ސޮނީ ސްޕޯޓްސް ގޯލްޑަން ފުޓްސަލް ޗެލެންޖްގެ އަތޮޅު ބުރުގެ ކުޅުން ނިމި ޒޯން ބުރުގެ މެޗުތައް ފަށާފައިވާއިރު، ޒޯން އެކެއްގެ ސެމީ ފައިނަލުން ށ. ކަނޑިތީމު ޖާގަ ޔަގީންކޮށްފި އެވެ.
ކަނޑިތީމު ވަނީ ރޭ ޒޯން އެކެއްގެ ދެ ވަނަ ގްރޫޕްގެ މެޗުގައި ހއ. ރަނަރަޕް، ފިއްލަދޫ އަތުން 4-2 އިން މޮޅުވެފަ އެވެ. ކަނޑިތީމު ވަނީ ޒޯން ފުރަތަމަ މެޗުން، ށ. ޗެމްޕިއަން، ފޯކައިދޫއާ ކުޅެގެން 1-1 އިން އެއްވަރުވެފަ އެވެ. އެހެންވެ، އެ ޓީމަށް ދެ މެޗުން ހަތަރު ޕޮއިންޓް ލިބި ސެމީ ޔަގީންވީ އެވެ. ދެން މި ގްރޫޕުން ސެމީގެ ޖާގަ ލިބޭނީ ފިއްލަދޫ އާއި ފޯކައިދޫ ކުޅޭ މެޗުންނެވެ. އެ މެޗު އެއްވަރުކޮށްލައިގެން ވެސް ފޯކައިދޫ އަށް ޒޯން ސެމީ އަށް ދެވޭނެ އެވެ.
ޒޯން އެކެއްގެ ފުރަތަމަ ގްރޫޕްގައި ކުޅުނު ފުރަތަމަ މެޗުން ހދ. ޗެމްޕިއަން، ނައިވާދޫ އަތުން ބަލިވި ހދ. ރަނަރަޕް ނޭކުރެންދޫން ވަނީ ރޭ ކުޅުނު ޒޯން ގްރޫޕްގެ މެޗުގައި ހއ.ގެ ޗެމްޕިއަން، އުތީމު އަތުން 3-0 އިން މޮޅުވެފަ އެވެ. މި ގްރޫޕްގައި ދެން އޮތީ އުތީމާއި ނައިވާދޫ ކުޅޭ މެޗެވެ. މި ގްރޫޕުން ސެމީ އަށް ދާ ދެ ޓީމެއް އެނގޭނީ އެ މެޗުގެ ނަތީޖާ އަށް ފަހު އެވެ.
ޒޯން ހައެއްގައި ރޭ ދެ މެޗު ކުޅުނުއިރު، އެއް މެޗުގައި ގދ. އަތޮޅުގެ ޗެމްޕިއަން، ވާދޫ ވަނީ 2-2 އިން ލ. އަތޮޅުގެ ޗެމްޕިއަން ގަމާ އެއްވަރުވެފަ އެވެ. ގއ. އަތޮޅުގެ ޗެމްޕިއަން މާމެންދޫ ވަނީ 2-1 އިން އެ އަތޮޅުގެ ރަނަރަޕް މާމެންދޫ ބަލިކޮށްފަ އެވެ.
ރެހެންދި ފުޓްސަލް ދަނޑުގައި ރޭ ކުޅުނު މެޗުގައި ކަނޑިތީމަށް ގޯލުތައް ޖަހައިދިނީ މުހައްމަދު ޝާން ދެ ގޯލާއި އަހުމަދު ޝިރުހާން އަދި އާދަމް ތައުފީގު އެވެ. ފިއްލަދޫގެ ގޯލުތައް ޖެހީ މުހައްމަދު ހުސާމް އާއި އިބްރާހިމް ފަޒީލް އެވެ. ނޭކުރެންދޫން ފަސޭހައިން އުތީމު ބަލިކުރިއިރު، ގޯލުތައް ޖެހީ ޝިފާޒް އާދިލް (ތުއްތު) އާއި މުހައްމަދު ފަރުހާން (ފަރުއްކޮ) އެވެ.
ސަސްޕެންޝަންގެ ސަބަބުން ވާދޫ އިން ޓީމުގެ މުހިންމު ދެ ކުޅުންތެރިން ނުލައި ކުޅުނު މި މެޗުގައި ވަނީ ގަން ކައިރީގައި ރަނގަޅަށް ކުޅެފަ އެވެ. އެ ގޮތުން، ގަމުން އަލީ ޝާމިސް (ތޮއްޕޭ) އާއި ހުސެއިން ޝަރީފް (އޮންލީ) ގޯލުތައް ޖެހިއިރު، ވާދޫގެ ލަނޑުތައް ޖެހީ މުސައްނިފު މުހައްމަދު (މުއްސަ) އާއި އަރުގަމް އިބްރާހިމް އެވެ.
ނިލަންދޫ ކޮޅަށް މާމެންދޫގެ ދެ ގޯލު ޖެހީ ރައުހާން ރިއްފަތު އާއި މުސީފް އަބްދުލް ގަފޫރު އެވެ. މެޗުގައި ނިލަންދޫގެ ހަމައެކަނި ގޯލު ޖެހީ އަލީ ޝާހިލް މުހައްމަދު އެވެ.
ގޯލްޑަން ފުޓްސަލް ޗެލެންޖްގައި މިރޭ އޮތީ ޒޯން ތިނެއް ހަތަރެއް އަދި ފަހެއް، ކޮންމެ ޒޯނެއްގެ ދެ މެޗާއި ޒޯން ދޭކާއި ހަތެއްގެ މެޗެކެވެ.
މިރޭގެ މެޗު ޝެޑިއުލް:
ޒޯން ތިނެއް: ކ. ގާފަރު - އއ. ބޮޑުފޮޅުދޫ (20:00)
ޒޯން ތިނެއް: ކ. ދިއްފުށި - ޅ. ކުރެންދޫ (20:00)
ޒޯން ހަތެއް: ޏ. ފުވައްމުލަކު/ދަނޑިމަގު - ސ. ފޭދޫ (21:00)
ޒޯން ދޭއް: ރ. އިނގުރައިދޫ - ބ. އޭދަފުށި (21:00)
ޒޯން ފަހެއް: ދ. ކުޑަހުވަދޫ - ފ. މަގޫދޫ (22:00)
ޒޯން ފަހެއް: ތ. ތިމަރަފުށި - ތ. ކިނބިދޫ (22:00)
ޒޯން ހަތަރެއް: އދ. މާމިގިލި - މ. ދިއްގަރު (23:00)
ޒޯން ހަތަރެއް: އދ. މަހިބަދޫ - މ. ނާލާފުށި (23:00)
