މެޑްރިޑް (ފެބްރުއަރީ 26) - ސްޕެނިޝް ލީގުގައި ރޭ އެތުލެޓިކޯ މެޑްރިޑް އަތުން ރެއާލް މެޑްރިޑް ބަލިވާން ދަނިކޮށް، އެ ޓީމުގެ 18 އަހަރުގެ ފޯވާޑް، އަލްވާރޯ ރޮޑްރިގޭޒް ޖެހި ގޯލުން 1-1 އިން އެއްވަރުވެ، ރެއާލް ބަލިނުވެ ސަލާމަތްވެއްޖެ އެވެ.
އެކަމަކު، ރޭގެ ނަތީޖާއާ އެކު ރެއާލުން މި ސީޒަނުގައި ލީގު ތަށި ދިފާއުކުރަން ކުރާ މަަސައްކަތަށް ވަނީ އިތުރު އުނދަގުލެއް ކުރިމަތިވެފަ އެވެ. އެއް ވަނައިގައި އޮތް ބާސެލޯނާ އަށް ވުރެ، އެއް މެޗު އިތުރަށް ކުޅެގެން ވެސް ރެއާލް އޮތީ ހަތް ޕޮއިންޓް ފަހަތުގަ އެވެ. ބާސެލޯނާ އަށް 22 މެޗުން 59 ޕޮއިންޓް ލިބިފައިވާއިރު، ރެއާލަށް 23 މެޗުން ހަމަކުރެވުނީ 52 ޕޮއިންޓެވެ.
މެޗަށް ފަހު ރެއާލްގެ ކޯޗު ކާލޯ އަންޗެލޮޓީ ބުނީ ރެއާލަށް ލީގު ލިބުމުގެ ހުރިހާ ފުރުސަތެއް ގެއްލުނީ ކަމަށް ނުދެކޭ ކަމަށާއި އެންމެ ފަހު ޕޮއިންޓާ ހަމައަށް އެ ޓީމުން މަސައްކަތް ކުރާނެ ކަމަށެވެ. އަދި ރޭގެ މެޗުގައި ރެއާލްގެ ގޯލު ޖެހި ރޮޑްރިގޭޒް އަކީ ހުނަރުވެރި ކުޅުންތެރިއެއް ކަމަށާއި ކުރިއަށް ހުރި މެޗުތަކުގައި ވެސް އޭނާ އަށް ފުރުސަތު ދޭނެ ކަމަށް އަންޗެލޮޓީ ވަނީ ބުނެފަ އެވެ.
ރޭގެ މެޗުގެ ނުވަ ވަަނަ މިނިޓްގައި ރެއާލްގެ މާކޯ އަސެންސިއޯ އޭރިއާބޭރުން ޖެހި ބޯޅަ އެތުލެޓިކޯގެ ގޯލްކީޕަރު ޔެން އޮބްލަކް ވަނީ މަތަކޮށްފަ އެވެ. މެޗުގެ 21 ވަނަ މިނިޓްގައި އެތުލެޓިކޯގެ ޔަނިކް ކަރާސްކޯ އޭރިއާ ކަނުގައި ހުރެފައި ދުރު ކަނަށް ފޮނުވާލި ހަމަލާ ރެއާލްގެ ގޯލްކީޕަރު، ތިބޯ ކޯޓުއާ ވަނީ ހުއްޓުވައިފަ އެވެ.
މެޗުގެ 64 ވަނަ މިނިޓްގައި އެތުލެޓިކޯގެ އެންހެލް ކޮރޭއާ އަށް ވަނީ ސީދާ ރަތް ކާޑެއް ދައްކައިފަ އެވެ. އެއީ ބޯޅަ ނެތީސް ރެއާލްގެ ޑިފެންޑަރު، އެންޓޯނިއޯ ރޫޑިގާ ގައިގައި އުޅަބޮށިން ޖެހުމުންނެވެ. ކުޅުންތެރިއަކު މަދުކޮށް ކުޅެ ވެސް ލީޑުނެގީ އެތުލެޓިކޯ އިންނެވެ. މި ލަނޑު ޖެހީ މެޗުގެ 78 ވަނަ މިނިޓްގައި އެންޓޮއިން ގްރީޒްމަން ނެގި ހިލޭޖެހުމަކުން ހޯސޭ ހިމެނޭޒް ބޮލުން ޖެހި ގޯލުންނެވެ.
ބަދަލަކަށް ކުޅެން އެރި އަލްވާރޯ ރޮޑްރިގޭޒް، ރެއާލަށް އެއްވަރުކޮށްދިން ގޯލު ޖެހީ މެޗުގެ 85 ވަނަ މިނިޓްގައި ލޫކަ މޮޑްރިޗް ނެގި ކޯނަރަކުން ބޮލުންނެވެ. އޭނާ މި ގޯލު ޖެހީ ކުޅެން އެރިތާ ހަތް ވަރަކަށް މިނިޓް ތެރޭގަ އެވެ. ރެއާލް މޮޅުކޮށްދޭން އައުރެލިން ޗުއަމެނީ އޭރިއާބޭރުން ޖެހި ބޯޅަ އަމާޒުވީ އެތުލެޓިކޯ ގޯލްކީޕަރު އޮބްލަކް އަތަށެވެ.
