ކުރިން ލިވަޕޫލަށް ކުޅުނު، ޖަރުމަނުގެ ގޯލްކީޕަރު، ލޮރިސް ކާރިއަސް މިދިޔަ އަހަރު ސެޕްޓެމްބަރު މަހު ނިއުކާސަލް ޔުނައިޓެޑަށް ސޮއިކުރި ނަމަވެސް އަދި މިހާތަނަށް އެ ޓީމަށް މެޗެއް ކުޅެދީފައެއް ނުވެ އެވެ. ކާރިއަސް، ދެ އަހަރު ތެރޭގައި ކުޅޭނެ ރަސްމީ ފުރަތަމަ މެޗަކީ އިނގިރޭސި ލީގު ކަޕް ފައިނަލުގައި މިރޭ ނިއުކާސަލް އިން މެންޗެސްޓާ ޔުނައިޓެޑާ ދެކޮޅަށް ކުޅޭ މެޗުގަ އެވެ.
ކާރިއަސް، 28، މިރޭގެ މެޗުގައި ކުޅުވަން ޖެހުނީ ދިމާވި ހާލަތެއްގެ ސަބަބުންނެވެ. އިނގިރޭސި ޕްރިމިއާ ލީގުގައި ނިއުކާސަލް އިން ލިވަޕޫލް އަތުން ބަލިވި މެޗުގައި ނިއުކާސަލްގެ ކީޕަރު ނިކް ޕޯޕަށް ދެއްކި ރަތް ކާޑުގެ ސަބަބުން އޭނާ ހުރީ ސަސްޕެންޝަނެއްގަ އެވެ. ނިއުކާސަލްގެ ދެ ވަނަ ކީޕަރަކަށް ހުރީ މި ސީޒަނުގެ ފުރަތަމަ ބައިގައި ލޯން އުސޫލުން މެންޗެސްޓާ ޔުނައިޓެޑަށް ކުޅުނު ޗެކް ރިޕަބްލިކްގެ މާޓިން ޑުބްރާވްކާ އެެވެ. ޑުބްރާވްކާ، މި މުބާރާތުގައި ޔުނައިޓެޑްގެ ކުޅުންތެރިއެއްގެ ގޮތުގައި މެޗު ލިސްޓެއްގައި ހިމެނިފައިވާތީ، އޭނާ އަށް ފައިނަލްގައި ކުޅެން ގަވާއިދު ތަނެއް ނުދެ އެވެ.
އެހެންކަމުން، މިރޭ، ނިއުކާސަލްގެ ކޯޗު އެޑީ ހޯވް އަށް ވަނީ ތިން ވަނަ ކީޕަރަކަށް ހުރި ކާރިއަސް އަށް ފުރުސަތު ދޭން ޖެހިފަ އެވެ.
ކާރިއަސް އެންމެ ފަހުން މެޗެއް ކުޅެފައިވަނީ ލޯން އެއްބަސްވުމެއްގެ ދަށުން، ޖަރުމަނު ބުންޑަސްލީގާގެ ޔޫނިއަން ބާލިން އަށް ކުޅުނުއިރު، 2021 ވަނަ އަހަރުގެ ފެބްރުއަރީ 28 ވަނަ ދުވަހު އެވެ. އޭގެ ފަހުން، ކާރިއަސް، ލިވަޕޫލާ އެކު ހަދާފައި އޮތް ކޮންޓްރެކްޓް މިދިޔަ ސީޒަނުގެ ނިޔަލަށް ހަމަވުމާއި ދެ ފަހަރެއްގެ މަތިން މި ސީޒަންގެ ނިޔަލަށް ނިއުކާސަލްއާ އެކު އެއްބަސްވުމެއް ހެދި ނަމަވެސް ރަސްމީ މެޗެއްގައި ކުޅެލުމުގެ ފުރުސަތު ނުލިބެ އެވެ.
"ފުޓްބޯޅައިގެ ފުރިހަމަ ކަމަކީ ކޮންމެ ކުޅުންތެރިއަކަށް ކޮންމެ ފަދަ ފުރުސަތެއް ވެސް ލިބިދާނެ. އަހަރެމެންނަށް އޮތީ ޕްރޮފެޝަނަލުންގެ ގޮތުގައި މަސައްކަތް ކުރުން،" ކާރިއަސް އަށް މި ފުރުސަތު އައި ގޮތާ ބެހޭގޮތުން އެޑީ ހޯވް، ނިއުކާސަލްގެ މީޑިއާ އަށް ބުނެފައިވެ އެވެ.
ކާރިއަސްގެ ކެރިއަރުގައި އެންމެ ބޮޑު ލައްގަނޑެއް ޖެހިފައިވަނީ ވެސް ފައިނަލެއްގައި ހިނގައިދިޔަ ކަމެއްގެ ސަބަބުންނެވެ. އެ ގޮތުން، 2018 ވަނަ އަހަރުގެ ޗެމްޕިއަންސް ލީގުގެ ފައިނަލުގައި ރެއާލް މެޑްރިޑް އަތުން ލިވަޕޫލް ބަލިވި މެޗުގައި ކާރިއަސް އަތުން ހެދުނު ގޯސްތަކުން އަރައިގަނެ، އެއް ފެންވަރެއްގައި ކާރިއަސް އަށް އަދިވެސް ރަނގަޅު ކުޅުމެއް ދެމެހެއްޓޭގޮތް ވަނީ ނުވެފަ އެވެ.
ކާރިއަސް ލިވަޕޫލްގައި ހޭދަކުރި ފަހު އަހަރުތަކުގައި ލޯން އެއްބަސްވުމެއްގެ ދަށުން ތުރުކީގެ ބެސިކްޓާސް އާއި ޖަރުމަނުގެ ޔޫނިއަން ބާލިން އަށް ކުޅެގެން ވެސް ކެރިއަރު ހަމަމަގަށް އަޅަން ކުރި މަސައްކަތް އަދި އޮތީ ކާމިޔާބުނުވެ އެވެ.
ނިއުކާސަލް އިން 68 އަހަރު ތެރޭ ފުރަތަމަ ފަަހަރަށް ޑޮމެސްޓިކް ތަށްޓެއްގައި އަތްލަން ކުރާ މަސައްކަތުގައި ޓީމުގެ އިސް ރޯލެއްގެ ޒިންމާ މި ވަގުތު ހަވާލުވެފައި މި އޮތީ، ކްލަބަށް ފުރަތަމަ ފަހަރަށް މެޗެއް ކުޅެން ނުކުންނަން ތައްޔާރަށް ހުރި ކާރިއަސް އަތުގަ އެވެ. ވެމްބްލީގައި ކުޅޭ ލީގު ކަޕް ފައިނަލުގައި މިރޭ ނިއުކާސަލާއި ޔުނައިޓެޑް ކުޅޭ މެޗު ފަށާނީ ރާއްޖެ ގަޑިން 21:30 ގަ އެވެ.
