ސޮނީ ސްޕޯޓްސް ގޯލްޑަން ފުޓްސަލް ޗެލެންޖްގައި މިއަދު ހަވީރު ކުޅުނު މެޗުތަކުން މޮޅުވެ، ފ. އަތޮޅުގެ ޗެމްޕިއަންކަން މަގޫދޫން ހޯދިއިރު، ރ. އަތޮޅުގެ ތަށި އިނގުރައިދޫން ކާމިޔާބުކޮށްފި އެވެ.
މަގޫދޫން ފ. އަތޮޅުގެ ތަށި ފުރަތަމަ ފަހަރަށް އުފުލާލީ ފައިނަލުގައި ނިލަންދޫ އަތުން 2-1 އިން މޮޅުވެގެންނެވެ. ރ. އަތޮޅުގެ ފައިނަލްގައި ބައްދަލުކުރި އިނގުރައިދޫ އާއި ދުވާފަރުގެ މެޗު 3-3 އިން އެއްވަރުވިއިރު، ނަތީޖާ ނެރެން ވަނީ ޕެނަލްޓީ ޖަހައިފަ އެވެ.
ރެހެންދި ފުޓްސަލް ދަނޑުގައި މިއަދު ހަވީރު ކުޅުނު ފ. އަތޮޅުގެ ފައިނަލަށް ނުކުތްއިރު، މި ފަހަރު އަތޮޅުގެ ލީގު ބުރުގައި މަގޫދޫން ވަނީ 1-0 އިން ނިލަންދޫ ބަލިކޮށްފަ އެވެ. އެ ރޫހުގައި ފައިނަލަށް ނުކުމެ މަގޫދޫން ވަނީ ދެ ގޯލު ޖަހައި ލީޑުނަގައިފަ އެވެ. މަގޫދޫގެ ލަނޑުތައް ޖެހީ ޓީމުގެ ކެޕްޓަން، މޫސާ މާހިލް މިގުދާދް އާއި އަހުމަދު މުއާޒް އެވެ.
ނިލަންދޫގެ ހަމައެކަނި ލަނޑު ޖެހީ އަބްދުލް އަޒީޒް އިބްރާހިމް އެވެ.
ފ. އަތޮޅުގެ ޗެމްޕިއަންކަން ހޯދި މަގޫދޫ ޓީމުން ތަށްޓާ އެކު އުފާފާޅުކުރަނީ.--- ފޮޓޯ: މުހައްމަދު ޝާބިން/ އަދަދު
ރ. އަތޮޅުގެ ލީގު ބުރުގައި އިނގުރައިދޫން ފަސޭހަކަމާ އެކު ދުވާފަރު ބަލިކުރި ނަމަވެސް މިއަދުގެ ފައިނަލުގައި ދުވާފަރުން ވަނީ ރަނގަޅު ފައިޓެއް ދީފަ އެވެ.
ރެހެންދި ފުޓްސަލް ދެ ވަނަ ދަނޑުގައި ކުޅުނު މެޗުގައި ފުރަތަމަ ލީޑުނެގީ ދުވާފަރުންނެވެ. މިއީ އިނގުރައިދޫގެ ކީޕަރު، އަހުމަދު އިހުސާނަށް ހެދުނު ގޯހެއްގެ ފައިދާނަގައި ދުވާފަރުގެ ކެޕްޓަން، އާދަމް އިލްޔަސައު ޖެހި ގޯލެކެވެ. ފުރަތަމަ ހާފުގައި އިނގުރައިދޫ އަށް އެއްވަރުކޮށްދިނީ އަލީ ހާފިޒް (ހާއްޕެ) އެވެ.
މުހައްމަދު މަމްދޫހުގެ ގޯލުން އިނގުރައިދޫން އަލުން ލީޑުނެގިއިރު، މުހައްމަދު އިސާމް ޖެހި އިންޑިވިޖުއަލީ މޮޅު ގޯލުން ދުވާފަރުން އެއްވަރުކުރި އެވެ. މެޗުގައި ދެ ވަނަ ފަހަރަށް އިނގުރައިދޫ އަށް ލީޑުނަގައިދިނީ އަހުމަދު އައިހަމް ދިން ބޯޅައަކުން ހާއްޕެ އެވެ. ހާއްޕެ ކޮންޓްރޯލް ކޮށްލި ބޯޅަ އަމާޒުކޮށްލީ ގޯލުގެ މަތީ ކަނަށެވެ.
އިނގުރައިދޫ ފަހަތުން ހެދުނު ގޯހެއްގެ ފައިދާނަގައި އިސާމް ވަނީ ގޯލެއް ޖަހައި އަނެއްކާ ވެސް ދުވާފަރަށް ނަތީޖާ ހަަމަހަމަކޮށްދީފަ އެެވެ.
ނަތީޖާ ނެރެން ޕެނަލްޓީ ޖަހަން ޖެހުނުއިރު، އިނގުރައިދޫން ފަސް ޕެނަލްޓީ ވެސް ކާމިޔާބުކުރި އެވެ. އެ ޓީމުން ޕެނަލްޓީ ފޮނުވާލީ އައިހަމް، މަމްދޫހު، އަހުމަދު މަޝީދު، އަބްދުﷲ ސަނޫން އަދި ހާއްޕެ އެވެ. ދުވާފަރުގެ ފުރަތަމަ ހަތަރު ޕެނަލްޓީ، އިލްޔަސައު، މުހައްމަދު ނޫހު އިބްރާހިމް، އަހުމަދު މައިސޫން ކާމިޔާބުކޮށްފައިވަނިކޮށް އިސާމް ޖެހި ޕެނަލްޓީ އަމާޒުވީ އިނގުރައިދޫ ކީޕަރު އިހުސާން ގަޔަށެވެ.
މުބާރާތުގައި މިރޭ ފަސް އަތޮޅެއްގެ ފައިނަލް މެޗު އޮންނާނެ އެވެ. އެއީ ބ. މ. ދ. ސ. އަދި ކ. އަތޮޅުގެ ފައިނަލެވެ.
މިރޭގެ މެޗުތައް ކުޅޭ ގަޑިތައް:
20:00 - ބ. އޭދަފުށި/ ބ. ފެހެންދޫ
20:00 - މ. ނާލާފުށި/ މ. ދިއްގަރު
21:00 - ދ. މާއެނބޫދޫ/ ދ. ކުޑަހުވަދޫ
21:00 - ސ. ފޭދޫ/ ސ.މަރަދޫފޭދޫ
22:00 - ކ. ގާފަރު/ ކ. ދިއްފުށި
