ފާއިތުވި 25 އަހަރަށް ބަލާއިރު ވެސް ބާސެލޯނާ އިން ވަނީ ޔޫރަޕްގެ މުބާރާތެއްގެ ގަދަ 16 ބުރުގައި ކޮންމެ ފަހަރަކު ވެސް ވާދަކޮށްފަ އެވެ. އެކަމަކު، މި ފަހަރުގެ ޗެމްޕިއަންސް ލީގުގެ ގްރޫޕް ސްޓޭޖުން ކަޓައި، ޔޫރޮޕާ ލީގުގެ ނޮކައުޓް ޕްލޭއޮފް ބުރުން ރޭ މެންޗެސްޓާ ޔުނައިޓެޑް އަތުން ބަލިވުމާ އެކު، ބާސެލޯނާ އަށް ވަނީ 1998-1999 ވަނަ އަހަރުގެ ސީޒަނަށް ފަހު ފުރަތަމަ ފަހަރަށް ޔޫރަޕްގެ އެއްވެސް މުބާރާތެއްގެ ގަދަ 16 އިން ފުރުސަތު ނުލިބި ސީޒަނެއް ފުރިހަމަ ކުރަން ޖެހިފަ އެވެ.
މިދިޔަ ސީޒަނުގައި ވެސް ޗެމްޕިއަންސް ލީގުގެ ގްރޫޕް ސްޓޭޖުން ކެޓި ބާސެލޯނާ ވަނީ ޔޫރޮޕާ ލީގުގެ ކުއާޓާ ފައިނަލަށް ދަތުރުކޮށްފަ އެވެ. ކުއާޓާ ފައިނަލުން ކެޓީ ޖަރުމަނުގެ އައިންޓްރަކްޓް ފްރޭންކްފާޓް އަތުންނެވެ. މިދިޔަ އަހަރު ތަށި ހޯދީ ފްރޭންކްފާޓުންނެވެ.
މީގެ ދެ އަހަރު ކުރިން ބާސެލޯނާގެ ކޯޗުކަމާ ހަވާލުވި ޒަވީ ހެނާންޑޭޒްގެ އިރުޝާދުގެ ދަށުން ބާސެލޯނާ މި ވަނީ ޖެހިޖެހިގެން ދެ ސީޒަނުގައި ޔޫރަޕްގެ ދެ މުބާރާތުން ހިތްދަތި ގޮތަކަށް ވަކިވާން ޖެހިފަ އެވެ. ޔޫރަޕްގެ ފުޓްބޯޅައިގެ ގަދަ ބާރެއްގެ ގޮތުގައި 21 ވަނަަ ގަރުނު ފެށި ފަހުން އޮތް ބާސެލޯނާ އަށް ފަހަކަށް އައިސް ޔޫރަޕްގެ މުބާރާތްތަކުގައި ކާމިޔާބެއް ނުހޯދެ އެވެ.
"އަންނަ އަހަރު އަހަރެމެންނަށް ޔޫރަޕްގައި ރަނގަޅު ލެވަލެއްގައި ވާދަކުރެވޭނެ"، ޔޫރަޕްގައި ބާސެލޯނާގެ ކުރިމަގާ ބެހޭގޮތުން ސުވާލުކުރުމުން ޒަވީ ބުންޏެވެ.
"މިދިޔަ އަހަރު ހަގީގަތުގައި އަހަރެމެންނަށް ޔޫރަޕްގައި ވާދަކުރެވޭނެ ފެންވަރު ވެސް ނެތް. އެކަމަކު، މި ފަހަރު އަހަރެމެން ވާދަކޮށްފިން، ބަޔާން މިއުނިކާއި އިންޓަ އާއި ދެން ޔުނައިޓެޑާ. ޔަގީންކަމެއް އަހަރެމެން ރަނގަޅުކުރަން ޖެހޭ. އަހަރެމެން އެނބުރި އަންނާނީ ވަރުގަދަކޮށް،"
ސްޕެނިޝް ލީގުގެ އެއް ވަނައިގައި އޮތް ބާސެލޯނާ ރޭގެ މެޗުން ބަލިވުމާ އެކު އެ ޓީމުން ދަމަހައްޓަމުން އައި ބަލިނުވުމުގެ ރެކޯޑަށް 18 މެޗަށް ފަހު ވަނީ ނިމުން އަތުވެފަ އެވެ. ޒަވީ ބުނީ ޔޫރަޕްގެ މުބާރާތްތަކުން ކެޓި ކަމުގައި ވިޔަސް ސީޒަންގެ ބާކީ ބައިގައި ބާސެލޯނާ އިން ފޯކަސް ގެއްލުވައިނުލައި ކުޅޭނެ ކަމުގެ ޔަގީންކަން އެބައޮތް ކަމަށެވެ.
