ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2023 ގައި ރޭ ކުޅުނު މެޗުތަކުން މޮޅުވެ، ގަމާއި ކިނބިދޫ، ވާދޫ އަދި ކުރެންދޫ އެ އަތޮޅުތަކުގެ ޗެމްޕިއަންކަން ހޯދައިފި އެވެ.
ގަމުން ލ. އަތޮޅު ފައިނަލުގައި އިސްދޫ އަތުން މޮޅުވީ 4-0 އިންނެވެ. އެންމެ ފަހުގެ ޗެމްޕިއަން، ތިމަރަފުށި އަތުން ތ. އަތޮޅުގެ ފައިނަލުގައި ކިނބިދޫ މޮޅުވީ 3-2 އިންނެވެ. ވާދޫން ގދ.ގެ ފައިނަލުގައި ގައްދޫ ބަލިކުރީ ފޯރިގަދަ މެޗަކަށް ފަހު 2-0 އިންނެވެ. ޅ. އަތޮޅުގެ ދެ ޓީމުގެ މެދުގައި ކުޅުނު ދެ ވަނަ ލެގު 1-1 އިން އެއްވަރުވުމުން، ކުރެންދޫން ޗެމްޕިއަންކަން ހޯދީ އެގްރިގޭޓަށް ބަލާއިރު، 2-1 އިން ކުރިހޯދައިގެންނެވެ.
ރެެހެންދި ފުޓްސަލް ދަނޑުގައި ރޭ ކުޅުނު ލ.ގެ ފައިނަލުގައި އިސްދޫ ކޮޅަށް ގަމުގެ ހަަތަރު ގޯލުގެ ތެރެއިން ދެ ގޯލު ޖެހީ މެޗުގެ މޮޅު ކުޅުންތެރިޔާ، ގަމުގެ ކެޕްޓަން، ހުސެއިން ޝަރީފް (އޮންލީ) އެވެ. އަނެއް ދެ ގޯލު ޖެހީ އަބްދުﷲ ޖުނައިދު (ޖެންނޭ) އާއި ލ. އަތޮޅުގެ މޮޅު ކުޅުންތެރިއަކަށް ހޮވުނު އަލީ ޝާމިސް (ތޮއްޕޭ) އެވެ. މިއީ ގަމުން އަތޮޅު ތަށި ހޯދި ފަސް ވަނަ ފަހަރެވެ. ލ އަތޮޅުން އެންމެ ގިނަ ގޯލު ޖެހީ އިސްދޫ ޓީމުގެ ހުމޭޒް އެވެ.
ކިނބިދޫ ޓީމުގެ ސަހާއު (ކ) ތިމަރަފުށްޓާ ދެކޮޅަށް ރޭ ކުޅުނު މެޗުގެ ތެރެއިން ބޯޅަ ހިފައިގެންދަނީ.--- ފޮޓޯ: މުހައްމަދު ޝާބިން/ އަދަދު
ތިމަރަފުށި ކައިރީގައި ރަނގަޅު ކުޅުމެއް ދައްކައި ކިނބިދޫން ލީޑުނެގީ އަލީ ފަލާހު، 13 ވަނަ މިނިޓްގައި އޭރިއާތެރެއިން ޖެހި ގޯލަކުންނެވެ. އޭގެ ތިން މިނިޓް ފަހުން އަލީ ޝިފާއު (ރޮނާ) އޭރިއާބޭރުން ގޯލެއް ޖަހައި އެއްވަރުކުރި އެވެ. ކިނބިދޫން މޮޅުވީ ފަހު ވަގުތު ކައުންޓަ އެޓޭކުގައި ދެ ގޯލު ޖަހައިގެންނެވެ. މިއީ ކިނބިދޫގެ މުހައްމަދު ސަހާއު (ބޭލް)ގެ މޮޅު ކުޅުމާ އެކު ތަނަވަސްކުރި ފުރުސަތުތަކުން މުހައްމަދު ޝާފިއު އާއި އަހުމަދު ހަމްދާން ހުސެއިން ޖެހި ގޯލުތަކެކެވެ. މެޗުގެ ފަހު މިނިޓްގައި، ތިމަރަފުށީގެ ކެޕްޓަން، އިބްރާހިމް ސިނާހު (ސިނާ) ހިލޭ ޖެހުމަކުން ލަނޑެއް ޖެހި ނަމަވެސް، އިތުރަށް ވަގުތެއް ނުލިބި މެޗުން ބަލިވީ އެވެ. ތ. އަތޮޅުގެ މޮޅު ކުޅުންތެރިޔާގެ މަގާމާއި އެންމެ ގިނަ ގޯލު ޖެހި ކުޅުންތެރިޔާގެ ޓްރޮފީ ހޯދީ ތިމަރަފުށީގެ އިބްރާހިމް ހަމްދާން އެވެ.
