ފޯ ނޭޝަންސް ކަޕްގައި ރާއްޖޭގެ ގައުމީ އަންހެން ވޮލީ ޓީމުން ކުޅުނު ދެ ވަނަ މެޗުގައި ސިންގަޕޫރު އަތުން ސީދާ ތިން ސެޓުން މިއަދު ބަލިވެއްޖެ އެވެ.
ތިން ޓީމު ވާދަކުރާ އަންހެން ބައިގައި މިއަދު ސިންގަޕޫރު އަތުން ރާއްޖެ ސީދާ ތިން ސެޓުން ބަލިވިއިރު، ރާއްޖެ ކުޅުނު ފުރަަތަމަ މެޗުގައި އިއްޔެ މެލޭޝިއާ އަތުން ބަލިވީ 3-2 ސެޓުންނެވެ. މިއަދު މެޗުގެ ސެޓުތައް ރާއްޖެއަށް ގެއްލުނީ 26-28، 21-25 އަދި 14-25 އިންނެވެ.
ފުރަތަމަ ސެޓު ދިވެހި ޓީމުން ފަށައިގަތީ ރަނގަޅު ފޯމެއްގަ އެވެ. ރަނގަޅު ހަމަލާތަކަކާ އެކު ދިގު ރެލީތަކަކަށްފަހު ޕޮއިންޓްތައްވެސް ހޯދި އެވެ. މުބާރާތުގައި ސިންގަޕޫރުގެ ފުރަތަމަ މެޗަށް ނިކުތް ސިންގަޕޫރު ވެސް ފެނުނީ ޕްރެޝަރެއް ނެތި އިތުބާރާ އެކު ކުޅެލިތަނެވެ. ހަމަހަމަކޮށް، ސެޓުގެ މެދާ ހަމައަށް ދިޔަ ނަމަވެސް ދިވެހި ޓީމުން މުހިންމު ދަނޑިވަޅެއްގައި ދެ ޕޮއިންޓްގެ ލީޑެއް ނެގި އެވެ. އެ ލީޑު ފުޅާކުރަމުން ގޮސް 17-19 ގައި އޮއްވައި ސިންގަޕޫރުން ފަހަތުން އަރައި، ސްކޯ 20-20 އިން އެއްވަރުކުރި އެވެ. އަނެއްކާ ވެސް ރަނގަޅު ހަމަލާތަކަކާ އެކު ދިވެހި ޓީމުން ދެ ޕޮއިންޓްގެ ލީޑެއް ހޯދި އެވެ. އެ އަށް ފަހު، 23-21 ގައި އޮއްވައި، ސިންގަޕޫރުން ރަނގަޅު ދެ ބްލޮކެއް ކޮށް 23-23 އިން އެއްވަރުކުރި އެވެ.
މި ސެޓު ނިންމާލަން ދެ ފުރުސަތު ރާއްޖެ އަށް ލިބުނެވެ. ދެ ފަހަރު ވެސް ސިންގަޕޫރުން ނަތީޖާ ހަމަހަމަކުރި އެވެ. އޭގެ ފަހުން ސިންގަޕޫރަށް ލިބުނު ފުރަތަމަ ފުރުސަތުގައި ރާއްޖެއިން ރަނގަޅު ޑިފެންސެއްކޮށް 26-26 އަށް އެއްވަރުކުރި އެވެ. ސިންގަޕޫރުން މި ސެޓު ކާމިޔާބުކުރީ ރާއްޖެ އަށް އެޓޭކް ކުރަން ލިބުނު ދެ ފުރުސަތުގައި ވެސް އެކަން ކާމިޔާބު ނުކުރެވުމުންނެވެ.
ފުރަތަމަ ސެޓާ ހިލާފަށް ދެ ވަނަ ސެޓު ރަނގަޅަށް ފެށީ ރާއްޖެ އިންނެވެ. ރަނގަޅު ހަމަލާތަކަކާ އެކު ހަތަރު ޕޮއިންޓްގެ ލީޑެއް އެޓީމުން ނެގި އެވެ. ނަމަވެސް ސިންގަޕޫރުން ގޭމުގެ ތެރެއަށް ވަދެ ލީޑު ހަނިކުރި އެވެ. ވާދަވެރިކޮށް ސެޓުގެ ކުރީކޮޅު ފެނުނުއިރު، މި ސެޓުގައި ސިންގަޕޫރުން ފުރަތަމަ ލީޑު ނެގީ 7-8 އިންނެވެ. އޭގެ ފަހުން އެ ޓީމުން މަޑު މަޑުން ލީޑު ފުޅާކުރަމުން ގޮސް ފަސް ޕޮއިންޓެގެ ލީޑެއް ނެގި އެވެ.
