ބާސެލޯނާ (މާޗް 6) - ސްޕެނިޝް ލީގުގައި ރެއާލް މެޑްރިޑާއި ރެއާލް ބެޓިސް ލަނޑެއް ނުޖެހި 0-0 އިން އެއްވަރުވިއިރު، ބާސެލޯނާ އިން ލީގުގެ އެއް ވަނައިގައި ނުވަ ޕޮއިންޓުގެ ލީޑެއް ނަގައިފި އެވެ.
ބާސެލޯނާ އިން 1-0 އިން ވެލެންސިއާ ބަލިކުރި މެޗަށް ފަހު، ރެއާލުން ބެޓިސްއާ ބައްދަލުކުރި މެޗު ކުޅުނުއިރު، ރެއާލަށް މި މެޗުގައި މޮޅެއް ނުހޯދި ލީގުގެ ރޭހުގައި އިތުރު ގޮންޖެހުމެއް ވަނީ ކުރިމަތިވެފަ އެވެ. ބާސެލޯނާ އަށް 24 މެޗުން 62 ޕޮއިންޓް ލިބިފައިވާއިރު، ރެއާލްގެ އޮތީ 24 މެޗުން 53 ޕޮއިންޓެވެ.
އަމިއްލަ ދަނޑުގައި ކުޅުނު ބާސެލޯނާ އިން ރޭގެ މެޗުގައި ޖެހި ހަމައެކަނި ލަނޑު ކާމިޔާބުކުރީ 15 ވަނަ މިނިޓްގަ އެވެ. މިއީ، ސާޖީ ބުސްކެޓްސް ނެގި ބޯޅައަކުން ރަފީނިއާ ބޮލުން ޖެހި ގޯލެކެވެ. މި މެޗުގެ ދެ ވަނަ ހާފުގައި ބާސެލޯނާގެ ފެރާން ޓޮރޭޒް ފޮނުވާލި ޕެނަލްޓީ ވަނީ ގޯލުގެ ދަނޑިކައިރިން ބޭރުވެފަ އެވެ.
ބާސެލޯނާ އިން މި މެޗު ނިންމާލީ ކުޅުންތެރިއަކު މަދުކޮށެވެ. އެއީ މެޗުގެ 59 ވަނަ މިނިޓްގައި އެ ޓީމުގެ ރޮނާލްޑް އަރައުހޯ އަށް ސީދާ ރަތް ކާޑެއް ދެއްކުމުންނެވެ. އަރައުހޯ އަށް ރަތް ކާޑެއް ދެއްކީ ވެލެންސިއާގެ ހޫގޯ ޑޫރޯ ކުރަން އުޅުނު އެޓޭކެއް ހުއްޓުވަން ފައުލުކުރުމުންނެވެ.
މި މެޗުގައި ބާސެލޯނާ ކޮޅަށް ގޯލެއް ނުވަދެ ނިމުނުއިރު، މި ފަހަރުގެ ލީގުގައި އެ ޓީމުން ކުޅުނު 24 މެޗުގެ ތެރެއިން 18 މެޗު ނިމުނީ ކޮޅަށް ގޯލެއް ނުވަދެ އެވެ.
ބެޓިސް ދަނޑުގައި ރޭގެ މެޗުގައި ރެއާލްގެ ކަރިމް ބެންޒެމާ ޖެހި ގޯލެއް ބަލައިނުގަންނަން ނިންމީ އެ ޓީމުގެ އެންޓޯނިއޯ ރޫޑިގާ އަތުގައި ޖެހުމުންނެވެ. މި މެޗުގައި ރެއާލްގެ ބެންޒެމާ އާއި ވިނީޝިއުސް ޖޫނިއާ ފޮނުވާލި ހަމަލާތަކެއް ބެޓިސްގެ ކީޕަރު ކްލައުޑިއޯ ބްރާވޯ ވަނީ މަތަކޮށްފަ އެވެ. ބެޓިސް އަށް ގޯލު ޖަހައިދޭން ހުއާން މިރާންޑާ އާއި އަޔޯޒީ ޕެރޭޒް ފޮނުވާލި ޝޮޓްތައް ރެއާލްގެ ކީޕަރު ތިބޯ ކޯޓުއާ ވަނީ މަތަކޮށްފަ އެވެ.
މެޗަށް ފަހު ރެއާލްގެ ކޯޗު ކާލޯ އަންޗެލޮޓީ ބުނީ މި ހިސާބުން ރެއާލަށް ލީގު ދިފާއުކުރުމުގެ ހުރިހާ ދޮރެއް ބަންދުވީ ކަމަށް ގިނަ ބަޔަކަށް ހީވި ނަމަވެސް ރެއާލްގެ ކުޅުންތެރިން ތިބީ އެކަން އެ ގޮތަށް ދޫކޮށްލާ ގޮތަށް ނޫން ކަމަށެެވެ.