ހަތަރު ރަތް ކާޑު ފެނިގެންދިޔަ ގދގެ ފައިނަލުގައި ރޭ ވާދޫން ދެ ގޯލު ޖެހީ ވެސް ދެ ވަނަ ހާފުގަ އެވެ. އެ ޓީމުގެ ލަނޑުތައް ޖެހީ އިބްރާހިމް ޝައުފް މުހައްމަދާއި މުސައްނިފު މުހައްމަދު އެވެ. ވާދޫން މި ވަނީ ޖެހިޖެހިގެން ދެ ފަހަރަށް އަތޮޅު ޗެމްޕިއަންކަން ހޯދައިފަ އެވެ.
ވާދޫ ޓީމުގެ ކެޕްޓަން، އަޔާޒް (ކ) ރޭ ގައްދޫއާ ދެކޮޅަށް ކުޅުނު މެޗުގެ ތެރެއިން ބޯޅަ ހިފައިގެންދަނީ.--- ފޮޓޯ: މުހައްމަދު ޝާބިން/ އަދަދު
ޅ. އަތޮޅުގެ މެޗުގައި ރޭ މެޗު ފަށައިގެން 15 ސިކުންތު ތެރޭގައި ހިންނަވަރުގެ އަހުމަދު އަބްދުﷲ (ލިލީ) ވަނީ އެ ޓީމަށް ލީޑުނަގައިދީފަ އެވެ. ދެ ވަނަ ހާފުގައި ބަދަލަކަށް އެރި އަހުމަދު އިކްރާމް ވަނީ ކައުންޓަ އެޓޭކުގައި ކުރެންދޫ އަށް ނަތީޖާ ހަމަހަމަކޮށްދީފަ އެވެ. މި މެޗު އެއްވަރުވެގެން ނިމުނުއިރު، ފުރަތަމަ ލެގުން ކުރެންދޫ މޮޅުވެފައި އޮތުމުން އެ ޓީމަށް އަތޮޅު ޗެމްޕިއަންކަން ލިބުނީ އެވެ.
މާލެ ޒޯނުގެ ދެ މެޗު ވެސް އެއްވަރު
ގޯލްޑަން ފުޓްސަލް ޗެލެންޖްގައި އިއްޔެ ވަނީ ޒޯން މެޗުތައް ވެސް ފަށައިފަ އެވެ. އެ ގޮތުން އިއްޔެ ހަވީރު ޒޯން އެކެއްގެ ދެ މެޗު ކުޅުނުއިރު، ރޭ ވަނީ މާލޭގެ ޓީމުތައް ހިމެނޭ ޒޯން އަށެއްގެ ދެ މެޗު ވެސް ކުޅެފަ އެވެ. ހުޅުމާލެ އާއި ވިލިމާލެ މެޗު 3-3 އިން އެއްވަރުވިއިރު، މައްޗަންގޯޅި އާއި މާފަންނުގެ މެޗު ނިމުނީ 2-2 އިން އެއްވަރުވެގެންނެވެ.
ހުޅުމާލެ އަށް ރޭގެ މެޗުގައި ލަނޑުތައް ޖަހައިދިނީ ޝަނީއު ދެ ގޯލާއި މުސްތަފާ ގޯލެކެވެ. ވިލިމާލެ ޓީމުގެ ގޯލުތައް ޖެހީ އަބްދުﷲ ޝައްފާން (ޝާކާ)، އަލީ ޝިޔާހު (ޝިޔަޅޭ) އަދި އިސްމާއިލް ވަޖީހު (ވައްޖެ) އެވެ.
