ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2023 ގައި މިއަދު ހަވީރު ކުޅުނު މެޗުތަކުން މޮޅުވެ، އދ. މާމިގިއްޔާއި އއ. ބޮޑުފޮޅުދޫން އަތޮޅު ޗެމްޕިއަންކަން ހޯދައިފި އެވެ.
ރެހެންދި ފުޓްސަލް ދަނޑުގައި މިއަދު ހަވީރު ކުޅުނު އދ. އަތޮޅުގެ ފައިނަލުގައި މަހިބަދޫ އަތުން 3-2 އިން މޮޅުވެ، މާމިގިލިން ވަނީ އެ އަތޮޅު ތަށި ދިފާއުކޮށްފަ އެވެ. އއ. އަތޮޅުގެ އެންމެ ފަހުގެ ޗެމްޕިއަން، މަތިވެރި އަތުން ބޮޑުފޮޅުދޫ މޮޅުވީ 5-2 އިންނެވެ.
ވިއްސާރަ ވެހުނު ވަގުތެއްގައި ކުޅުނު ފައިނަލް މެޗުގައި ފުރަތަމަ ލީޑުނެގީ މަހިބަދޫންނެވެ. މިއީ ޕެނަލްޓީ އަކުން އަބްދުﷲ މިދުހަތު ފަހުމީ (ބިޗަޑް) ޖެހި ގޯލެކެވެ. އަހުމަދު ނިޒާމް (ނިޒާމްބެ) އޭރިއާބޭރުން ޖެހި ގޯލުން މާމިގިލިން އެއްވަރުކުރިއިރު، އެ އަހުމަދު މަމްދޫހު ބޮލުން ގޯލެއް ޖަހައި، މާމިގިއްޔަށް ލީޑުނަގައިދިނެވެ. މަހިބަދޫން އެއްވަރުކުރީ ގާސިމް ސަންމާމު (ސަންމެ) އޭރިއާބޭރުން ޖެހި ގޯލުންނެވެ. އެކަމަކު، ފަހު މިނިޓްގައި މާމިގިލީގެ ހިސާމް ސަލީމް (ކޮކީ) ބޮލުން ގޯލެއް ޖަހައި އެ ޓީމު މޮޅުކޮށްދިނީ އެވެ.
މަތިވެރި ބަލިކުރުމަށް ފަހު އއ. ޗެމްޕިއަންކަން ހޯދި ބޮޑުފޮޅުދޫ ކުޅުންތެރިން ތަށްޓާ އެކު އުފާފާޅުކުރަނީ. ---- ފޮޓޯ: ގޯލްޑަން ފުޓްސަލް އެސޯސިއޭޝަން/ އިމޭޖަސް.އެމްވީ
މަތިވެރިއާ ދެކޮޅަށް ބޮޑުފޮޅުދޫން ވަނީ މޮޅަށް ކުޅެ ކާމިޔާބު ހޯދައިފަ އެވެ. ބޮޑުފޮޅުދޫގެ ގޯލުތައް ކާމިޔާބުކުރީ ރުކުޝާން ޖަމީލް، އަހުމަދު ރިޔުޝާން، ޖާދުﷲ އަހުމަދު، އަލީ ޝަނީޒް އަދި ހުސެއިން ނަވާޒް އެވެ. މަތިވެރީގެ ގޯލުތައް ޖެހީ މުހައްމަދު އިމްރާން އާއި އަލީ އަލްސަން އެވެ.
ޒޯން އެކެއްގެ ފުރަތަމަ މޮޅު ނައިވާދޫ އަށް
ޒޯން އެކެއްގެ ފުރަތަމަ ގްރޫޕްގައި އޮތީ ހދ. ޗެމްޕިއަން ނައިވާދޫ އާއ ރަނަރަޕް، ނޭކުރެންދޫގެ އިތުރުން ހއ. ޗެމްޕިއަން، އުތީމު އެވެ. އެ ގްރޫޕްގެ ފުރަތަމަ މެޗުން ނައިވާދޫން ވަނީ ފަހަތުން އަރައި 5-3 އިން ނޭކުރެންދޫ ބަލިކޮށްފަ އެވެ. މިއީ މި އަހަރުގެ މުބާރާތުގައި ނޭކުރެންދޫން ނައިވާދޫ އަތުން ބަލިވި ތިން ވަނަ ފަހަރެވެ. އެއީ އަތޮޅު ގްރޫޕް ސްޓޭޖާއި އަތޮޅު ފައިނަލާއި ޒޯންގަ އެވެ.
އަލީ އިފާޒް (އިފައްޑޭ) އާއި މުހައްމަދު ފަރުހާން (ފަރުއްކޮ)ގެ ގޯލުތަކުން ނޭކުރެންދޫން ލީޑުނެގި ނަމަވެސް ނައިވާދޫން ވަނީ ފަހަތުން އަރައި ފަސް ގޯލު ޖަަހައިފަ އެވެ. ނައިވާދޫގެ ކެޕްޓަން، އަބްދުﷲ ޝާފިއު (ޝާއްޕެ) ތިން ގޯލު ޖަހައި، ހެޓްރިކެއް ހެދިއިރު، އަބްދުﷲ ވިސާމް އާއި ޔާމީން މުހައްމަދު (ޔާންޓެ) ވަނީ ގޯލެއް ޖަހައިފަ އެވެ.
ޒޯން އެކެެއްގެ ދެ ވަނަ ގްރޫޕްގެ މެޗުން ށ. އަތޮޅުގެ ޗެމްޕިއަން، ފޯކައިދޫ ވަނީ އެ އަތޮޅު ރަނަރަޕް، ކަނޑިތީމާ 1-1 އިން އެއްވަރުވެފަ އެވެ. މި ގްރޫޕްގައި ދެން އޮތީ ހއ.ގެ ރަަނަރަޕް، ފިއްލަދޫ އެވެ.
ގޯލްޑަން ފުޓްސަލް ޗެލެންޖްގައި މިރޭ، ހަތަރު އަތޮޅެއްގެ ފައިނަލް އޮންނާނެ އެވެ. އެއީ ލ، ތ، ޅ އަދި ގދ. އަތޮޅުގެ އެވެ.