އެ ގޮތުން، 10-15 ގައި ސްކޯ އޮއްވައި ރާއްޖޭން އެޓޭކުތައް ރަނގަޅުކޮށް 12-15 އަށް ސްކޯ ކައިރި ކުރި އެވެ. އަނެއްކާ ވެސް ސިންގަޕޫރުން ދެ ޕޮއިންޓް ހޯދައި ފަސް ޕޮއިންޓްގެ ލީޑު ދެމެހެއްޓި އެވެ. ޑިފެންސް ރަނގަޅުކޮށް ދިވެހި ޓީމުން ގާތް ގާތުގައި ޕޮއިންޓްތަކެއް ހޯދައި ސްކޯ ދެ ޕޮއިންޓަށް ހަނިކުރި އެވެ. ޕްރެޝަރު ބޮޑުވެ ސިންގަޕޫރުން ޓައިމްއައުޓެއް ނެގި އެވެ. އޭގެ ފަހުން އަނެއްކާވެސް ނިކުމެ އެޓީމުން ކުރީގެ ލީޑު ހޯދި އެވެ. އެ ލީޑު ދަމަހައްޓަމުން ގޮސް ސްކޯގެ ފަރަގު 16-23 އަށް ވެސް ބޮޑު ކުރި އެވެ.
ދިވެހި ޓީމުން މި ދަނޑިވަޅުގައި އާމިނަތު ޝަހާ ޝާމިންގެ ބަދަލުގައި ފާތިމަތު ޝަމްހާ ކުޅެން އެރުވި އެވެ. ޑިފެންސްތައް ރަނގަޅުކޮށް ދިވެހި ޓީމުން ހަތަރު ޕޮއިންޓް ހޯދައި ސްކޯ 20-23 އަށް ބަދަލުކުރި އެވެ. ސިންގަޕޫރުން ފަހު ވަގުތު ރަނގަޅު ހަމަލާތަކެއް ފޮނުވާލައި 21-25 އިން މި ސެޓު ކާމިޔާބުކުރި އެވެ.
ތިން ވަނަ ސެޓު ފަށައިގެން ދެ ޓީމް ފެނުނީ ހަމަހަމަކޮށެވެ. އެ ގޮތުން، 6-6 އިން ސްކޯ އެއްވަރުވެފައި އޮއްވައި ނިންމާލަން ލިބުނު ފުރުސަތުތަކުގެ ބޭނުން ނުކުރެވި ސިންގަޕޫރުން ތިން ޕޮއިންޓްގެ ލީޑެއް ނެގި އެވެ. އެ ލީޑު އެޓީމުން ސެޓު ނިމެންދެން ހިފެހެއްޓި އެވެ. މި ސެޓުގައި ރާއްޖެއިން ފެނުނީ ނިސްބަތުން ދަށް ކުޅުމެކެވެ. ސެޓުގައި ސިންގަޕޫރަށް 9 ޕޮއިންޓްގެ ލީޑެއްވެސް ލިބުނެވެ. އަދި 25-14 އިން ސެޓު ގެއްލުނުއިރު މި ސެޓުގައި ގިނަ ޕޮއިންޓްތައް ގެއްލުނީ ރާއްޖޭގެ ރިސީވް ދަށްވެގެންނެވެ.
މުބާރާތުގައި ރާއްޖެ ކުޅުނު ދެ މެޗުން ބަލިވިއިރު، ލީގު ބުރުގެ ފަހު މެޗުގައި ސިންގަޕޫރު ނުކުންނާނީ މެލޭޝިއާއާ ދެކޮޅަށެވެ. މި މެޗުން މޮޅުވާ ޓީމެއް ފައިނަލަށް ދާނެ އެވެ. ބަލިވާ ޓީމެއް ރާއްޖެއާ ދެކޮޅަށް ނިކުންނާނީ ޕްލޭ-އޮފް މެޗުގަ އެވެ.
