މިހާރު ކުރިއަށްދާ ފޯ ނޭޝަންސް ކަޕްގައި ވޮލީބޯޅަ މުބާރާތުގައި ސިންގަޕޫރު އަތުން މޮޅުވީ ކުޅުންތެރިން މޮޅަށް ކުޅެގެން ކަމަށާއި ޓީމްގެ ކޮންފިޑެންސް ލެވެލް މިހާރު ރަނގަޅުވެފައިވާ ކަމަށް ގައުމީ ފިރިހެން ވޮލީ ޓީމްގެ ކެޕްޓަން، އަލީ ހުޒާމް (ހުޒަންޓެ) ބުނެފި އެވެ.
ފޯ ނޭޝަންސް ކަޕްގެ ފުރަތަމަ މެޗުގައި މެލޭޝިއާ އަތުން 3-1 ސެޓުން ބަލިވި ނަމަވެސް ރާއްޖެއިން ވަނީ ރޭ ސިންގަޕޫރު އަތުން ސީދާ ތިން ސެޓުން މޮޅުވެފަ އެވެ.
ސިންގަޕޫރު އަތުން މޮޅުވި މެޗަށް ފަހު ކެޕްޓަން، ހުޒާމް ބުނީ ފުރަތަމަ މެޗުގައި މެލޭޝިއާއާ ދެކޮޅަށް ޓީމުން ގޯސްކޮށްކުރި ގިނަ ކަންކަން މި މެޗުގައި ރަނގަޅު ކުރެވުނު ކަމަށާއި މިހާރު ޓީމުގެ ކޮންފިޑެންސް ލެވެލްވެސް ރަނގަޅުވެފައިވާ ކަމަށެވެ.
އޭނާ ބުނީ ފުރަތަމަ މެޗުގައި ހަމަޖެހިލައިގެން ކުޅުމުގެ ބަދަލުގައި ބޮޑަށް ފެނުނީ އަވަސް އަރުވާލައިގެން ކުޅެން އުޅުނުތަން ކަމަށެވެ. ކޯޗުގެ ގޭމް ޕްލޭނާ އެއްގޮތަސް މެލޭޝިއާ މެޗުގައި ނުކުޅެވުނު ކަމަށް ހުޒާމް ވަނީ ފާހަގަކޮށްފަ އެވެ.
ސިންގަޕޫރު މެޗުގައި ރަނގަޅު ހަމަލާތަކެއް ފޮނުވާލި ހުޒާމް ބުނީ ގައުމީ ކޯޗާ އެކު ރަސްމީ މުބާރާތެއްގެ މެޗެއް ކުޅެލަން އަލަށް ލިބުނީ މި މުބާރާތުގައި ކަމަށާއި، އެހެންކަމުން، ކޯޗުގެ ގޭމަށް ހޭނެން ވަގުތުކޮޅެއް ނެގީކަމަށެވެ
"އަސްލު މި ކޯޗާ އެކު ރަސްމީ މެޗެއް ނުކުޅޭތާ. މުބާރާތުގެ މެޗަކަށް ފުރަތަމަ މެލޭޝިއާ އާ ދެކޮޅާށް ނިކުތީ. އެހެންވެ މާ ބޮޑަށް ހިފާލެވުނީ. ދެން މިސްޓޭކްތައް ވެސް ހެދުނު. އެކަމަކު މިރޭ (ރޭ) ރަނގަޅަށް މިދިޔައީ އަހަރުމެންގެ ގޭމް ރަނގަޅަށް ކުޅެފައި މޮޅުވީ،" 10 ވަރަކަށް އަހަރު ގައުމީ ޓީމާ އެކު ހޭދަކޮށްފައިވާ ހުޒާމް ބުންޏެވެ.
ހުޒާމް ބުނީ މިހާރު ކުޅުންތެރިން ތިބި ކޮންފިޑެންސްގައި އަފްގާނިސްތާނާ ދެކޮޅަށް ނުކުމެއްޖެ ނަމަ ރަނގަޅު ނަތީޖާއަކާ އެކު މޮޅުވެވޭނެ ކަމުގެ އިތުބާރު އެބައޮތް ކަމަށެވެ. އަފްގާނިސްތާނަކީ ވެސް ވަރުގަދަ ޓީމެއް ކަމަަށާއި އެއްވެސް ވަރަކަށް މެޗު ފަސޭހަ ނުކޮށްލާނެ ކަމަށް ވެސް ހުޒާމް ވަނީ ބުނެފަ އެވެ.
"އަފްގާނު އަދި ބައްޔެއް ނުވޭ. ދެ މެޗުންވެސް އެމީހުން އޮތީ މޮޅުވެފައި. އަހަރުމެން ރަނގަޅު ގޭމެއް ކުޅެފިޔައްޔާ ހަމަ މޮޅުވެވެނޭނެ. ޔަގީންކަން އެބައޮތް"
ގައުމީ ކޯޗު ވެލޯސޯ: ސިންގަޕޫރު މެޗަކީ އޭނާ ހަވާލުވި ފަހުން ރާއްޖެ މޮޅުވި ފުރަތަމަ މެޗު.-- ފޮޓޯ: އަދަދު
ކުޅުންތެރިންގެ ފެންވަރު ފެނިއްޖެ، މިއީ ބޭނުންވާ ކުޅުމަކީ: ވެލޯސޯ
ގައުމީ ފިރިހެން ވޮލީ ޓީމްގެ ކޯޗު، ބްރެޒިލްގެ ސާޖިއޯ ވެލޯސޯ ބުނީ ފުރަތަމަ މެޗުގައި ގިނަ މިސްޓޭކްތަކެއް ފެނުނު ކަމަށާއި ސިންގަޕޫރު މެޗުގައި އެކަންކަން ރަނގަޅު ކުރި ކަމަށެވެ. ވަކިން ހާއްސަކޮށް ސާވިސް ތަކާއި ސާވިސް ރިސީވްތައް ރަނގަޅުކުރިކަން އޭނާ ފާހަގަކުރި އެވެ.
