ސޮނީ ސްޕޯޓްސް ގޯލްޑަން ފުޓްސަލް ޗެލެންޖްގެ ގަދަ 16 ބުރުގައި މިދިޔަ އަހަރުގެ ފައިނަލުގައި ވާދަކުރި ކ. ގާފަރާއި ތ. ތިމަރަފުށި ބައްދަލުކުރަން ޖެހިއްޖެ އެވެ.
މިދިޔަ އަހަރުގެ ގޯލްޑަން ފުޓްސަލް ޗެލެންޖްގެ ފައިނަލުގައި ގާފަރާއި ތިމަރަފުށި ބައްދަލުކުރިއިރު، ދެ ޓީމު އޮތީ، މެޗުގެ ފުރިހަމަ ވަގުތު ނިމުނުއިރު، 2-2 އިން އެއްވަރުވެފަ އެވެ. ޕެނަލްޓީގައި ތިމަރަފުށި މޮޅުވީ 3-2 އިންނެވެ. އެކަމަކު، މި ފަހަރުގެ ގޯލްޑަން ފުޓްސަލް ޗެލެންޖް ފަށަން ކުޅުުނު ޗެރިޓީ ޝީލްޑް މެޗުން ތިމަރަފުށި އަތުން ގާފަރު ވަނީ 3-0 އިން މޮޅުވެފަ އެވެ.
މި ފަހަރުގެ މުބާރާތުގައި ކ. އަތޮޅު ބުރުގައި ގާފަރު ވަނީ ފައިނަލުގައި ކ. ދިއްފުށި އަތުން ބަލިވެފަ އެވެ. އެކަަމަކު، ޒޯން ތިނެއްގެ ފައިނަލުގައި ރޭ ވަނީ އއ. އަތޮޅުގެ ޗެމްޕިއަން، ބޮޑުފޮޅުދޫ ބަލިކޮށްފަ އެވެ. ގޯލްޑަން ފުޓްސަލް ޗެލެންޖްގެ ދެ ފައިނަލުގައި ކުޅެ ބަލިވެފައިވާ ގާފަރުން މި ފަހަރުގެ މުބާރާތަށް ނުކުތީ ތަށްޓަށް އަމާޒުކޮށް ދުރާލާ ތައްޔާރުވެގެންނެވެ. އެއީ ކޯޗު އަބްދުﷲ ނަސީރު (އަބޯ)ގެ އިރުޝާދުގެ ދަށުންނެވެ.
ގޯލްޑަން ފުޓްސަލް ޗެެލެންޖްގެ ތަށި ތިން ފަހަރު ހޯދި ތިމަރަފުށްޓަށް މި ފަހަރުގެ މުބާރާތަކީ އެންމެ ރަނގަޅު މުބާރާތެއް ނޫނެވެ. އެ ގޮތުން، ފުރަތަމަ މެޗުގައި ގާފަރާ ކުޅެ ޝީލްޑް ގެއްލުނުއިރު، އަތޮޅު ތަށި ގެއްލުނީ ފައިނަލުގައި ފަހު ވަގުތު ތ. ކިނބިދޫ އަތުން ބަލިވެގެންނެވެ. ޒޯން ބުރުގައި ކުޅުން ރަނގަޅުކުރި ނަމަވެސް ޒޯން ފައިނަލުގައި ރޭ ވަނީ ދ. ކުޑަހުވަދޫ އަތުން ބަލިވެފަ އެވެ. ތިމަރަފުށީގެ ކޯޗު އަލީ ފަހުމީ (އައްޔަ) ހުރީ ގަދަ ކުރިއަށް އޮތް މެޗުން ރަނގަޅު ކުރުމުގެ އަމާޒުގަ އެވެ.
ގދ. 16 ބުރުގެ ހުރިހާ މެޗެއް މާދަމާ ރެ އަށް ތާވަލުކުރެވިފައިވާއިރު، ޒޯން އަށެއްގެ ޗެމްޕިއަން، ހދ. ނައިވާދޫ ކުޅޭނީ ޒޯން އަށެއްގެ ރަނަރަޕް، ވިލިމާލެއާ އެވެ. ޒޯން ދޭއްގެ ޗެމްޕިއަން، ރ. އިނގުރައިދޫ ކުޅޭނީ ޒޯން ހަތެއްގެ ރަނަރަޕް، ސ. ފޭދޫއާ އެެވެ. ޒޯން ހަތަރެއްގެ ޗެމްޕިއަން، ދިއްގަރު ބައްދަލުކުރާނީ ޒޯން ހައެއްގެ ރަނަރަޕް، ލ. ގަމާ އެވެ. ޒޯން ތިނެއްގެ ޗެމްޕިއަން، ގާފަރުން ޒޯން ފަހެއްގެ ރަނަރަޕް، ތިމަރަފުށްޓާ ކުޅޭއިރު، ޒޯން އަށެއްގެ ޗެމްޕިއަން، މާފަންނު ކުޅޭނީ ޒޯން ތިނެއްގެ ރަނަރަޕް، އއ. ބޮޑުފޮޅުދޫއާ އެވެ.
ޒޯން ހައެއްގެ ޗެމްޕިއަން، ގދ. ވާދޫން ނުކުންނާނީ ޒޯން ހަތަރެއްގެ ރަނަރަޕް، އދ. މާމިގިއްޔާ ދެކޮޅަށެވެ. ޒޯޯން ފަހެއްގެ ޗެމްޕިއަން، ކުޑަހުވަދޫން ޒޯން އެކެއްގެ ރަނަރަޕް، ށ. ކަނޑިތީމާ ކުޅޭއިރު، ޒޯން ހަތެއްގެ ޗެމްޕިއަން، ޏ. ފުވައްމުލަކު، ދަނޑިމަގު ބައްދަލުކުރާނީ ޒޯން ދޭއްގެ ރަނަރަޕް ބ. އޭދަފުށްޓާ އެވެ.
ގަދަ 16 ބުރުގެ މެޗުތައް
8 މާޗް 2023
20:00 - ހދ. ނައިވާދޫ/ ވިލިމާލެ
20:00 - ރ. އިނގުރައިދޫ/ ސ. ފޭދޫ
21:00 - މ. ދިއްގަރު/ ލ. ގަން
21:00 - ކ. ގާފަރު/ ތ. ތިމަރަފުށި
22:00 - މާފަންނު/ އއ. ބޮޑުފޮޅުދޫ
22:00 - ގދ. ވާދޫ/ އދ. މާމިިގިލި
23:00 - ދ. ކުޑަހުވަދޫ/ ށ. ކަނޑިތީމު
23:00 - ޏ. ފުވައްމުލަކު ދަނޑިމަގު/ ބ. އޭދަފުށި
