯލެއް ނުވައްދައި، 180 މެޗުގައި ކްލީންޝީޓް ހަދައިފަ އެވެ.
ޔުނައިޓެޑާ އެކު ޑެހެއާ ކޮންޓްރެކްޓްގައި ހުރީ މި ސީޒަނުގެ ނިޔަލަށެވެ. އާ ކޮންޓްރެކްޓެއް ހަދަން މަޝްވަރާތައް ކުރިއަށްދިޔަ ނަމަވެސް އަދި ދެ ފަރާތަށް އެއްބަސްނުވެވޭ ކަންތައްތައްކެއް އަދި ހުރުމުން އެއްބަސްވުމަކާ ހަމައަށް ނާދެވެ އެވެ. ރިޕޯޓްތައް ބުނާގޮތުން ޔުނައިޓެޑުން ހުށަހަޅަނީ އިތުރު ތިން އަހަރުގެ ކޮންޓްރެކްޓެކެވެ. އެކަމަކު، ޑެހެއާ ބޭނުންވާ މުސާރަ ދިނުމާ މެދު ޔުނައިޓެޑުން ގޮތެއް ނުނިންމަ އެވެ.
އެތުލެޓިކޯ މެޑްރިޑް ދޫކޮށް، ޑެހެއާ ޔުނައިޓެޑަށް ބަދަލުވީ 2011 ވަނަ އަހަރު އެވެ. ޔުނައިޓެޑުން ވަނީ އޭރު ޑެހެއާ ގަންނަން އެތުލެޓިކޯ އަށް 18 މިލިއަން ޕައުންޑް (24 މިލިއަން ޑޮލަރު) ދީފަ އެވެ.
ޑެހެއާ، ޔުނައިޓެޑް ދޫކޮށްލުމާ އެންމެ ގާތަށް ދިޔައީ 2015 ވަނަ އަހަރު އެވެ. އެ ފަހަރުގެ ޓްރާންސްފާ މާކެޓްގެ ފަހު ދުވަހު ޑެހެއާ އަށް ރެއާލް މެޑްރިޑަށް ސޮއިނުކުރެވުނީ ޔުނައިޓެޑުން ފަހު ވަގުތު ރެއާލަށް ބޭނުންވާ ލިޔެކިޔުންތައް ފެކްސް ނުކުރުމުންނެވެ. އޭގެ ފަހުން، ދޮޅު އަހަރެއްހާ ދުވަހުގެ މުއްދަތަށް ޔުނައިޓެޑާއި ޑެހެއާގެ ގުޅުން ހީނަރުވި އެވެ. އެކަމަކު، އަލުން ޓީމާ އެކު، ގުޅުން ރަނގަޅުވެ، ޑެހެއާ ވަނީ ގިނަ މެޗުތަކެއްގައި ޔުނައިޓެޑްގެ ކެޕްޓަންކަން ވެސް ކޮށްފަ އެވެ.
