ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް ސޮނީ ސްޕޯޓްސް ގޯލްޑަން ފުޓްސަލް ޗެލެންޖްގައި މިއަދާއި މިރޭ ހަތް އަތޮޅުގެ ފައިނަލް ކުރިއަށްދާނެ އެވެ. މި ފައިނަލްތަކަށް ފަހު ދެން ކުރިއަށްދާނީ މުބާރާތުގެ ޒޯން ބުރުގެ މެޗުތަކެވެ.
ހުޅުމާލޭ ރެހެންދި ފުޓްސަލް ދެ ދަނޑުގައި ކުރިއަށްދާ ގޯލްޑަން ފުޓްސަލް ޗެލެންޖްގައި މި ފަހަރު 102 ޓީމުން ވާދަކުރާއިރު، ޖުމްލަ އެކު 242 މެޗު މި ފަހަރުގެ މުބާރާތުގައި އޮންނާނެ އެވެ. މިއަދު ހަތް އަތޮޅެއްގެ ފައިނަލް ޝެޑިއުލްކޮށްފައިވާއިރު، ހަވީރު ކުޅޭނީ ފ. އަތޮޅާއި ރ. އަތޮޅުގެ ފައިނަލެވެ. މިރޭ އޮންނާނީ މ. އަތޮޅާއި ބ. އަތޮޅާއި ކ. އަތޮޅާއި ދ. އަތޮޅާއި އަދި އައްޑޫ ސިޓީގެ ފައިނަލެވެ.
މިއަދު ހަވީރު ރ. އަތޮޅު ފައިނަލުގައި 16:00 ގައި ބައްދަލުކުރާނީ އިނގުރައިދޫ އާއި ދުވާފަރެވެ. ފޯރިގަދަ ކުރިމަތިލުންތަކެއް މި ދެ ޓީމުގެ މެދުގައި މީގެ ކުރިން ވެސް ފުޓްސަލް އެކި މުބާރާތްތަކުގައި ފެނިފައިވާއިރު، މި ފަހަރުގެ ގޯލްޑަން ފުޓްސަލް ޗެލެންޖްގެ ރ. އަތޮޅުގެ ލީގު ބުރުގައި އިނގުރައިދޫން ވަނީ ދުވާފަރު އަތުން 5-1 އިން މޮޅުވެފަ އެވެ.
ފ. އަތޮޅު ފައިނަލުގައި މިއަދު ހަވީރު ނިލަންދޫން ބައްދަލުކުރާނީ މަގޫދޫއާ އެވެ. މިއަދުގެ 16:00ގައި އެ ފައިނަލް ވެސް ކުޅޭއިރު، ފ. އަތޮޅުގައި އެންމެ ފަހުން މަގޫދޫން ވަނީ 1-0 އިން ނިލަންދޫ ބަލިކޮށްފަ އެވެ.
މިރޭ، 20:00 ބ. އަތޮޅުގެ ފައިނަލުގައި ފެހެންދޫ އާއި އޭދަފުށި ކުޅޭއިރު، އެ އަތޮޅު ލީގު ބުރުގައި ފެހެންދޫ އާއި އޭދަފުށި ވަނީ ލަނޑެއް ނުޖެހި އެއްވަރުވެފަ އެވެ. ހަމަ އެ ވަގުތު މ. އަތޮޅު ފައިނަލުގައި ދިއްގަރާއި ނާލާފުށި ވާދަކުރާނެ އެވެ. ނާލާފުށިން ވަނީ ދިއްގަރު އަތުން ގްރޫޕް ސްޓޭޖުގައި މޮޅުވެފަ އެވެ.
ދ. އަތޮޅު ފައިނަލުގައި މިރޭ 21:00 ގައި އެންމެ ފަހުގެ ޗެމްޕިއަން ކުޑަހުވަދޫ ބައްދަލުކުރާނީ މާއެނބޫދޫއާ އެވެ. މާއެނބޫދޫން ވަނީ އެ އަތޮޅުގެ ފުރަަތަމަ މެޗުގައި ކުޑަހުވަދޫ އަތުން މޮޅުވެފަ އެވެ. މިރޭ، 21:00 ދެން ކުޅޭނީ އައްޑޫ ސިޓީ ފައިނަލްގެ ދެ ވަނަ ލެގެވެ. ފުރަތަމަ މެޗުން ފޭދޫ ވަނީ މަރަދޫފޭދޫ އަތުން މޮޅުވެފަ އެވެ. މިރޭ، 22:00 ގައި ފަށާނީ އެއް ފައިނަލެވެ. ކ. އަތޮޅު ފައިނަލުގައި އެންމެ ފަހުގެ ޗެމްޕިއަން، ގާފަރު ކުޅޭނީ ދިއްފުށްޓާ އެވެ. ގާފަރުން ވަނީ ގްރޫޕް ސްޓޭޖުގައި ފަސޭހަކަމާ އެކު ދިއްފުށި އަތުން މޮޅުވެފަ އެވެ.
ފައިނަލް މެޗުތައް ކުޅޭ ގަނޑިތައް:
16:00 - ރ. އިނގުރައިދޫ/ ރ. ދުވާފަރު
16:00 - ފ. ނިލަންދޫ/ ފ. މަގޫދޫ
20:00 - ބ. އޭދަފުށި/ ބ. ފެހެންދޫ
20:00 - މ. ނާލާފުށި/ މ. ދިއްގަރު
21:00 - ދ. މާއެނބޫދޫ/ ދ. ކުޑަހުވަދޫ
21:00 - ސ. ފޭދޫ/ ސ.މަރަދޫފޭދޫ
22:00 - ކ. ގާފަރު/ ކ. ދިއްފުށި