ވެލޯސޯ ބުނީ އެންމެ ބޮޑަށް އޭނާ މެޗުގައި ފާހަގަކުރާ ކަމަކީ ލިބޭ ރަނގަޅު ފުރުސަތުތަކުގެ ބޭނުން ކުރުން ކަމަށާއި ޗާންސް ބޯޅަ ތަކުގައި ހޯދި ޕޮއިންޓް ތަކުގެ ސަބަބުން މެޗު ކާމިޔާބުކުރަން ފަސޭހަވި ކަމަށެވެ.
"ސާވިސް، ރިސީވް، ބްލޮކް، އެޓޭކް ހުރިހާ ކަމެއްވެސް މިރޭ ވަރަށް ރަނގަޅު. އަދިވެސް އަހރެން އެންމެ ބޭނުންވާ ކުޅުން ނުދެއްކޭ. އެކަމަަކު ކުރީ މެޗުން ބަލިވެފައި އޮއްތާ މިރޭ ދެއްކި ކުޅުން ވަރަށް ރަނގަޅު. ވަރަށް ބޮޑުތަނުން ކުރިއެރުން ފެނިއްޖެ. ގޭމް ޕޭލާނާ އެއްގޮތަށް ރަނގަޅަށް ކުޅެފި." ބަހްރޭން ޓީމަށް ކުރިން އިރުޝާދު ދިން ވެލޯސޯ ބުންޏެވެ.
ކޯޗު ބުނީ ދެން އޮތީ މާ ވަރުގަދަ މެޗެއް ކަމަށާއި، އެ މެޗުގައި ވެސް ޓީމުން ރަނގަޅު ކުޅުމެއް ދައްކާނެ ކަމަށް އުއްމީދުކުރާ ކަމަށެވެ.
"ރާއްޖެ ޓީމް މާ މޮޅު، ސިންގަޕޫރު ކުޅުންތެރިން ތިބީ ބިރުން"
ސިންގަޕޫރުގެ ކޯޗު ސުންޓޮން ފޮސީޓާ ބުނީ ރާއްޖޭގެ ކުޅުންތެރިންގެ އެޓޭކްތައް ފެނުނީ ވަރަށް ވަރުގަދަކޮށް ކަމަށާއި، މެޗުގެ ވަކި ހިސާބަކުން އޭނާގެ ޓީމުގެ ކޮންފިޑެންސް ލެވެލް ވެއްޓިއްޖެ ކަމަށެވެެ.
އެންމެ ބޮޑަށް ފާހަގަވި ކަމެއްގެ ގޮތުގައި ސުންޓޮން ބުނީ ދިވެހި ޓީމުގެ ސަޕޯޓު ކަމަށާއި، މެޗު ރާއްޖެ ކޮޅަށް އެނބުރުމުގައި ސަޕޯޓަރުން ވަރަށް މުހިންމު ދައުރެއް އަދާކުރި ކަމަށެވެ. އޭނާ ބުނީ ހޯލުގައި ސަޕޯޓަރުންގެ އަޑު ގަދަ ކަމުން ސިންގަޕޫރުގެ ކުޅުންތެރިން ތިބީ ޖެހިލުންވެފައި ކަމަށާއި، ބައެއް ކުޅުންތެރިން ތިބީ ގޭމުން ބޭރުވެފައި ކަމަށެވެ.
"މިރޭ (ރޭ) ހަމަ ރާއްޖެ މޮޅީ، އަހަރެންގެ ޓީމް ބިރުން ތިބީ. މާ ބޮޑަށް ސަޕޯޓަރުންގެ އަޑު ޖެހިފައި ބިރުގަތީ. ދެން މިސްޓޭކްތައް ވެސް ވަރަށް ގިނަކޮށް ފެނުނީ. މޮޅު ޓީމަކާ ދެކޮޅަށް ކުޅޭއިރު މިސަޓޭކް މަދު ކުރަން ޖެހޭނެ. އޭގެ ގެއްލުން ދެއްކި ޓީމަށް" މިދިޔަ ފަސް އަހަރު ސިންގަޕޫރު ޓީމަށް އިރުޝާދު ދިން ސުންޓޮން ބުންޏެވެ.
ސުންޓޮން ބުނީ މި މެޗަކީ އޭނާގެ ޓީމަށް ބޮޑު ތަޖުރިބާއެއް ކަމަށާއި، ފަހު މެޗުގައި މެލޭޝިއާ އަތުން މޮޅުވާން މަސައްކަތް ކުރާނެ ކަމަށެވެ. ކޮންމެ ނަތީޖާއެއް ނުކުތަސް ސެމީ ފައިނަލުގެ ފުރުސަތު އޮތުމަކީ އޭނާ އަށް މި ވަގުތު އޮތް ޕްރެޝަރު ކުޑަވާކަމެއްކަން ވެސް ސުންޓޮން ފާހަގަކުރި އެވެ.
